The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋាភិបាល​ជំរុញ​ឲ្យ​ពង្រឹង​កម្លាំង​ពលកម្ម​ជំនាញ




រដ្ឋាភិបាល​ជំរុញ​ឲ្យ​ពង្រឹង​កម្លាំង​ពលកម្ម​ជំនាញ

Content image - Phnom Penh Post
ពិធី​ចុះ​ហត្ថលេខា​លើ​កិច្ច​ព្រម​ព្រៀង​រវាង​ក្រសួង​សេដ្ឋកិច្ច និង​ហិរញ្ញវត្ថុ និង​រដ្ឋាភិបាល​ជប៉ុន​លើ​ការ​អភិវឌ្ឍន៍​ធនធាន​មនុស្ស កាល​ពី​ថ្ងៃ​អង្គារ ទី​១៦ មិថុនា។ ហេង ជីវ័ន

រដ្ឋាភិបាល​ជំរុញ​ឲ្យ​ពង្រឹង​កម្លាំង​ពលកម្ម​ជំនាញ

ភ្នំពេញៈ ក្រសួង​សេដ្ឋកិច្ច និង​ហរិញ្ញ​វត្ថុ​កាល​ពីម្សិល​មិញ​បាន​ស្នើ​ឲ្យ​ក្រសួង​ពាក់​ព័ន្ធ​ធ្វើ​ការ​​រួម​គ្នា​ក្នុង​ការ​ងារ​អភិវឌ្ឍន៍​ជំនាញ​កម្លាំង​ពលកម្ម​កម្ពុជា​ដែល​គាំទ្រ​ដល់​ការ​អភិវឌ្ឍ​ឧស្សាហកម្ម​ដើម្បី​កាត់​បន្ថយ​ចំណាយ​គ្មាន​ប្រសិទ្ធ​ភាព ខណៈ​សេដ្ឋកិច្ច​កម្ពុជា​កំពុង​ផ្លាស់​ប្តូរ​រចនា​សម្ព័ន្ធ​ទៅ​ជា​សេដ្ឋកិច្ច​មាន​មូល​ដ្ឋាន​ឧស្សាហកម្ម។

សិក្ខា​សាលា​ពិគ្រោះ​យោបល់​ត្រូវ​បាន​ធ្វើ​ឡើង​នៅ​ក្រសួង​សេដ្ឋកិច្ច និង​ហិរញ្ញវត្ថុ​កាល​ពី​ម្សិល​មិញ​រវាង​​ក្រសួង​ពីរ​ដែល​ពាក់​ព័ន្ធ​រួម​មាន​ក្រសួង​អប់រំ​ និង​ក្រសួង​ការងារ ​វិស័យ​ឯកជន និង​ដៃ​គូ​អភិវឌ្ឍន៍ ដើម្បី​​ពិភាក្សា​លើ​ គោល​នយោបាយ ​ទិស​ដៅ ​និង​អាទិភាព​រួម​​ក្នុង​វិស័យ​នេះ ​សំដៅ​​បង្កើន​​ប្រសិទ្ធ​ភាព​​នៅ​ក្នុង​បែង​ចែក​ថវិកា​សម្រាប់​ឆ្នាំ ២០១៦ ​និង​កែ​លម្អ​​ប្រសិទ្ធ​ភាព​នៃ​ការ​អនុវត្ត។

លោក វង្ស៊ី ​វិសុទ្ធ រដ្ឋ​លេខា​ធិការ​​ក្រសួង​​សេដ្ឋកិច្ច​ និង​ហិរញ្ញវត្ថុ​បាន​ថ្លែង​ថា៖ «បញ្ហា​​ប្រឈម​នៅ​ក្នុង​វិស័យ​នេះ​រួម​​មាន​កង្វះ​​កម្លាំង​ពលកម្ម​ជំនាញ និង​បញ្ហា​បណ្តុះ​បណ្តាល​ជំនាញ​​នៅ​មិន​ចំ​តម្រូវការ។ ក្រសួង​ការងារ​ជា​មុខសញ្ញា​ក្នុង​ការ​បង្កើន​ថវិកា​សម្រាប់​ចំណាយ ប៉ុន្តែ​ត្រូវ​​មាន​លក្ខខណ្ឌ។ វា​ទាមទារ​​គោល​នយោបាយ​ច្បាស់​លាស់​ ទិសដៅ​ច្បាស់​លាស់​ និង​គោល​ការណ៍​ច្បាស់​លាស់​ជា​មួយ​​នឹង​អាទិភាព​ច្បាស់​លាស់​ដើម្បី​ទទួល​​បាន​ការ​ផ្ដល់​មូលនិធិ​កាន់​តែ​​ច្រើន (សម្រាប់​ថវិកា​ឆ្នាំ​ក្រោយ)»។

លោក​​បន្ត​ថា​៖ «​យើង​ត្រូវ​ចំណាយ​កាន់​តែ​ច្រើន​ តែ​ជា​ការ​ចំណាយ​ត្រឹម​ត្រូវ​ ចំទិស​ដៅ​និង​​ជា​ការ​ចំណាយ​​ប្រកប​ដោយ​ប្រសិទ្ធ​ភាព»។

លោក​ថ្លែងថា៖ «វិស័យ​ឯកជន​មាន​តួនាទី​ដ៏សំខាន់​នៅ​ក្នុង​ការ​អភិវឌ្ឍ​ជំនាញ​ខណៈ​កម្រិត​ស្នើ​ស្ដង់ដារ​របស់​ប្រព័ន្ធ​អប់រំ​វិជ្ជាជីវៈ (TVET) និង​​ ក្រសួង​អប់រំ និង​គុណ​ភាព​របស់​និស្សិត​បញ្ចប់​ការ​សិក្សា​ថា្នក់​ឧត្តម​សិក្សា​ចាំបាច់​ត្រូវ​ធ្វើ​ឲ្យ​ត្រូវ​គ្នា»។

ធនាគារ​អភិវឌ្ឍន៍​អាស៊ី (ADB) កាល​ពី​ឆ្នាំ​មុន​បាន​ប្រកាស​នូវ​កម្ចី ៣០ លាន​ដុល្លារ​សំដៅ​កែលម្អ​បច្ចេក​វិទ្យា​និង ប្រព័ន្ធ​អប់រំ​វិជ្ជាជីវៈ​របស់​កម្ពុជា។

លោក Eric Sidgwick នាយក​ប្រចាំ​ប្រទេស​នៅ ADB កាល​ពី​ម្សិលមិញ​បាន​ថ្លែង​ថា​ ខណៈ​​ប្រទេស​កម្ពុជា​នៅតែ​មាន​មូលដ្ឋាន​​ការ​ផលិត​​មាន​ប្រាក់​ឈ្នួល​ទាប​ វា​ត្រូវតែ​រក្សា​ការ​ឃ្លាំ​មើល​​លើ​ការ​អភិវឌ្ឍ​របស់​ដៃ​គូពាណិជ្ជកម្ម​​នៅ​ក្នុង​តំបន់​ដែល​កំពុង​ផ្លាស់​ប្តូរ​នៅ​ក្នុង​តំបន់​ដើម្បី​ចាប់​យក​ចំណែក​នៃ​កំណើន។

លោក​ថ្លែង​ថា៖ «ការ​កើន​ឡើង​​អ្នក​មាន​​ថ្នាក់​កណ្ដាល ​មិន​គ្រាន់​តែ​​នៅ​ក្នុង​ប្រទេស​ចិន​ប៉ុណ្ណោះ​ទេ ប៉ុន្តែ​​នៅ​ក្នុង​តំបន់​អាស៊ី​ផង​ដែរ​ និង​ការចាប់​ផ្ដើម​​នៅ​កម្ពុជា​ ដូច្នេះ​ដៃ​គូពាណិជ្ជ​កម្ម​របស់​អាស៊ាន​នៅ​ក្នុង​តំ​បន់​ផ្សេង​ទៀត​របស់​ពិភព​លោក នឹង​ផ្តោត​កាន់​តែ​ខ្លាំង​លើ​តំបន់​​អាស៊ាន ដូច្នេះ​ជា​ការ​អនុវត្ត​ដ៏​សំខាន់​សម្រាប់​ប្រទេស​កម្ពុជា»។

លោកស្រី​ Sandra D’Amico ​នាយក​​គ្រប់​គ្រង​​របស់​ក្រុម​ហ៊ុន​ជ្រើស​រើស​បុគ្គ​លិកឈាន​មុខគេ​នៅ​ក្នុង​ប្រទេស​កម្ពុជា​ថ្លែងថា​ កម្ពុជា​ចាំ​បាច់​ត្រូវ​​កំណត់​ស្ដង់​ដារ​ជាក់​លាក់​សម្រាប់​ការ​ទទួល​ស្គាល់​ជា​ផ្លូវ​ការ​និង​ជា​ការ​បញ្ជាក់​ដើ​ម្បីកែ​លម្អ​គុណ​ភាព​នៅ​ក្នុង​ការ​បណ្ដុះ​បណ្ដាល​វិជ្ជាជីវៈ៕PB

អត្ថបទគួរចាប់អារម្មណ៍