The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​នឹង​ចាប់ផ្តើម​អនុវត្ត​ឱ្យ SMEs ចុះបញ្ជី​តាម​ប្រព័ន្ធ​អនឡាញ

រដ្ឋាភិបាល​នឹង​ចាប់ផ្តើម​អនុវត្ត​ឱ្យ SMEs ចុះបញ្ជី​តាម​ប្រព័ន្ធ​អនឡាញ

Content image - Phnom Penh Post
SMEs នឹង​ចាប់ផ្តើម​ធ្វើការ​ចុះបញ្ជី​តាម​អនឡាញ​ឆាប់ៗ​នេះ​។ រូបថត រ៉ាហ៊ីម

រដ្ឋាភិបាល​នឹង​ចាប់ផ្តើម​អនុវត្ត​ឱ្យ SMEs ចុះបញ្ជី​តាម​ប្រព័ន្ធ​អនឡាញ

ភ្នំពេញ: ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍​គ្រោង​នឹងដាក់​បញ្ចូល​ប្រព័ន្ធ​ចុះបញ្ជី​អាជីវកម្ម​សម្រាប់​សហគ្រាស​ខ្នាតតូច និង​មធ្យម​ (SMEs) ​តាម​ប្រព័ន្ធ online (MISTI Key Single Portal) ​ចូលទៅក្នុង​ប្រព័ន្ធ​ចុះបញ្ជី​អាជីវកម្ម CamDX system របស់​ក្រសួង​សេដ្ឋកិច្ច និង​ហិរញ្ញវត្ថុ​នៅ​ខែ​ក្រោយនេះ​បន្ទាប់ពី​ការធ្វើ​តេស្ត​សាកល្បង​ប្រព័ន្ធ​ចុះបញ្ជី​អនឡាញ​នេះ​ទទួល​បាន​ជោគជ័យ​ ៩០ ​ភាគរយ​។

លោក ចម ប្រសិទ្ធ រដ្ឋមន្ត្រី​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍​ដែល​បាន​ដឹកនាំ​កិច្ចប្រជុំ​ក្រុមការងារ​បច្ចេកទេស​របស់​ក្រសួង​កាលពី​ថ្ងៃ​អង្គារ​បាន​ថ្លែងថា ការខិតខំ​ប្រឹងប្រែង​របស់​ក្រុមការងារ​បច្ចេកទេស​បាន​ធ្វើតេស្ត​សាកល្បង​ដោយ​ជោគជ័យ​នៃ​ប្រព័ន្ធ​ចុះបញ្ជី​អាជីវកម្ម​តាម​ប្រព័ន្ធ​អនឡាញ​ (MISTI Key Single Portal) ​សម្រាប់ SMEs នៅ​កម្ពុជា​។

លោក​បានឱ្យ​ដឹងថា ការបង្កើត​ប្រព័ន្ធ​ចុះបញ្ជី​អាជីវកម្ម​តាម​អនឡាញ​នេះ​ត្រូវបាន​ធ្វើឡើង​ក្នុង​គោលបំណង​ដើម្បី​កាត់បន្ថយ​ការប្រើប្រាស់​ក្រដាស​ស្នាម​ជា​អតិបរមា ចំណេញ​ពេលវេលា និង​កាត់បន្ថយ​ការចំណាយ​ក្រៅ​ផ្លូវការ​ផងដែរ​។

លោក​បាន​ថ្លែង​បន្ត​ថា​៖ «​ខ្ញុំ​សូម​ផ្តល់​អនុសាសន៍​ណែនាំ​ឱ្យ​ពិនិត្យ​កែលម្អ​បន្ថែម​លើ​ទិដ្ឋភាព​បច្ចេកទេស ប្រសិទ្ធភាព​ការងារ កំណែ​អក្ខរាវិរុទ្ធ​ទាំង​ភាសា​ខ្មែរ និង​អង់គ្លេស ព្រមទាំង​ពង្រឹង​សុវតិ្ថភាព​ទិន្នន័យ​ដើម្បី​បំពេញ​បន្ថែម​ចំណុច​ខ្វះខាត​មុន​នឹង​ប្រព័ន្ធ​នេះ​ត្រូវ​ប្រកាស​ដាក់ឱ្យ​ប្រើប្រាស់​ជា​ផ្លូវការ​»​។

លោក ឈា ឡាយហ៊ី ប្រធាន​នាយកដ្ឋាន​សហគ្រាស​ធុន​តូច និង​មធ្យម​ប្រាប់​ភ្នំពេញ​ប៉ុស្តិ៍​ថា ទោះជា​ការធ្វើ​តេស្ត​សាកល្បង​លើកដំបូង​នៃ​ប្រព័ន្ធ​ចុះបញ្ជី​អាជីវកម្ម​តាម​អនឡាញ​ទទួលបាន​ជោគជ័យ​ក៏ដោយ ក្រុម​ការងារ​បច្ចេកទេស​នឹង​បន្ត​ចុះបញ្ជី​សាកល្បង​ជាមួយ​នឹង​សហគ្រាស​ធុន​តូច និង​មធ្យម​ចំនួន ២០០ ​បន្ថែមទៀត​ដើម្បី​ឱ្យ​ប្រាកដ​ថា​ប្រព័ន្ធ​ចុះបញ្ជី​អាជីវកម្ម​នេះ​ដំណើរការ​ដោយ​រលូន​។

លោក​ថ្លែងថា​៖ «​យើង​គ្រោង​នឹងដាក់​បញ្ចូល​គ្នា​ប្រព័ន្ធ​ចុះបញ្ជី​អាជីវកម្ម​តាម​ប្រព័ន្ធ​អនឡាញ​ជាមួយ​នឹង​ប្រព័ន្ធ​របស់​ក្រសួង​សេដ្ឋកិច្ច និង​ហិរញ្ញវត្ថុ​នៅ​ខែវិច្ឆិកា​ខាង​មុខ​នេះ​មាន​ន័យថា​សហគ្រាស​ធុន​តូច និង​មធ្យម​អាច​ចុះបញ្ជី​អាជីវកម្ម​ជាមួយ​ប្រព័ន្ធ​មួយណា​ក៏បាន​។ យើង​រំពឹងថា​នៅពេល​ប្រព័ន្ធ​ចុះបញ្ជី​អាជីវកម្ម​នេះ​ដាក់ឱ្យ​ដំណើរការ​ជា​ផ្លូវការ​នឹងមាន​ការចូលរួម​គាំទ្រ​ច្រើន​ពី​សហគ្រាស​ធុន​តូច និង​មធ្យម​»​។

លោក លឹម ហេង អនុប្រធាន​សភា ពាណិជ្ជកម្ម​កម្ពុជា​បាន​ឱ្យ​ដឹងថា ការផ្តួចផ្តើម​ឱ្យ​មាន​ការចុះបញ្ជី​អាជីវកម្ម​តាម​ប្រព័ន្ធ​អនឡាញ​នេះ​នឹង​ជួយ​ពង្រឹង​សុក្រឹតភាព តម្លាភាព និង​លើកកម្ពស់​ប្រសិទ្ធភាព​ការងារ​របស់​ក្រសួង​នេះ​កាន់តែ​ល្អប្រសើរ​ថែមទៀត​។

លោក​ថ្លែងថា​៖ «​យើង​គាំទ្រ​នេះ​ជា​ដំណឹង​ល្អ ដែល​ក្រសួង​បង្កើត​ប្រព័ន្ធ​ចុះបញ្ជី​អាជីវកម្ម​សម្រាប់​ពួកគេ​តាម​អនឡាញ ហើយ​នេះ​ជា​អ្វីដែល​វិស័យ​ឯកជន​ចង់បាន​វា​នឹង​កាត់បន្ថយ​ភាពស្មុគស្មាញ​នៃ​ការចុះបញ្ជី និង​ការិយាធិបតេយ្យ​ផង​ដែរ​»​។

ក្រសួង​ឧស្សាហកម្ម វិទ្យាសាស្ត្រ​បច្ចេកវិទ្យា និង​នវានុវត្តន៍​បានឱ្យ​ដឹងថា កម្ពុជា​មាន​សហគ្រាស​សរុប ៥១៣ ៧៥៩ ក្នុងនោះ​ជាង ៩៧ ភាគរយ​ជា​សហគ្រាស​ខ្នាតតូច និង ២,២ ភាគរយ​ជា​សហគ្រាស​ធុន​ធំ​៕

អត្ថបទគួរចាប់អារម្មណ៍

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។

  • ភ្នំពេញៈ ក្រសួង​អប់រំ យុវជន​ និង​កីឡា​កំពុង​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ព្រមទាំង​ដៃគូ​អភិវឌ្ឍន៍ និង​វិស័យ​ឯកជន ដើម្បី​រៀបចំ​តភ្ជាប់​ប្រព័ន្ធ​អ៊ីនធឺណិត​ដល់​គ្រឹះស្ថានសិក្សា​សាធារណៈ​​ក្នុង​រយៈពេល​ ៤ ​ឆ្នាំ​ (​ឆ្នាំ​ ២០២០-២០២៣) ​ដើម្បី​ផ្ដល់​ការរៀន​ និង​ការបង្រៀន​តាមបែប​ឌីជីថល​​ដែល​ការអនុវត្ត​ត្រូវធ្វើ​ឡើងជា​ជំហានៗ​ចាប់ពី​ចុងឆ្នាំ​នេះ​ទៅ​។