.jpg)
ស្ដង់ដែលត្រូវបានដំឡើងសម្រាប់លក់គ្រឿងឧបភោគបរិភោគជូនប្រជាពលរដ្ឋនៅតំបន់ក្រហម។ រូបថត ទទក
ភ្នំពេញ៖ ក្រសួងពាណិជ្ជកម្មបានដំឡើងស្តង់លក់គ្រឿងឧបភោគបរិភោគចាំបាច់មួយចំនួននៅតំបន់ក្រហម ដើម្បីសម្រួលដល់ប្រជាពលរដ្ឋទទួលបានម្ហូបអាហារចាំបាច់។
តំបន់ក្រហមទាំង ៧ ទីតាំងនោះ ស្ថិតនៅក្នុងខណ្ឌចំនួន ៣ គឺ ខណ្ឌមានជ័យ ខណ្ឌពោធិ៍សែនជ័យ និងខណ្ឌទួលគោក។
ក្រសួងពាណិជ្ជកម្មឲ្យដឹងថា នៅថ្ងៃទី ២១ នេះ ក្រសួងមានរថយន្តចំនួន ៦ គ្រឿង បានដឹកទំនិញចេញទៅតំបន់ក្រហមដោយបរិមាណទំនិញគ្រប់គ្រាន់សម្រាប់ផ្គត់ផ្គង់អ្នកក្នុងតំបន់នោះ។ ទំនិញទាំងនោះ រួមមានអង្ករ ទឹកត្រី ទឹកស៊ីអ៊ីវ ត្រីខកំប៉ុង និងមី។
ក្រសួងនេះបញ្ជាក់ថា៖ «ប្រជាជនអាចទាក់ទងតាមអាជ្ញាធរមូលដ្ឋាន ពិសេសក្រុមល្បាត ប្រជាការពារដែលនៅជិតៗផ្ទះ ដើម្បីសុំឲ្យជួយសម្របសម្រួលដល់ការទិញ និងជញ្ជូនដាក់ឲ្យដល់ផ្ទះ»។
ទីតាំងលក់ក្នុងតំបន់ក្រហមទាំងនោះ រួមមាន ស្តង់ស្ថិតនៅចន្លោះផ្លូវផ្សារស្ទឹងមានជ័យចាស់ និងផ្សារស្ទឹងមានជ័យថ្មីជាប់នឹងផ្សារតេលាម៉ាត ព្រមទាំងស្តង់នៅច្រមុះជ្រូកស្ទឹងមានជ័យ ស្តង់នៅផ្សារត្រពាំងថ្លឹង ផ្សារឯករាជ្យ និងស្តង់នៅលើផ្លូវវេងស្រេង។
កាលពីថ្ងៃទី ២០ មេសា តាមរយៈក្រុមហ៊ុន ហ្រ្គីន ត្រេដ នៃក្រសួងពាណិជ្ជកម្មបានបញ្ចេញអង្ករលក់ចំនួន ១១៣ បេ មីជាតិចំនួន ៦៤៦ កេស ទឹកត្រីចំនួន ២៨៨ យួរ ទឹកស៊ីអ៊ីវចំនួន ១៩០ យួរ ត្រីខចំនួន ៣១១ យួរ និងទឹកសុទ្ធចំនួន ៥២ យួរ៕
ស្ដង់ដែលត្រូវបានដំឡើងសម្រាប់លក់គ្រឿងឧបភោគបរិភោគជូនប្រជាពលរដ្ឋនៅតំបន់ក្រហម។ រូបថត ទទក
