.jpg)
យុវជនកំពុងប្រើប្រាស់ទូរស័ព្ទស្មាតហ្វូន មើលព័ត៌មាននានាក្នុងបណ្តាញទំនាក់ទំនងសង្គម ហ្វេសប៊ុក។ ផា លីណា
ភ្នំពេញៈ ក្រសួងប្រៃសណីយ៍ និងទូរគមនាគមន៍ កាលពីថ្ងៃម្សិលមិញ បានប្រកាសដាក់ឲ្យដំណើរការជាផ្លូវការនូវកម្មវិធីអភិវឌ្ឍន៍ធនធានមនុស្សក្នុងជំនាញបច្ចេកវិទ្យាព័ត៌មានវិទ្យា និងទូរគមនាគមន៍ (ICT) ដែលនឹងដំណើរការរយៈពេល៤ឆ្នាំក្រោមជំនួយបច្ចេកទេសពីទីភ្នាក់ងារអភិវឌ្ឍន៍ជប៉ុន JICA។
កម្មវិធីបណ្តុះបណ្តាលនេះ ត្រូវបានចូលរួមអនុវត្តដោយ អង្គការមូលនិធិគាំទ្រការអប់រំអន្តរជាតិកម្ពុជា (CIESF) ជាអង្គការអន្តរជាតិមិនស្វែងរកប្រាក់ចំណេញនៃប្រទេសជប៉ុននិងវិទ្យាស្ថានជាតិប្រៃសណីយ៍ទូរគមនាគមន៍ និង ICT (NIPTICT) នៃក្រសួងប្រៃណីយ៍។
ថ្លែងក្នុងពិធីដាក់ឲ្យដំណើរការ កាលពីម្សិលមិញ លោក ត្រាំ អ៊ីវតឹក រដ្ឋមន្ដ្រីក្រសួងប្រៃសណីយ៍ និងទូរគមនាគមន៍ បានថ្លែងថា អាទិភាពរបស់ក្រសួងនឹងអភិវឌ្ឍធនធានមនុស្សនៅក្នុងវិស័យ ICT ដែលក្រសួងកំណត់ឲ្យមានពលកម្មជំនាញផ្នែក ICT ១៥ ភាគរយ ត្រឹមឆ្នាំ ២០២០ ក្នុងចំណោមកម្លាំងពលកម្មជំនាញសរុប ខណៈ ៩៥ ភាគរយ ក្នុងចំណោមមន្ដ្រីរដ្ឋាភិបាលកណ្ដាល និង ៧៥ ភាគរយ ក្នុងចំណោមមន្ដ្រីរដ្ឋាភិបាលមូលដ្ឋាននឹងមានជំនាញ ICT ជាមូលដ្ឋាន។
លោកថ្លែងថា៖ «គម្រោងរួមនៃការអភិវឌ្ឍធនធានមនុស្ស ICT រវាង NITICT និង CIESF ត្រូវបានចាត់ទុកថា ជាគំរូដ៏ល្អនៃកិច្ចសហការដើម្បីលើកកម្ពស់កម្លាំងពលកម្មផ្នែក ICT នៅក្នុងប្រទេសកម្ពុជា ដែលស្របជាមួយនឹងរបៀបវារៈដ៏សំខាន់នៃគោលនយោបាយអភិវឌ្ឍន៍ Telcoms-ICT របស់យើង»។
លោកបន្ថែមថា ក្រសួងនឹងធ្វើការងារជាមួយក្រសួង អប់រំ ដើម្បីបំពាក់ជំនាញ ICT មូលដ្ឋានដល់សិស្សសាលាវិទ្យាល័យទាំងអស់។
គម្រោងនេះនឹងអនុវត្តរយៈពេល ៤ ឆ្នាំ រហូតដល់ខែកញ្ញាឆ្នាំ២០២១ ហើយនឹងរួមមានសមាសភាព ៣ ដែលរួមមានការបណ្ដុះបណ្ដាលជាក់ស្ដែងផ្នែក IT ការលើកកម្ពស់ផ្នែក IT នៅតាមតំបន់ជនបទ និងការបង្កើតការងារផ្នែក IT។ គម្រោងនេះកំណត់ទិសដៅក្នុងការពង្រឹងបេក្ខជនគ្រូបង្គោល ២០០ នាក់ និងសិក្ខាកាម ២ ០០០ នាក់ នៅទីក្រុងភ្នំពេញ និងខេត្តចំនួន ៣ ដែលរួមមានខេត្តបាត់ដំបង បន្ទាយមានជ័យ និងស្វាយរៀង។
សកម្មភាពសំខាន់របស់គម្រោងនេះនឹងគាំទ្រការបណ្ដុះបណ្ដាលជាក់ស្ដែងផ្នែក IT ដែលមានវគ្គសិក្សា៣ដែលរួមមានវគ្គសិក្សាមូលដ្ឋាន វគ្គសិក្សាកណ្ដាល និងវគ្គសិក្សាជាន់ខ្ពស់។
លោក ម៉ី កល្យាណ ជាទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ(SNEC) ស្វាគមន៍គម្រោងអភិវឌ្ឍន៍ធនធានមនុស្សដែលទើបនឹងដាក់ឲ្យដំណើរការនេះ ដោយថ្លែងថា វាជាផ្នែកមួយនៃយន្តការក្នុងការដោះស្រាយបញ្ហារចនាសម្ព័ន្ធ នៃការផ្គូផ្គងមិនត្រឹមត្រូវនៃកម្លាំងពលកម្មនៅលើទីផ្សារការងារ។
លោកបានថ្លែងថា៖ «យើងនៅតែខ្វះធនធានមនុស្សខាងជំនាញបច្ចេកវិទ្យា ខណៈវាមានសារៈសំខាន់ក្នុងការជំរុញការអភិវឌ្ឍផលិតកម្ម»។
លោកបន្ថែមថា កម្មវិធីអប់រំណាមួយដើម្បីរួមចំណែកការកែលម្អកម្លាំងពលកម្មជំនាញសម្រាប់វិស័យឧស្សាហកម្មត្រូវបានស្វាគមន៍ជានិច្ច៕ LA
