ភ្នំពេញៈ ក្រសួងបរិស្ថានកាលពី ម្សិលមិញបានដាក់កំណត់រយៈពេល ៦ ខែឲ្យក្រុមហ៊ុនអភិវឌ្ឍន៍ចំនួនពីរនៅតំបន់ឧទ្យានជាតិរាមនៃខេត្តព្រះសីហនុ កែសម្រួលប្លង់គោលរបស់ខ្លួន ក្នុងបំណងជំរុញគម្រោងអភិវឌ្ឍន៍ទេសចរណ៍ឲ្យដើរទៅមុខកាន់តែលឿន។
គម្រោងអភិវឌ្ឍន៍ទាំងពីរនេះរួមមានគម្រោងអភិវឌ្ឍន៍ទេសចរណ៍មានតម្លៃ ១,៨ ពាន់លានដុល្លាររបស់ក្រុមហ៊ុន Evergreen Success and Asia Development Co នៅលើផ្ទៃដី ១៤៨០ ហិកតានៅតំបន់ឧទ្យានជាតិរាម ដែលត្រូវបានរដ្ឋាភិបាលផ្តល់សិទ្ធិអភិវឌ្ឍន៍ពីឆ្នាំ២០០៨ និងគម្រោងអភិវឌ្ឍន៍ទេសចរណ៍ធម្មជាតិរបស់ក្រុមហ៊ុន Royal Group នៅលើផ្ទៃដី ១៤០៨ ហិកតា ផ្តល់សិទ្ធិដោយរដ្ឋាភិបាលនៅឆ្នាំ២០០៩។
លោកថ្លែងថា ក្រុមហ៊ុនទាំងពីរមានរយៈពេល៦ខែដើម្បីបញ្ចប់នីតិវិធីពាក់ព័ន្ធនិងសម្រួលប្លង់គោលរបស់ខ្លួន ហើយក្រសួងនឹងបន្តត្រួតពិនិត្យវាយតម្លៃដោយយកចិត្តទុកដាក់ពីដំណើរការនៃគម្រោងទាំងពីរនេះ។
លោកបន្តថា៖ «ចំណែកក្រុមហ៊ុន Evergreen Success and Asia Development Co និងក្រុមហ៊ុន Royal Group រដ្ឋាភិបាលបានសម្រេចទុករយៈពេល ៦ ខែឲ្យកែសម្រួលប្លង់មេ និងបំពេញឲ្យគ្រប់នីតិវិធី។ ក្រសួងនឹងបន្តពិនិត្យវាយតម្លៃដោយយកចិត្តទុកដាក់ចំពោះក្រុមហ៊ុនទាំងពីរនេះ។ នៅ៦ខែក្រោយ ក្រសួងនឹងធ្វើការវាយតម្លៃដំណើរការគម្រោងទាំងពីរនេះម្តងទៀត»។
តាមការឲ្យដឹងបន្ថែមពីមន្ត្រីនាំពាក្យក្រសួងបរិស្ថាន លោក សៅ សុភាព ក្រុមហ៊ុនទាំងពីរនេះនៅមិនទាន់បានបញ្ចប់ការបំពេញបែបបទតាមនីតិវិធីឈានទៅដល់ប្លង់មេនៅឡើយទេ ទោះជាយ៉ាងណា លោកមិនបានបញ្ជាក់ពីវិធានការបន្ទាប់របស់ក្រសួងទេ ក្នុងករណីដែលក្រុមហ៊ុនមិនអាចបញ្ចប់ការបំពេញបែបបទនៅ៦ខែក្រោយ។
ឧទ្យានជាតិរាមត្រូវបានបង្កើតឡើងនៅឆ្នាំ១៩៩៣ មានទំហំ ២១ ០០០ ហិកតាជាតំបន់ព្រៃអភិរក្សដែលស្ថិតនៅជាប់ឆ្នេរក្នុងខេត្តព្រះសីហនុ ប៉ុន្តែនៅប៉ុន្មានឆ្នាំចុងក្រោយនេះ ត្រូវបានកាត់ចេញជាចំណែកប្រគល់ឲ្យវិនិយោគឯកជនដើម្បីអភិវឌ្ឍក្នុងគម្រោងទេសចរណ៍ផ្សេងៗ។
លោក អំ សំអាត មន្ត្រីស៊ើបអង្កេតជាន់ខ្ពស់របស់អង្គការសិទ្ធិមនុស្សលីកាដូបាននិយាយកាលពីថ្ងៃម្សិលមិញថា ខណៈផែនការអភិវឌ្ឍន៍ជាធម្មតាមានបំណងលើកកម្ពស់ជីវភាពរស់នៅរបស់ប្រជាពលរដ្ឋ ភាគច្រើននៃលទ្ធផលគឺផ្ទុយ។
លោកបានបន្តថា៖ «តំបន់មួយចំនួនដែលបានផ្តល់ឲ្យអភិវឌ្ឍនៅឧទ្យានរាម ជាន់គ្នានឹងដីអ្នកភូមិ។ ដូច្នេះមិនមានការដោះស្រាយសម្រាប់ពួកគេនៅឡើយទេ»។
លោកបានបន្ថែមថា៖ « មកទល់ពេលនេះយើងនៅតែមិនទាន់មើលឃើញការវិវឌ្ឍណាមួយនៃផែនការអភិវឌ្ឍន៍នេះនៅឡើយទេ ខណៈប្រជាពលរដ្ឋក្នុងសហគមន៍កំពុងរងផលប៉ះពាល់ដែលមិនអាចរកចំណូលពីអនុផលព្រៃឈើនៅជុំវិញឧទ្យានដែលពួកគេធ្លាប់ទទួលបានពីមុនមក»។
លោក ហូ វណ្ឌី សហប្រធានក្រុមការងារទេសចរណ៍វិស័យឯកជន រដ្ឋាភិបាលបាននិយាយថា លោកស្វាគមន៍ នឹងវិធានការនេះ និងលើកទឹកចិត្តឲ្យមានជំរុញគម្រោងអភិវឌ្ឍន៍ច្រើនទៀតដែលនៅមានដំណើរការយឺត។
លោកបន្ថែម៖ «មានកោះប្រហែល២០ត្រូវបានផ្តល់ឲ្យវិនិយោគិនដើម្បីអភិវឌ្ឍទៅជាតំបន់ទេសចរណ៍ ប៉ុន្តែមានតែកោះ ៦ ប៉ុណ្ណោះ កំពុងត្រូវបានអភិវឌ្ឍ។ ខ្ញុំសង្ឃឹមថា នឹងមើលឃើញវិធានការបន្ថែមទៀតរបស់រដ្ឋាភិបាលក្នុងការជំរុញគម្រោងផ្សេងទៀតឲ្យដំណើរការ ដែលនឹងផ្តល់ប្រយោជន៍ឧស្សាហកម្មទេសចរណ៍ទាំងមូល»។
លោក គិត ម៉េង អគ្គនាយកក្រុមហ៊ុនរ៉ូយ៉ាល់គ្រុបបានបដិសេធអត្ថាធិប្បាយ ខណៈក្រុមហ៊ុន Evergreen Success and Asia Development Co កាលពីថ្ងៃម្សិលមិញមិនបានឆ្លើយតប៕
