ភ្នំពេញៈ លោកនាយករដ្ឋមន្ត្រី ហ៊ុន សែន កាលពីថ្ងៃសុក្របានប្រកាសដាក់ចេញកំណែទម្រង់ទ្រង់ទ្រាយធំមួយមិនធ្លាប់មានដោយសម្រេចដាក់ចេញយុទ្ធសាស្ត្រចំនួន ១៧ ចំណុច ដើម្បីសម្រួលដល់ការធ្វើអាជីវកម្មជាអ្វីដែលលោកអះអាងថានឹងជួយសន្សំការចំណាយលើការធ្វើអាជីវកម្មរបស់វិស័យឯកជនរហូតដល់ ៤០០ លានដុល្លារក្នុង ១ ឆ្នាំ។
កំណែទម្រង់ទាំង ១៧ ចំណុចបានគ្របដណ្តប់លើចំណុចគន្លឹះសំខាន់ៗជាច្រើន រួមមានទាំង ការកាត់បន្ថយថ្លៃដឹកជញ្ជូនទំនិញតាមនាវា ថ្លៃសេវាកំពង់ផែ ការកាត់បន្ថយថ្លៃអគ្គិសនី និងកំណែទម្រង់ការគ្រប់គ្រងប្រតិបត្តិការផ្លូវដែកជាដើម។ មិនត្រឹមតែប៉ុណ្ណោះ រដ្ឋាភិបាលក៏បានសម្រេចកាត់បន្ថយថ្ងៃឈប់សម្រាកបុណ្យជាតិ ការដាក់ចេញនូវការលើកទឹកចិត្តផ្នែកសារពើពន្ធរាប់ទាំងពន្ធដារ និងពន្ធគយ និងការតម្រូវឲ្យពន្លឿនការបញ្ចប់ការធ្វើវិសោធនកម្មច្បាប់ស្តីពីការវិនិយោគ និងច្បាប់ស្តីពីតំបន់សេដ្ឋកិច្ចផងដែរ។
ថ្លែងក្នុងវេទិការាជរដ្ឋាភិបាលផ្នែកឯកជន លើកទី១៨ នាថ្ងៃសុក្រសប្តាហ៍មុន លោកនាយករដ្ឋមន្ត្រី ហ៊ុន សែន បានថ្លែងថា៖ «គ្រាន់តែការសម្រួលនេះ យើងបូកត្រួសៗនៃការកាត់បន្ថយការចំណាយមានប្រមាណជា ៤០០ លានដុល្លារ។ បណ្តាក្រុមហ៊ុននានាអាចកាត់បន្ថយ [ការចំណាយ] លើអ្វីៗទាំងអស់នេះមានតម្លៃប្រមាណជា ៤០០ លានដុល្លារ»។
លោកបន្ត ការធ្វើកំណែទម្រង់នេះ នឹងអនុញ្ញាតឲ្យកម្ពុជានៅបន្តការនាំចេញបានបើគ្មានប្រព័ន្ធអនុគ្រោះពន្ធពីសហភាពអឺរ៉ុប។ លោកថ្លែងថា៖ «អ៊ីចឹងទេបើ EU ឲ្យយើងបង់ពន្ធ ក៏យើងបង់ពន្ធឲ្យគេបានដែរ»។ លោកបន្តថា៖ «បើយើងមានការអនុគ្រោះ [ពន្ធ] វាក៏ល្អ។ ប៉ុន្តែកុំឲ្យគេមកប្រដៅយើងថា ហ្អែងត្រូវធ្វើអ៊ីចេះ ហែ្អងត្រូវធ្វើអ៊ីចុះ បើមិនធ្វើតាមទេ [គេ] នឹងកាត់ជំនួយ»។
នៅក្នុងចំណោមកំណែទម្រង់ជាកញ្ចប់ ១៧ ចំណុច លោកនាយករដ្ឋមន្រ្តីក៏រាប់បញ្ចូលទាំងការសម្រេចដែលលោកធ្លាប់ប្រកាសកាលពីមុនដែរមានដូចជាការដកកំាកុងត្រូលចេញពីការត្រួតពិនិត្យទំនិញតាមព្រំដែន ការលុបចោលអង្គភាព កំាសាប និងការផ្តល់ការលើកទឹកចិត្តផ្នែកពន្ធដារ ដល់សហគ្រាសខ្នាតតូច និងមធ្យម និងវិស័យកសិកម្មជាដើម។
យោងតាមការប្រកាសរបស់លោកនាយករដ្ឋមន្ត្រី ហ៊ុន សែន ការកាត់បន្ថយថ្លៃឡូជីស្ទីក ថ្លៃសេវាលើកដាក់កុងតឺន័រនៅចំណត និងថ្លៃសេវានៅកំពង់ផែទាំង ២ របស់រដ្ឋ ដែលទឹកប្រាក់ពីការកាត់នេះបូកបញ្ចូលគ្នានឹងជួយបន្ថយបន្ទុកចំណាយរបស់វិស័យឯកជនស្មើនឹងទឹកប្រាក់ ៦,៧ លានដុល្លារ។
ទាក់ទងនឹងកំណែទម្រង់ប្រព័ន្ធពន្ធគយ លោក ហ៊ុន សែន បានបញ្ជាក់ថា ចាប់ពីថ្ងៃទី ១ ខែ មេសា តទៅ រាល់ការផ្តល់សេវាពីអគ្គនាយដ្ឋានគយទៅឲ្យធុរជនត្រូវមានការចេញជាវិក្កយបត្រពីប្រព័ន្ធកុំព្យូទ័រដើម្បីទុកជូនម្ចាស់ទំនិញ ដើម្បីធានាពីតម្លាភាព ចៀសវាងការចំណាយលើសលើសេវានេះ។
រដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ ក៏បានសម្រេចកាត់បន្ថយ ៥០ ភាគរយនូវថ្លៃស្កេនកុងតឺន័រទំនិញនាំចេញ និងនាំចូល គឺកាត់បន្ថយពី ២០ ដុល្លារមកនៅ ១០ ដុល្លារ សម្រាប់កុងតឺន័រ ២០ ហ្វីត និងពី ៣២ ដុល្លារមក ១៦ ដុល្លារសម្រាប់កុងតឺន័រ ៤០ ហ្វីត។
លោកនាយករដ្ឋមន្រ្តីក៏បានណែនាំដល់ក្រុមប្រឹក្សាអភិវឌ្ឍន៍កម្ពុជា ធ្វើវិសោធនកម្មច្បាប់ស្តីពីការវិនិយោគ និងរៀបចំច្បាប់ស្តីពីតំបន់សេដ្ឋកិច្ចពិសេសឲ្យបានចប់សព្វគ្រប់នៅចុងឆមាសទី១ ឆ្នាំ ២០១៩ នេះ។
ទាក់ទងនឹងថ្លៃអគ្គិសនីវិញ លោកនាយករដ្ឋមន្រ្តីបញ្ជាក់ថា រដ្ឋាភិបាលបានសម្រេចកាត់បន្ថយថ្លៃអគ្គិសនីចាប់ពីឆ្នាំ ២០១៩ នេះទៅ សម្រាប់អ្នកប្រើប្រាស់គ្រប់ប្រភេទ រួមទាំងការកាត់បន្ថយថ្លៃអគ្គិសនីចំនួន ២ សេនដុល្លារក្នុង ១ គីឡូវ៉ាត់ម៉ោង សម្រាប់អ្នកប្រើប្រាស់ប្រភេទឧស្សាហកម្ម ហើយគ្រោងនឹងបញ្ចុះទៀតសម្រាប់ឧស្សាហកម្មផ្អែកលើជំនាញ និងឧស្សាហកម្មដែលប្រើប្រាស់មូលធនខ្ពស់។
រដ្ឋាភិបាលក៏បានប្រកាសបញ្ចប់សិទ្ធិធ្វើអាជីវកម្មផ្លូវដែក របស់ក្រុមហ៊ុន រ៉ូយ៉ាល់ រេលវេ ខេមបូឌា របស់លោក គិត ម៉េង ដោយបញ្ជាក់ថា ក្រុមហ៊ុននេះមិនបានពង្រីកសក្តានុពលរបស់ខ្លួនបានគ្រប់គ្រាន់ ជាហេតុធ្វើឲ្យការដឹកជញ្ជូនទំនិញតាមផ្លូវដែកមិនមានដំណើរការល្អ។
នៅក្នុងចំណោមកំណែទម្រង់សំខាន់ៗ លោកនាយករដ្ឋមន្រ្តីក៏បានប្រកាសកាត់បន្ថយថ្ងៃឈប់សម្រាកបុណ្យជាតិចំនួន ៧ ថ្ងៃក្នុង ១ ឆ្នាំពីចំនួនបច្ចុប្បន្ន គិតចាប់ពីឆ្នាំ ២០២០ តទៅ។ លោក ហ៊ុន សែន បានពន្យល់ថា កម្ពុជាមានថ្ងៃឈប់សម្រាក ២៨ ទៅ ៣០ ថ្ងៃក្នុង ១ ឆ្នាំ នៅពេលដែលប្រទេសជិតខាងដូចជាវៀតណាម មានតែ ១៣ ថ្ងៃ ប្រទេស ឡាវ មានតែ ១២ ថ្ងៃ ប្រទេស ថៃ មាន ១៦ ថ្ងៃ និងសិង្ហបុរី មានតែ ១១ ថ្ងៃ។
លោក លឹម ហេង អនុប្រធានសភាពាណិជ្ជកម្មកម្ពុជា បាននិយាយថា កន្លងមកវិស័យឯកជនតែងតែស្នើសុំរដ្ឋាភិបាលក្នុងការធ្វើកំណែទម្រង់ទៅលើបញ្ហាខ្លះក្នុងចំណោមចំណុចខាងលើដើម្បីជួយទម្លាក់ថ្លៃដើមផលិត។ ការកែទម្រង់ដែលមានលក្ខណៈទ្រង់ទ្រាយធំនេះនឹងជួយធ្វើឲ្យវិស័យឯកជនកាន់តែមានភាពរឹងមាំ និងដំណើរការកាន់តែងាយស្រួល ពិសេសអាចបង្កើនចំណូល តាមរយៈការកាត់បន្ថយថ្លៃដើមផលិត។
លោកបន្តថា វិស័យឯកជនពិតជារីករាយណាស់ដែលរដ្ឋាភិបាលសម្រេចធ្វើកំណែទម្រង់ទាំង ១៧ ចំណុចនេះ។
លោកមានប្រសាសន៍ថា៖ «ការឆ្លើយតបនេះ គឺជាការវះកាត់មួយរបស់រដ្ឋាភិបាលក្នុងការជួយដល់វិស័យឯកជន តាមរយៈការកាត់បន្ថយថ្លៃដើមផលិត»៕ រាយការណ៍បន្ថែមដោយ ហ៊ឹន ពិសី/LA