ភ្នំពេញ៖ ក្រសួងពាណិជ្ជកម្មបានជូនដំណឹងដល់ផលិតករ និងអ្នកនាំចេញនៅតែបន្តទទួលពាក្យស្នើសុំវិញ្ញាបនបត្របញ្ជាក់ដើមកំណើតទំនិញសម្រាប់ការនាំចេញទៅទីផ្សារអន្តរជាតិស្របពេលអ្នកនាំចេញប្រឈមនឹងបញ្ហាដឹកជញ្ជូនទំនិញទៅកាន់កំពង់ផែ ដើម្បីនាំចេញទៅកាន់ទីផ្សារអន្តរជាតិ។
សេចក្តីជូនដំណឹងរបស់ក្រសួងពាណិជ្ជកម្មបានផ្សាយកាលពីថ្ងៃទី ២០ ខែមេសា បានឲ្យដឹងថា ដើម្បីធានានិរន្តរភាពនៃការផ្តល់សេវាសាធារណៈ ក្រសួងបានចាត់តាំងមន្ត្រីតាមគោលការណ៍ណែនាំរបស់រាជរដ្ឋាភិបាលឱ្យប្រចាំការក្នុងការផ្តល់វិញ្ញាបនបត្របញ្ជាក់ដើមកំណើតទំនិញ (CO) សម្រាប់ការនាំចេញទំនិញទៅបរទេសជាប្រក្រតី។
សេចក្តីជូនដំណឹង៖ «សូមផលិតករ ឬអ្នកនាំចេញ បន្តដាក់ពាក្យស្នើសុំវិញ្ញាបនបត្របញ្ជាក់ដើមកំណើតទំនិញតាមប្រព័ន្ធស្វ័យប្រវត្តកម្ម «co.moc.gov.kh»។
កញ្ញា ថូង ធីតា នាយិកាគ្រប់គ្រងក្រុមហ៊ុន ថូងត្រេឌីង ឯ.ក ដែលជាក្រុមហ៊ុនកែច្នែអំបិលកំពតកែបប្រាប់ ភ្នំពេញ ប៉ុស្តិ៍ កាលពីថ្ងៃអង្គារថា បើទោះជាការផ្តល់ CO នៅតែប្រព្រឹត្តទៅជាប្រក្រតី ប៉ុន្តែក្រុមហ៊ុនរបស់កញ្ញាកំពុងតែប្រឈមនឹងបញ្ហាដឹកជញ្ជូនទំនិញទៅកាន់កំពង់ផែសម្រាប់នាំចេញ។ ជាក់ស្តែង ក្រុមហ៊ុនរបស់កញ្ញាបានសម្រេចផ្អាកជាបណ្តោះអាសន្នការនាំចេញទំនិញមួយផ្នែកដោយសារបញ្ហាឡូជីស្ទីក។
កញ្ញានិយាយថា៖ «តាមពិតទៅក្នុងអំឡុងពេលបិទខ្ទប់នេះ ការនាំចេញរបស់យើងមួយចំនួនត្រូវបានផ្អាកនៅផ្នែកពួកខ្ញុំដោយសារយើងជួបបញ្ហាដឹកជញ្ជូន ព្រមទាំងភ្ញៀវយើងមួយចំនួននៅក្នុងប្រទេសគាត់ក៏កំពុងបិទដែរ។ យើងកំពុងសិក្សាគ្នាថា តើមានវិធីអ្វីផ្សេងអាចសម្រួលដល់បញ្ហាទាំងអស់នេះឬទេ»។
កញ្ញាបន្ថែមថា៖ «ការផ្តល់ CO នៅតែដំណើរការបានជាធម្មតា ប៉ុន្តែក្នុងអំឡុងពេលបិទខ្ទប់នេះ ថាតើបញ្ហាដឹកជញ្ជូន និងដំណើរការឯកសារផ្សេងៗសម្រួលដល់ការដឹកជញ្ជូននឹងបង្កភាពងាយស្រួលដែរឬទេ?»។
សហព័ន្ធ ស្រូវ អង្ករ កម្ពុជា (CRF) បានឲ្យដឹងថា ក្នុអំឡុងពេលបិទខ្ទប់នេះ បានបណ្តាលឱ្យប៉ះពាល់ដល់វិស័យស្រូវ អង្ករ និងដឹកជញ្ចូនដឹកទំនិញ ដែលមិនអាចដំណើរការរោងម៉ាស៊ីនកិនស្រូវ និងការដឹកអង្ករឆ្លងកាត់ទីក្រុង ក៏ដូចជាពី ខេត្តទៅកំពង់ផែបានទេ។
សេចក្តីអំពាវនាវរបស់ CRF បន្តថា ជាមួយគ្នានេះ សមាជិករបស់សហព័ន្ធនេះមួយចំនួនដែលមិនមានទីតាំងនៅតំបន់បិទខ្ទប់ក៏រងផលប៉ះពាល់ផងដែរ ដោយសារបុគ្គលិករបស់ខ្លួនរស់នៅក្នុងរាជធានីភ្នំពេញ និងក្រុងតាខ្មៅ មិនអាចធ្វើដំណើរទៅបំពេញការងារបាន។
CRF ឲ្យដឹងថា «ក្រុមហ៊ុនទាំងនេះមិនអាចធ្វើប្រតិបត្តិការធម្មតាបានទេ ដូនេះអាចពន្យារពេលផលិតកម្ម ក៏ដូចជា មិនអាចសម្រេចបានតាមកាលវិភាគដឹកជញ្ជូនដែលបានព្រមព្រៀងគ្នានាពេលកន្លងមក។ យើងសូមអំពាវនាវឱ្យមានការយោគយល់ និងជួយរៀបចំឲ្យមានការសម្របសម្រួលនៅក្នុងស្ថានភាពពិសេសនេះ»។
CRF បន្ថែមថា «យើងទាំងអស់គ្នាត្រូវសហការ និងគោរពតាមការណែនាំរបស់រាជរដ្ឋាភិបាលកម្ពុជា និងរួមគ្នា ដើម្បីប្រយុទ្ធប្រឆាំងការរាតត្បាតនៃជំងឺកូវីដ១៩។ យើងសូមជំរុញអ្នកទាំងអស់គ្នាកុំដាក់ទណ្ឌកម្មសមាជិករបស់យើងចំពោះស្ថានភាពនេះហួសពីការគ្រប់គ្រងរបស់យើង»។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញ (Logistics Business Association) កត់សម្គាល់ថា ក្នុងអំឡុងពេលបិទខ្ទប់នេះ មានការកកស្ទះរថយន្តដឹកទំនិញខ្លាំង ពិសេសនៅតាមព្រំដែនបាវិត ក៏ដូចជា ច្រកព្រំដែនអន្តរជាតិផ្សេងៗទៀត ប៉ុន្តែទំនិញអាទិភាពទាក់ទងនឹងម្ហូបអាហារ ទំនិញឧបភោគបរិភោគដែលផ្គត់ផ្គង់ឲ្យប្រជាពលរដ្ឋត្រូវបានអនុញ្ញាតឲ្យចូលបាន។
ដូន្នេះមានការកកស្ទះយ៉ាងខ្លាំងនៅខណ្ឌកំបូល និងផ្លូវពីខេត្តកណ្តាល ត្រូវឆ្លងកាត់មកទីក្រុងភ្នំពេញទាំងអស់បានប៉ះពាល់ខ្លាំងទៅលើវិស័យសេដ្ឋកិច្ចដែលបណ្តាលមកពីផ្ទុះឡើងនៃព្រឹត្តិការណ៍សហគមន៍ ២០ កុម្ភៈ។ យើងទទួលបានព័ត៌មានថា កាលពីអាទិត្យយើងបានរំដោះទំនិញបានមួយចំនួនត្រូវបានសមត្ថកិច្ចគាត់បានអនុញ្ញាតឲ្យទំនិញដឹកចេញចូល។ ខ្ញុំគិតថា ភាពកកស្ទះនៃទំនិញរបស់រោងចក្រ និងទំនិញមួយចំនួនទៀតនឹងត្រូវបានអនុញ្ញាតឲ្យឆ្លងកាត់»។
លោក វ៉ា ស៊ឹមសុរិយា អ្នកនាំពាក្យក្រសួងសាធារណការ និងដឹកជញ្ជូន បានណែនាំឲ្យក្រុមហ៊ុនដឹកជញ្ជូនគោរពតាមសេចក្តីសម្រេចនៃអនុក្រឹត្យថ្មីរបស់រដ្ឋាភិបាលក្នុងការចូលរួមទប់ស្កាត់ការរីករាលដាលជំងឺកូវីដ ១៩។
លោកមានប្រសាសន៍ថា៖ «ពិតជាមានការកកស្ទះទំនិញមែន តែយើងបានជួបពិភាក្សាគ្នាដោយសម្រេចអនុវត្តតាមអនុក្រឹត្យថ្មីដោយតម្រូវឲ្យមានការសុំច្បាប់ឆ្លងកាត់ដែលរដ្ឋបាលរាជធានី-ខេត្ត ជាអ្នកអនុញ្ញាតចេញច្បាប់នេះ»៕