.jpg)
ការស្កេន QR code លើទូរស័ព្ទ ពី QR code របស់ក្រសួងពាណិជ្ជកម្ម ដើម្បីទិញទំនិញក្នុងអំឡុងបិទខ្ទប់។ ហុង មិនា
ភ្នំពេញ៖ ក្រសួងពាណិជ្ជកម្មប្រកាសដាក់ឲ្យប្រើប្រាស់ទីផ្សារអនឡាញសម្រាប់លក់គ្រឿងឧបភោគបរិភោគចាំបាច់ ដើម្បីបំពេញតម្រូវការរបស់ប្រជាជនក្នុងអំឡុងពេលបិទខ្ទប់ក្រុងភ្នំពេញ និងក្រុងតាខ្មៅ ខេត្តកណ្តាល។
សេចក្តីប្រកាសព័ត៌មានរបស់ក្រសួងបានផ្សាយនៅថ្ងៃទី ២១ ខែមេសានេះ ឲ្យដឹងថា រាជរដ្ឋាភិបាលតាមរយៈក្រសួងពាណិជ្ជកម្មបានដាក់ឲ្យប្រើប្រាស់ទីផ្សារអនឡាញសម្រាប់លក់គ្រឿងឧបភោគបរិភោគដល់ប្រជាពលរដ្ឋក្នុងតំបន់ក្រហមចាប់ពីថ្ងៃទី ២១ ខែមេសា នេះតទៅ។
សេចក្តីប្រកាសព័ត៌មានបន្តថា ដើម្បីបញ្ជាទិញសូមចូលទៅកាន់គេហទំព័រ shop.moc.gov.kh ឬ តាមQR code។ ក្នុងករណីត្រូវការជំនួយត្រូវការផ្សារអនឡាញ ឬការបញ្ជាទិញ សូមទាក់ទងទៅលេខទូរសព្ទ ០១២ ៧៦៧ ០៤៣/០៨៩ ៣៥៥ ៦៩៦/០៦៩ ៥២៤ ៤៩៩/០១៥ ៨០៥ ៣១៣/០១៧ ៨៥៥ ០១១។
សេចក្តីប្រកាសព័ត៌មានឲ្យដឹងទៀតថា ក្រោយពីការបញ្ជាទិញក្រុមការងារនឹងរៀបចំចាត់ចែងដឹកជញ្ជូនទៅដល់មុខផ្ទះ។
ការប្រកាសឲ្យប្រើប្រាស់ទីផ្សារអនឡាននេះ ត្រូវបានបង្កើតឡើងបន្ទាប់ពីក្រសួងពាណិជ្ជកម្មជួបកិច្ចប្រជុំជាមួយតំណាងផ្សារទំនើបចំនួន ៧ តាមប្រព័ន្ធ ZOOM កាលពីថ្ងៃទី ២០ មេសា ដែលដឹកនាំដោយលោក ស៊ាង ថៃ រដ្ឋលេខាធិការ និងជាមន្រ្តីនាំពាក្យក្រសួងពាណិជ្ជកម្ម និងសហការី។
កិច្ចប្រជុំនេះ ដឹកនាំដោយលោក ស៊ាង ថៃ រដ្ឋលេខាធិការ និងជាមន្រ្តីនាំពាក្យក្រសួងពាណិជ្ជកម្ម និងសហការី ជាមួយនឹងតំណាងផ្សារទំនើបចំនួន ៧ រួមមាន ផ្សារទំនើប Aeon MallMakro LuckyBayonSupper StoreChip Mong និង Bio Mart។
ក្នុងឱកាសនេះ លោក ស៊ាង ថៃ បានស្នើដល់ម្ចាស់ផ្សារទំនើបទាំងនោះចូលរួមសហការគ្នាក្នុងការដាក់លក់ទំនិញរបស់ខ្លួនក្នុងវេបសាយរបស់ក្រសួងពាណិជ្ជកម្ម ឬសហការដឹកជញ្ជូនទំនិញជូនប្រជាពលរដ្ឋដែលស្ថិតនៅក្នុងតំបន់បិទខ្ទប់ និងតំបន់ក្រហម។
លោកថ្លែងទៀតថា ការស្នើសុំនេះ គឺដើម្បីចូលរួមជាមួយក្រសួង និងរាជរដ្ឋាភិបាលក្នុងការទប់ស្កាត់ការឆ្លងរាលដាលជំងឺកូវីដ ១៩ និងចូលរួមចំណែករក្សាស្ថិរភាពតម្លៃទំនិញនៅលើទីផ្សារ ពិសេសផលិតផលស្បៀងក្នុងអំឡុពេលនេះ។
លោកថ្លែងថា៖ «យើងសូមថ្លែងអំណរគុណ និងកោតសរសើរដល់ម្ចាស់ផ្សារទំនើបទាំងអស់ដែលកន្លងមកបានរក្សារស្ថិរភាពថ្លៃទំនិញបានល្អ ទោះបីស្ថិតក្នុងគ្រាលំបាកយ៉ាងណាក៏ដោយ»។
មន្រ្តីនាំពាក្យឲ្យដឹងទៀតថា ក្រុមការងាររបស់ក្រសួងពាណិជ្ជកម្មកំពុងបង្កើតប្រព័ន្ធមួយ ដើម្បីផ្សព្វផ្សាយលក់ទំនិញលើនៅទំព័រហ្វេសប៊ុនរបស់ក្រសួង ដើម្បីឲ្យប្រជាពលរដ្ឋនៅក្នុងតំបន់ក្រហមកាន់តែមានភាពងាយស្រួកក្នុងកុម្ម៉ង់ទិញ។
លោកនិយាយថា៖ «បើធ្វើវាបានកាន់បង្កលក្ខណៈកាន់តែប្រសើរថែមទៀត ក្នុងការផ្គត់ផ្គង់ទំនិញទៅឲ្យគាត់ ហើយយើងចង់បានកិច្ចសហការរបស់ផ្សារទំនើបនានា ដើម្បីធ្វើការយ៉ាងណាឲ្យអ្នកទិញក្នុងតំបន់ក្រហម ក្រៅពីទំនិញក្រសួងពាណិជ្ជកម្មមានគាត់អាចទិញពីផ្សារដទៃទៀត និងសហការដឹកជញ្ជូនឲ្យដល់មាត់ទ្វារផ្ទះរបស់ពួកគាត់»។
ភាគីតំណាងផ្សារទំនើបទាំងនោះក៏បានសំណូមពរដល់ក្រសួងពាណិជ្ជកម្មឲ្យជួយសម្របសម្រួលដល់ពួកគេចំពោះបញ្ហាកំពុងប្រឈមនៃការធ្វើដំណើររបស់បុគ្គលិកទៅមក ដើម្បីបំពេញការងារ ហើយពួកគេក៏ស្នើឲ្យក្រសួងជួយសម្រួលការលំបាកក្នុងការដឹកជញ្ជូនទំនិញធ្លងពីតាមបណ្តាខេត្តចូលមករាជធានីភ្នំពេញ និងការនាំចូលទំនិញពីក្រៅប្រទេស ដើម្បីផ្គត់ផ្គង់តម្រូវការនៅក្នុងស្រុកផងដែរ។ នេះបើតាមក្រសួងពាណិជ្ជកម្ម។
លោក ម៉ក់ ចំរើន ដែលជាសហស្ថាបនិករបស់ផ្សារទំនើបអនឡាញ Smile Shop ឈានមុខនៅកម្ពុជាស្វាគមន៍ និងគាំទ្រចំពោះវិធានការរបស់ក្រសួងពាណិជ្ជកម្មដែលចង់សហការជាមួយភាគីផ្សារទំនើបទាំងអស់នៅទីក្រុងភ្នំពេញ ដើម្បីផ្គត់ផ្គត់ទំនិញលក់ដល់ប្រជាពលរដ្ឋក្នុងអំឡុងពេលបិទខ្ទប់នេះ។
លោក ចំរើន ប្រាប់ ភ្នំពេញ ប៉ុស្តិ៍ នៅថ្ងៃនេះថា វិធានការរបស់ក្រសួងពាណិជ្ជកម្មនៅពេលនេះបានស្របទៅនឹងវិធានការរឹតបន្តឹងការធ្វើដំណើរដែលកំពុងមានតម្រូវការទំនិញចាំបាច់ក្នុងតំបន់ដែលត្រូវបិទខ្ទប់ (តំបន់ក្រហម)។
លោកថ្លែងទៀតថា៖ «យើងសូមឲ្យក្រសួងពាណិជ្ជកម្មធ្វើការចេញគោលការណ៍ណែនាំមួយថ្មីធ្វើយ៉ាងណាផ្តល់លទ្ធភាពឲ្យក្រុមដឹកជញ្ជូនទំនិញ និងផ្សារដឹកទំនិញរហ័សទាន់ចិត្តដល់ប្រជាជនក្នុងអំឡុងពេលនេះ។ យើងត្រូវរក្សានូវគោលការណ៍អនាម័យក្នុងការទប់ស្កាត់នៃឆ្លងជំងឺកូវិដ ១៩ ដែលជាអ្វីយើងត្រូវការចូលរួមជាមួយគ្នាផងដែរ»។
លោកឲ្យដឹងទៀតថា Smile Shop បាននិងកំពុងចូលរួមគ្នាជួយរដ្ឋាភិបាលយ៉ាងសកម្មក្នុងការផ្តល់ជូនទំនិញតាមតម្រូវការចាំបាច់របស់ប្រជាជនក្នុងអំឡុងពេលបិទខ្ទប់។
លោកនិយាយថា៖ «ខ្ញុំក៏បានត្រៀមខ្លួនរួចជាស្រេចក្នុងការសហប្រតិបត្តិការជាមួយកសិករដែលគាត់បានផលិតបន្លែ ត្រី សាច់ នៅជិតរាជធានីភ្នំពេញ ដើម្បីនាំយកផលិតផលរបស់ពួកគាត់ឲ្យទៅដល់តំបន់បិទខ្ទប់ទាំងអស់ឲ្យបានទាន់សភាពការ ហើយយើងបានចូលរួមជាមួយរដ្ឋាភិបាលក្នុងការរក្សាតម្លៃទំនិញក្នុងកម្រិតទាបមួយអាចទទួលបានពីគ្រប់ភាគី»។
បច្ចុប្បន្ន ក្រសួងពាណិជ្ជកម្មបាននិងកំពុងចល័តរថយន្តចំនួន ៥ គ្រឿង នៅក្នុងតំបន់ក្រហម ដើម្បីចែកចាយទំនិញចាំបាច់ដល់ប្រជាពលរដ្ឋនៅតំបន់នោះក្នុងតម្លៃក្រោមទីផ្សារ។ ទំនិញទាំងនោះ រួមមាន អង្ករ មី ទឹកសុទ្ធ ត្រីខកំប៉ុង ទឹកត្រី និងទឹកស៊ីអ៊ីវជាដើម៕
