.jpg)
រដ្ឋាភិបាលនឹងអនុវត្តការបញ្ចុះអត្រាអាករពិសេស ទៅលើទំនិញរថយន្តចាប់ពីខែមីនា បន្ទាប់ពីចំណូលពីការនាំចូលរថយន្តធ្លាក់ចុះ ៤០ ភាគរយក្នុងឆ្នាំ ២០២០។ ហេង ជីវ័ន
ភ្នំពេញៈ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានស្នើសុំកែសម្រួលបញ្ចុះអត្រាអាករពិសេសលើការនាំចូលទំនិញរថយន្ត ដើម្បីស្តារទីផ្សារ និងគាំទ្រដល់វិស័យឡូជីស្ទិក បន្ទាប់ពីចំណូលពីការនាំចូលរថយន្តធ្លាក់ចុះ ៤០ ភាគរយក្នុងឆ្នាំ ២០២០។
តាមលិខិតរបស់លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចផ្ញើជូនប្រមុខរាជរដ្ឋាភិបាលបានអះអាងថា ចំណូលពន្ធគយបានពីអាករពិសេសនៃការនាំចូលរថយន្តនឹងអាចបាត់បង់ប្រមាណ ៣០,២៦ លានដុល្លារក្នុង ១ ឆ្នាំ ប៉ុន្តែក្រសួងរំពឹងថាការប្រែប្រួលការបញ្ចុះអត្រាអាករពិសេសនេះអាចនឹងទាក់ទាញតម្រូវការប្រើប្រាស់រថយន្តកើនឡើងលើសឆ្នាំ ២០២០ ដែលនាំទៅដល់ការកើនឡើងចំណូលពន្ធគយវិញ។
លិខិតនេះអះអាងថា ការកែសម្រួលអត្រាអាករពិសេសនឹងអនុវត្តចាប់ពីថ្ងៃទី ១ ខែមីនា ឆ្នាំ ២០២១ តទៅ។
លោកនាយករដ្ឋមន្ត្រី ហ៊ុន សែន កាលពីថ្ងៃទី ៤ ខែកុម្ភៈ ឆ្នាំនេះបានចុះហត្ថលេខាយល់ព្រមតាមសំណើរបស់លោកអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុលើលិខិតស្នើសុំកែសម្រួលបញ្ចុះអត្រាអាករពិសេសលើមុខទំនិញរថយន្តដើម្បីស្តារទីផ្សារ និងគាំទ្រដល់វិស័យដឹកជញ្ជូន ក៏ដូចជា ការការពារបរិស្ថាន។
លិខិតនេះបញ្ជាក់ថា សំណើរបស់ក្រសួងសេដ្ឋកិច្ច និងហិរញ្ញវត្ថុស្នើសុំបញ្ចុះអត្រាអាករពិសេស ១០ ពិន្ទុភាគរយចំពោះរថយន្តគ្រួសារដែលមានទំហំស៊ីឡាំងមិនលើស ៣ ០០០cc (ពី ៣០ មក ២០ ភាគរយ និងពី ៦០ មក ៥០ ភាគរយ) ព្រមទាំងបញ្ចុះអត្រាអាករពិសេស ១៥ ពិន្ទុភាគរយចំពោះប្រភេទទំហំស៊ីឡាំងលើស ៣ ០០០cc (ពី ៦៥ មក ៥០ ភាគរយ និងពី ៧០ ភាគរយ មក ៥៥ ភាគរយ)។
លិខិតនេះឱ្យដឹងទៀតថា ចំពោះរថយន្តប្រើអគ្គិសនីសុទ្ធ (រថយន្តគ្រួសារ និងរថយន្តដឹកអ្នកដំណើរ) ក្រសួងស្នើសុំបញ្ចុះអាករពិសេស ២០ ពិន្ទុភាគរយ (ពី ៣០ មក ១០ ភាគរយ) ដើម្បីកាត់បន្ថយចំណាយ និងជួយការពារបរិស្ថាន។
ដោយឡែករថយន្តដឹកទំនិញនឹងបញ្ចុះអត្រាអាករពិសេស ១៥ ពិន្ទុភាគរយ (ពី ៤០ មក ២៥ ភាគរយ) ចំពោះរថយន្តសណ្តោងសឺមីរ៉ឺម៉កព្រមទាំងបញ្ចុះអត្រាអាករពិសេស ១០ ពិន្ទុភាគរយ (ពី ៤០ មក ៣០ ភាគរយ) សម្រាប់រថយន្តដឹកទំនិញប្រភេទដែលមានទម្ងន់ (ទម្ងន់រថយន្ត និងទម្ងន់ផ្ទុក) លើសពី ៥ តោន។ ក្រសួងបានពន្យល់ថា ការបញ្ចុះអត្រាអាករពិសេសលើរថយន្តដឹកទំនិញនេះនឹងរួមចំណែកក្នុងការកាត់បន្ថយចំណាយឡូជីស្ទិក។
ចំពោះរថយន្តបែន រថយន្តស្ទូច និងរថយន្តឯកទេសផ្សេងទៀតនឹងបញ្ចុះអត្រាអាករពិសេស ១០ ពិន្ទុភាគរយ (ពី ៤០ មក ៣០ ភាគរយ) ដើម្បីជួយដល់វិស័យកសាងហេដ្ឋារចនាសម្ព័ន្ធរូបវន្ត និងឡូជីស្ទិក។
«ក្រសួងនេះរំពឹងថា ការកែសម្រួលបញ្ចុះអត្រាអាករពិសេសនេះអាចនឹងទាក់ទាញតម្រូវការប្រើប្រាស់រថយន្តកើនលើសឆ្នាំ ២០២០ ដែលនាំឱ្យចំណូលពន្ធអាករកើនឡើងបំពេញនូវការបាត់បង់នេះវិញ»។
លិខិតនេះបានឱ្យដឹងទៀតថា ការធ្លាក់ចុះយ៉ាងគំហុកនៃចំណូលមុខទំនិញរថយន្ត និងការងើបឡើងវិញយឺតៗនៃកំណើនសេដ្ឋកិច្ចក្នុងអំឡុងពេល និងក្រោយពេលការរាតត្បាតកូវីដ១៩ បានក្លាយជាក្តីបារម្ភ និងជាបញ្ហាប្រឈមដ៏សំខាន់នៃការប្រមូលចំណូលគយ។
លោក ស៊ិន ចន្ធី ប្រធានសមាគមឡូជីស្ទិកកម្ពុជាបានស្វាគមន៍ចំពោះព័ត៌មាននេះ។
លោកបានប្រាប់ភ្នំពេញ ប៉ុស្តិ៍ថា៖ «ខ្ញុំសប្បាយរីករាយណាស់ចំពោះរដ្ឋាភិបាលបានធ្វើការអនុគ្រោះពន្ធនេះនឹងជួយកាត់បន្ថយចំណាយលើការបង់ពន្ធគយ។ ខ្ញុំជឿថា ក្រុមហ៊ុនទាំងអស់នៅក្នុងវិស័យឡូជីស្ទិកនឹងបង្កើនការនាំចូលរថយន្តដឹកទំនិញបន្ថែមទៀត ដើម្បីបំពេញការខ្វះខាតរថយន្តដឹកទំនិញ»។
លោក គង់ រតនៈ អ្នកជំនាញផ្នែកសុវត្ថិភាពចរាចរណ៍បាននិយាយថា ការបន្ធូរបន្ថយពន្ធនាំចូលរថយន្តនឹងផ្តល់ឱកាសឱ្យប្រជាពលរដ្ឋមានលទ្ធភាពប្រើប្រាស់រថយន្តកាន់តែច្រើន ប៉ុន្តែការបន្ធូរបន្ថយពន្ធគួរតែធ្វើសម្រាប់រថយន្តថ្មី ព្រោះវាមានប្រព័ន្ធសុវត្ថិភាពខ្ពស់ ជួយសន្សំថវិកា និងជួយដល់បរិស្ថាន។
លោកថ្លែងថា៖ «ខ្ញុំលើកទឹកចិត្ត និងគាំទ្រសម្រាប់ការបញ្ចុះពន្ធនាំចូលរថយន្តថ្មី។ ការបញ្ចុះពន្ធរថយន្តចាស់ៗ វាដូចជា យើងនាំចូលអេតចាយមកក្នុងប្រទេសដែលមិនសូវមានសុវត្ថិភាព ហើយបើយើងគិតតែការបង្កើនពន្ធតែ ១ មុខសម្រាប់ខ្ញុំគិតថានឹងមិនល្អនោះទេ»។
ទីក្រុងភ្នំពេញហាក់ប្រឈមបញ្ហាកកស្ទះចរាចរណ៍ខ្លាំងនៅពេលម៉ោងមមាញឹក ប៉ុន្តែសម្រាប់លោក រតនៈ បញ្ហានេះគេអាចដោះស្រាយបានតាមរយៈការរឹតបន្តឹងច្បាប់ចរាចរណ៍ ឥរិយាបថអ្នកបើកបរ និងកែសម្រួលរចនាសម្ព័ន្ធផ្លូវថ្នល់។
អគ្គនាយកដ្ឋានគយ និងរដ្ឋាករកម្ពុជាកាលពីឆ្នាំ ២០២០ ប្រមូលចំណូលបាន ២ ៤១៩,៦ លានដុល្លារ ស្មើ ៨៣,៥ ភាគរយនៃផែនការ ធ្លាក់ ៧៩៥,៥ លានដុល្លារ ឬ ២៤,៨ ភាគរយធៀបនឹងឆ្នាំ ២០១៩ ក្នុងនោះមុខទំនិញរថយន្តដែលជាប្រភពចំណូលគយដ៏សំខាន់ថយចុះ ៤០ ភាគរយ។ នេះបើយោងតាមលិខិតនោះ៕LA
