ក្រុងប៉េកាំងៈ មន្ដ្រីពាណិជ្ជកម្មជាន់ខ្ពស់របស់ប្រទេស ចិន បានឲ្យដឹងថា ប្រទេស ចិន នឹងកាត់បន្ថយការរឹតបន្តឹងបន្ថែមទៀតលើការវិនិយោគបរទេស និងដោះស្រាយបញ្ហាប្រឈមរបស់ក្រុមហ៊ុនបរទេសដែលវិនិយោគនៅក្នុងទីផ្សាររបស់ខ្លួននៅឆ្នាំនេះ។
លោក Zhong Shan រដ្ឋមន្ដ្រីក្រសួងពាណិជ្ជកម្មបានឲ្យដឹងនៅក្នុងបទសម្ភាសមួយជាមួយទីភ្នាក់ងារព័ត៌មាន ស៊ីនហួរ កាលពីថ្ងៃសៅរ៍ថា បញ្ជីអវិជ្ជមានដែលរឹតបន្តឹងការវិនិយោគបរទេសនៅក្នុងឧស្សាហកម្មមួយចំនួន នឹងត្រូវកាត់បន្ថយបន្ថែមទៀតទាំង នៅក្នុងតំបន់ពាណិជ្ជកម្មសេរីសាកល្បងទាំង ១២ របស់ខ្លួន និងទូទាំងប្រទេស និងអនុញ្ញាតឲ្យបរទេសមានភាពជាម្ចាស់កម្មសិទ្ធិពេញលេញក្នុងវិស័យជាច្រើន។
លោកបានបញ្ជាក់យ៉ាងច្បាស់ពីវិធានការជំរុញមួយសម្រាប់ការវិនិយោគបរទេសក្នុងការផលិតកម្ម និងឧស្សាហកម្មបច្ចេកវិទ្យាទំនើប និងនៅតំបន់កណ្ដាល និងភាគខាងលិច។ លោកបន្ថែមថា រដ្ឋាភិបាល នឹងជួយក្រុមហ៊ុនបរទេសដោះស្រាយការពិបាកនានាទាក់ទងនឹងការវិនិយោគនៅក្នុងប្រទេស ចិន។
លោក Zhong បានបញ្ជាក់ថា ដើម្បីបង្កើតបរិយាកាសអនុគ្រោះ ក្រសួងពាណិជ្ជកម្មនឹងជំរុញឲ្យមានច្បាប់វិនិយោគបរទេស និងកែលម្អយន្តការដោះស្រាយបណ្តឹងរបស់រដ្ឋាភិបាលដែលដាក់ដោយក្រុមហ៊ុនបរទេស។
ក្នុងនាមជាទិសដៅវិនិយោគពិភពលោកដ៏ធំមួយ ចិនបានរក្សាកំណើនប្រកបដោយស្ថិរភាពក្នុងការវិនិយោគផ្ទាល់បរទេស (FDI) ក្នុងគ្រាដែលមានបរិយាកាសវិនិយោគ ពិភពលោកមិនល្អ។ FDI នៅចិនកើន ៣ ភាគរយដល់ ១៣៥ ពាន់លានដុល្លារនៅឆ្នាំ ២០១៨ ធៀបនឹងឆ្នាំ ២០១៧ ខណៈ FDI សម្រាប់ពិភពលោកទាំងមូលបានធ្លាក់ចុះ ៤១ ភាគរយ៕ People''s Daily/LA