.jpg)
ទឹកប្រាក់ចន្លោះ ៥០០-៦០០ លានដុល្លារនឹងត្រូវបញ្ចេញដើម្បីជួយគ្រឹះស្ថានហិរញ្ញវត្ថុឲ្យបន្ទាបអត្រាការប្រាក់។ ហុង មិនា
ភ្នំពេញៈ រដ្ឋាភិបាលកម្ពុជាគ្រោងនឹងបញ្ចេញប្រាក់ចន្លោះពី ៥០០ ទៅ ៦០០ លានដុល្លារ ជាកម្ចីមានអត្រាការប្រាក់ទាបដល់គ្រឹះស្ថានហិរញ្ញវត្ថុ (MI) ដើម្បីផ្ដល់ឲ្យពួកគេទាំងនោះនូវលទ្ធភាពក្នុងការផ្ដល់កម្ចីអត្រាការប្រាក់ទាបដល់ក្រុមហ៊ុនដែលជាអតិថិជនរបស់ខ្លួន។
លោកនាយករដ្ឋមន្ដ្រី ហ៊ុន សែន បានឲ្យដឹងកាលពីថ្ងៃចន្ទក្នុងសន្និសីទព័ត៌មានមួយនៅរដ្ឋសភាជាតិថា រដ្ឋាភិបាលកំពុងពិចារណាយកប្រាក់សន្សំដើម្បីបញ្ចេញកម្ចីដល់ធនាគារសម្រាប់ ជួយក្រុមហ៊ុនដែលត្រូវទទួលរងផលប៉ះពាល់ដោយសារកូវីដ ១៩។
លោកបានថ្លែងថា៖ «យើងកំពុងវាយតម្លៃអំពីលទ្ធភាពរបស់រដ្ឋាភិបាលក្នុងការបញ្ចេញមូលធនពីការសន្សំចន្លោះពី ៥០០ ទៅ ៦០០ លានដុល្លារដល់ធនាគារ ដោយមានអត្រាការប្រាក់ទាបដែលអាចឲ្យពួកគេផ្ដល់កម្ចីដល់ម្ចាស់អាជីវកម្មដោយមានអត្រាការប្រាក់ទាបផងដែរ»។ លោកបន្តថា៖ «យើងនឹងប្រកាសវានៅជុំទី ២ ឬទី ៣ អំពីការបញ្ចេញទុនរបស់រដ្ឋាភិបាល ខណៈយើងបានធ្វើរួចហើយនៅជុំដំបូង»។
លោកបន្ថែមថា៖ «រដ្ឋមិនអាចផ្ដល់កម្ចីដោយត្រង់ដល់ក្រុមហ៊ុនប្រជាជនទាំងនោះបានទេ ដូច្នេះយើងអាចផ្ដល់កម្ចីនេះដល់ធនាគារពាណិជ្ជ ដោយមានអត្រាការប្រាក់ទាប»។
លោក សាយ សូនី អនុប្រធានប្រតិបត្តិគ្រឹះស្ថានមីក្រូហិរញ្ញវត្ថុប្រាសាក់បានស្វាគមន៍វិធានការដោយរដ្ឋាភិបាលដោះស្រាយការធ្លាក់ចុះអាជីវកម្មនៅពេលបច្ចុប្បន្នចំពេលផលប៉ះពាល់ដោយសារកូវីដ១៩។
លោកលើកឡើងថា៖ «វាជាការធ្វើអន្តរាគមន៍របស់រដ្ឋាភិបាល ដើម្បីគាំទ្រវិស័យធនាគារ ខណៈយើងត្រូវតែបន្តអាជីវកម្មផ្ដល់កម្ចីរបស់យើង ហើយវានឹងអាចឲ្យអតិថិជនរបស់យើងមានលទ្ធភាពក្នុងការទទួលបានសេវាហិរញ្ញវត្ថុ ដើម្បីចាប់ផ្ដើមជាថ្មីនូវសកម្មភាពអាជីវកម្មរបស់ពួកគេនៅពេលស្ថានការណ៍ត្រឡប់ទៅរកភាពធម្មតាវិញ»។
លោកបញ្ជាក់ថា៖ «ដើម្បីគាំទ្រគំនិតផ្តួចផ្ដើមរបស់រដ្ឋាភិបាល យើងនឹងដាក់ពាក្យសុំកម្ចីនេះដើម្បីធ្វើពិពិធកម្មប្រភពមូលធនរបស់យើងដែលមានស្រាប់ ដើម្បីគាំទ្រអាជីវកម្មអតិថិជនរបស់យើង»។
ធនាគារជាតិនៃកម្ពុជា (NBC) កាលពីថ្ងៃសុក្របានចេញសារាចរណែនាំមួយដល់ធនាគារ និងគ្រឹះស្ថានហិរញ្ញវត្ថុទាំងអស់ស្ដីពី «ឥណទានឡើងវិញ» សម្រាប់កម្ចីនៅក្នុងវិស័យអាទិភាព ៤ ក្នុងគោលបំណងដើម្បីរក្សាស្ថិរភាពហិរញ្ញវត្ថុ គាំទ្រដល់សកម្មភាពសេដ្ឋកិច្ច និងបន្ទូរបន្ថយបន្ទុកលើអ្នកជំពាក់បំណុលដែលប្រឈមការធ្លាក់ចុះប្រាក់ចំណូលក្នុងអំឡុងការរីករាលដាលកូវីដ ១៩។
វិស័យអាទិភាពទាំង ៤ នេះដែលបានលើកឡើងដោយ NBC គឺទេសចរណ៍ (រួមមានស្បៀងអាហារ និងភេសជ្ជៈព្រមទាំងសេវាគាំទ្រផ្សេងទៀត) កាត់ដេរ (រួមទាំងបុគ្គលិក) សំណង់ (មិនរាប់បញ្ចូលការសាងសង់ផ្ទះលើកដំបូង ហាង និងកម្ចីទិញផ្ទះលើកដំបូង) និងដឹកជញ្ជូន (ជាពិសេសអ្នកបើកបររថយន្តឈ្នួល និងអ្នកបើកបររ៉ឺម៉កកង់៣) និងឡូជីស្ទិក។
NBC បានកំណត់ «ឥណទានឡើងវិញ» ជាការកែប្រែលក្ខខណ្ឌនៃកិច្ចព្រមព្រៀងឥណទានដើមដែលផ្ដល់លក្ខខណ្ឌកាន់តែអនុគ្រោះសម្រាប់អតិថិជនដែលកំពុងជួបការពិបាកហិរញ្ញវត្ថុពិតប្រាកដ៕LA
