ភ្នំពេញៈ រដ្ឋាភិបាលបានកំណត់ទិសដៅបង្កើនប្រាក់ចំណូលតាមរយៈការប្រមូលចំណូលពីពន្ធដារ និងគយជាង ២០ ភាគរយ នៅឆ្នាំក្រោយ ជាវិធានការមួយដើម្បីពង្រឹងឯករាជភាពរបស់ខ្លួន ដោយលើកកម្ពស់ការប្រមូលប្រាក់ចំណូល។
ច្បាប់ថវិកាឆ្នាំ ២០២០ បានបង្ហាញថា ការប្រមូលប្រាក់ចំណូលពីគយ និងរដ្ឋាករនឹងកើនឡើង ២៨,១ ភាគរយ រហូតដល់ ២,៨៧ ពាន់លានដុល្លារ ឬស្មើនឹង ១៧,៧២ ភាគរយ នៃផលិតផលក្នុងស្រុកសរុប (GDP) ខណៈចំណូលបានពីពន្ធដារនឹងកើនឡើង ២១,៣ ភាគរយ ដល់ជាង ២,៣៣ ពាន់លានដុល្លារស្មើនឹង ៧,៩៣ ភាគរយ នៃ GDP បើធៀបនឹងឆ្នាំ ២០១៩។
ច្បាប់ថវិកាជាតិបង្ហាញថា៖ «ជាមួយនឹងផែនការបង្កើនចំណូលនេះរដ្ឋាភិបាលនឹងមិនបង្កើតប្រភេទពន្ធថ្មី ឬបង្កើនអត្រាពន្ធពីអ្នកបង់ពន្ធទេ»។
រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុដែលបានឡើងការពារច្បាប់នេះនៅសភាដែលត្រូវបានអនុម័តកាលពីថ្ងៃអង្គារបានឲ្យដឹងថា សេដ្ឋកិច្ចរបស់កម្ពុជានៅតែរឹងមាំមានតម្រូវការសម្រាប់រដ្ឋាភិបាលក្នុងការចំណាយកាន់តែច្រើនដើម្បីទ្រទ្រង់សេដ្ឋកិច្ច ដោយការបន្តលើកកម្ពស់ប្រាក់ចំណូលក្នុងស្រុកតាមរយៈការប្រមូលពន្ធ។
លោកថ្លែងថា៖ «រដ្ឋាភិបាលកម្ពុជាសម្រេចបានលទ្ធផលល្អនៅក្នុងការគ្រប់គ្រងហិរញ្ញវត្ថុសាធារណៈ ដោយមានភាពល្អប្រសើរ និងស្ថិរភាពលើការប្រមូលពន្ធគ្រប់ប្រភេទតាមមធ្យោបាយប្រកបដោយប្រសិទ្ធភាព»។
លោកលើកឡើងថា៖ «នេះបង្ហាញពីភាពខ្លាំងនៃសេដ្ឋកិច្ចរបស់ប្រទេសកម្ពុជា ទោះបីជាសេដ្ឋកិច្ចពិភពលោកកំពុងប្រឈមនឹងហានិភ័យខ្លាំងជាងពីមុនក៏ដោយ។ ការបង្កើនការប្រមូលប្រាក់ចំណូលមិនគ្រាន់តែជួយក្នុងការលើកកម្ពស់ភាពឯករាជ្យថវិការបស់កម្ពុជា ប៉ុន្តែវាក៏ផ្ដល់សមត្ថភាពកាន់តែខ្លាំងសម្រាប់រដ្ឋាភិបាលផងដែរ»។
លោក គង់ វិបុល អគ្គនាយកនៃអគ្គនាយកដ្ឋានពន្ធដារបានប្រាប់ភ្នំពេញប៉ុស្ដិ៍កាលពីថ្ងៃព្រហស្បតិ៍ដោយយោងទៅលើរបាយការណ៍ចេញផ្សាយកាលពីខែតុលាថា កត្តាជំរុញដ៏សំខាន់នៃកំណើនប្រាក់ចំណូលក្នុងរយៈពេល ១ ឆ្នាំកន្លងមកគឺជាកិច្ចខិតខំប្រឹងប្រែងរបស់រដ្ឋាភិបាលក្នុងការអនុវត្តយុទ្ធសាស្ដ្រចតុកោណ និងយុទ្ធសាស្ដ្រកៀរគរប្រាក់ចំណូលដែលផ្ដោតលើការពង្រឹងការកែទម្រង់រដ្ឋបាលសារពើពន្ធ។
លោក វិបុល បានថ្លែងថា៖ «វិធានការបែបនោះ រួមមានការធ្វើទំនើបកម្មនៃមុខងារស្នូលរបស់រដ្ឋបាលពន្ធ និងគាំទ្ររបស់ GDT ដូចជាការដាក់ឲ្យប្រើប្រាស់ប្រព័ន្ធអេឡិចត្រូនិកអាករតម្លៃបន្ថែម»។
លោកបន្តថា រដ្ឋាភិបាលក៏កំពុងពង្រឹងរដ្ឋបាលពន្ធ និងធនធានមនុស្សផងដែរ ដែលទទួលយកបច្ចេកវិទ្យាព័ត៌មានក្នុងការរៀបចំការធ្វើសវនកម្ម និងការផ្សព្វផ្សាយពីវប្បធម៌ពន្ធចំពោះអ្នកជាប់ពន្ធ។
រូបិយវត្ថុអន្តរជាតិ (IMF) បានឲ្យដឹងក្នុងរបាយការណ៍ក្នុងបេសកកម្មខ្លីមួយស្តីពីកម្ពុជាកាលពីខែតុលាបង្ហាញថា ប្រតិបត្តិការប្រាក់ចំណូលដ៏រឹងមាំ និងកិច្ចខិតខំប្រឹងប្រែងរដ្ឋបាលដ៏រឹងមាំ ប្រាក់ចំណូលពន្ធបានកើនឡើងដល់ជិត ១៩ ភាគរយនៃ GDP ពីឆ្នាំ ២០១៨។
របាយការណ៍បន្តថា៖ «ការសម្លឹងឆ្ពោះទៅមុខការអនុវត្តដ៏រឹងមាំនៃយុទ្ធសាស្ដ្រកៀរគរប្រាក់ចំណូលថ្មីរបស់អាជ្ញាធរឆ្នាំ ២០១៩-២០២៣ គួរតែជួយទ្រទ្រង់កំណើនប្រាក់ចំណូលតាមរយៈគោលនយោបាយពន្ធ និងការកែទម្រង់រដ្ឋបាលប្រាក់ចំណូល»។
IMF បានឲ្យដឹងថា បំណុលសាធារណៈនៅមានកម្រិតទាបក្នុងចំនួន ២៨,៦ ភាគរយ នៃ GDP កាលពីឆ្នាំ ២០១៨ ហើយប្រទេសកម្ពុជាត្រូវបានរំពឹងថា នឹងរក្សាហានិភ័យកម្រិតទាបនៃបំណុល។
រដ្ឋាភិបាលបានប្រមូលប្រាក់ចំណូលប្រហែល ៤,៥៦ ពាន់លានដុល្លារ ពីគយ និងពន្ធដារក្នុងអំឡុងរយៈពេល ៩ ខែនៃឆ្នាំនេះ។
សេចក្ដីរាយការណ៍ពីអគ្គនាយកដ្ឋានពន្ធចេញផ្សាយកាលពីដើមខែតុលា បង្ហាញថា នាយកដ្ឋាននេះប្រមូលពន្ធបាន ២,១៨ ពាន់លានដុល្លារ ខណៈលោកនាយករដ្ឋមន្ដ្រី ហ៊ុន សែន បានប្រកាសកាលពីខែតុលាថា ពន្ធគយ និងរដ្ឋាករមានជាង ២,៣៨ ពាន់លានដុល្លារ ក្នុងរយៈពេលនេះ៕LA