ភ្នំពេញៈ រដ្ឋាភិបាលកម្ពុជា និងក្រុមហ៊ុនកាណាដា EnerCam Resources Co. Ltd. (EnerCam) និងចុះកិច្ចព្រមព្រៀងរុករកប្រេងនៅក្នុងប្លុក VIII ក្នុងពេលឆាប់ៗនេះ។ នេះបើយោងតាមមន្ដ្រីជាន់ខ្ពស់នៃអគ្គនាយកដ្ឋានប្រេងកាត។
លោក ជៀប សួរ អគ្គនាយកនៃអគ្គនាយកដ្ឋានប្រេងកាតបានប្រាប់កាសែតភ្នំពេញ ប៉ុស្តិ៍កាលពីថ្ងៃចន្ទថា ក្រសួងរ៉ែ និងថាមពលកំពុងចរចាកិច្ចព្រមព្រៀងមួយជាមួយក្រុមហ៊ុនកាណាដា EnerCam Co ដើម្បីរុករកប្រេងនៅប្លុក VIII។ លោកថ្លែងថា៖ «ខ្ញុំសង្ឃឹមថា យើងនឹងសម្រេចបានកិច្ចព្រមព្រៀងមួយលើការរុករកប្រេងជាមួយក្រុមហ៊ុននេះក្នុងពេលឆាប់ៗ ហើយការចរចាកំពុងដំណើរការ»។
លោក ជៀប សួរ ធ្លាប់បានលើកឡើងកាលពីខែមុនថា ក្រសួងនឹងផ្ដល់អាទិភាពដល់ការទាក់ទាញក្រុមវិនិយោគិនកាន់តែច្រើនចំពោះវិស័យរ៉ែ និងថាមពលនៅក្នុងប្រទេសកម្ពុជា។
ក្រុមហ៊ុនរុករករ៉ែ Angkor Gold Corp ដែលជាក្រុមហ៊ុនមេរបស់ក្រុមហ៊ុន EnerCam Resources Co. Ltd. បានឲ្យដឹងក្នុងសេចក្តីប្រកាសព័ត៌មានកាលពីខែសីហា ឆ្នាំ ២០១៩ ថា EnerCam បានទទួលការយល់ព្រមពីរដ្ឋាភិបាលកម្ពុជាសម្រាប់សម្បទានរុករកប្រេង និងឧស្ម័នលើដីគោកទំហំ ៧ ៣០០ គីឡូម៉ែត្រការ៉េ។
ជាមួយនឹងការអនុម័តនេះ នៅពេលនេះក្រុមហ៊ុន Angkor Gold Corp កំពុងបន្តការចរចាកិច្ចព្រមព្រៀងចែករំលែកការផលិត (PSA) ទាក់ទងនឹងអាជ្ញាប័ណ្ណនេះ។
ការយល់ព្រមនេះក៏អាចឲ្យក្រុមហ៊ុន Angkor បន្តការរុករកប្រេង និងឧស្ម័ននៅប្លុក VIII បានផងដែរ។ ប្រេងប្លុក VIII មានទីតាំងនៅបាសាំងកំពង់សោមដែលថ្មីៗនេះត្រូវបានទទួលស្គាល់ និងជាបាសាំងនៅដែនគោក ដែលមិនទាន់បានរុករកនៅភាគអាគ្នេយ៍ប្រទេសកម្ពុជា។
ប្លុកនេះដំបូងឡើយត្រូវបានកំណត់ជាបាសាំងដុះលយចូលសមុទ្រកាលពីឆ្នាំ ២០១៦ ដោយក្រុមអ្នកស្រាវជ្រាវមកពីក្រុមហ៊ុន Danish Geological Survey ដែលកំពុងបកប្រែតារាងទិន្នន័យស៊ីស្មី។ នេះបើយោងតាមក្រុមហ៊ុន។
លោក ជៀប សួរ បានឲ្យដឹងថា ប្រទេសកម្ពុជាបានបែងចែកតំបន់សម្រាប់ការរុករកប្រេងកាតចំនួន ៦ ប្លុកនៅក្នុងសមុទ្រ និង ១៩ ប្លុកនៅដែនគោក។
បច្ចុប្បន្ន Cambodian Resources Energy Development Co Ltd ជាក្រុមហ៊ុនគ្រប់គ្រងដោយវិនិយោគិនជនជាតិចិនត្រូវបានផ្ដល់អាជ្ញាប័ណ្ណឲ្យរុករកប្រេងរយៈពេល ៣ ឆ្នាំនៅប្លុក D ដែលមានទំហំ ៥ ៥០០ គីឡូម៉ែត្រការ៉េក្នុងឈូងសមុទ្រថៃ ហើយក្រុមហ៊ុនគ្រោងចាប់ផ្ដើមការរុករកប្លុក D នៅឆ្នាំនេះ។ នេះបើតាមក្រសួង។
នៅពេលនេះក្រុមហ៊ុនកំពុងសិក្សាឯកសារទាំងអស់។ បន្ទាប់មកពួកគេនឹងចាប់ផ្ដើមការរុករកអណ្ដូងប្រេង។ KrisEnergy ជាក្រុមហ៊ុនមានមូលដ្ឋាននៅប្រទេសសិង្ហបុរី បច្ចុប្បន្ននេះកំពុងអភិវឌ្ឍអណ្ដូងប្រេងអប្សរានៅប្លុក A។ ក្រុមហ៊ុននេះមានបំណងក្នុងការទាញយកតំណក់ប្រេងដំបូងនៅចុងឆ្នាំនេះ។ គេរំពឹងថានឹងអាចទាញយកប្រេងពីអណ្ដូងប្រេងនេះរហូតដល់ ៧ ៥០០ បារ៉ែលក្នុង ១ ថ្ងៃ។ នេះបើយោងតាមក្រុមហ៊ុន៕LA