ភ្នំពេញៈ ក្រសួងពាណិជ្ជកម្មតាមរយៈក្រុមហ៊ុន ហ្គ្រីន ត្រេដ បានបញ្ចេញលក់អង្ករបានចំនួន ១ ២៤១ បេ និងមីជាតិចំនួន ៤ ៦២០ កេសដល់ប្រជាជនក្នុងតំបន់បិទខ្ទប់ (តំបន់ក្រហម) គិតចាប់ពីថ្ងៃទី ១៥ ដល់ ១៩ ខែមេសាកន្លងមកនេះ។
ក្រសួងពាណិជ្ជកម្មឲ្យដឹងទៀតថា ក្រៅពីនេះ ក្រសួងក៏លក់ទឹកត្រីចំនួន ១ ១៥៣ យួរ ទឹកស៊ីអ៊ីវ ៧៨៥ យួរ ត្រីខ ១ ៦២៧ យួរ ទឹកសុទ្ធ ១៤០យួរ ព្រមទាំងបន្លែ ១១៥ គីឡូក្រាម សាច់ក្រក ១៣ គីឡូក្រាម និងឆាយប៉ូវ ៣៥៦ ថង់។
ការបញ្ចេញរថយន្តចល័តលក់គ្រឿងឧបភោគបរិភោគ ដើម្បីរក្សាលំនឹងតម្លៃទំនិញនៅលើទីផ្សារ និងសម្រួលដល់ប្រជាពលរដ្ឋទទួលបានម្ហូបអាហារក្នុងអំឡុងពេលបិទខ្ទប់។ រាល់ទំនិញទាំងអស់របស់ក្រសួងពាណិជ្ជកម្មលក់ក្រោមតម្លៃទីផ្សារ។
ក្រៅពីរថយន្តចល័ត ក្រសួងក៏បានដំឡើងស្តង់ទំនិញចំនួន ១១ ស្តង់បន្ថែមទៀតសម្រាប់លក់គ្រឿងឧបភោគបរិភោគចាំបាច់ដល់ប្រជាពលរដ្ឋ។
ស្តង់ទាំងនោះស្ថិតក្នុងខណ្ឌមានជ័យចំនួន ៣ ទីតាំងគឺក្នុងភូមិស្ទឹងមានជ័យចាស់ សង្កាត់ស្ទឹងមានជ័យទី១ទល់មុខស្ថានីយប្រេងឥន្ធនៈ PTT ភូមិដំណាក់ធំ២ សង្កាត់ស្ទឹងមានជ័យទី១ (ទល់មុខសាលា CUS) និងភូមិដំណាក់ធំ៥ សង្កាត់ស្ទឹងមានជ័យទី៣ (ទល់មុខកងរាជអាវុធហត្ថ) ភូមិដំណាក់ធំ៥ សង្កាត់ស្ទឹងមានជ័យទី៣។
ចំពោះទីតាំងស្តង់ក្នុងខណ្ឌពោធិ៍សែនជ័យមានចំនួន ៤ រួមមាន ភូមិត្រពាំងថ្លឹង២ សង្កាត់ចោមចៅ១ (ទល់មុខ K-Mall) ភូមិត្រពាំងថ្លឹង២ សង្កាត់ចោមចៅ១ (ទល់មុខផ្សារឯករាជ្យ១) ភូមិត្រពាំងថ្លឹង៤ សង្កាត់ចោមចៅ១ (ទល់មុខផ្សារត្រពាំងថ្លឹង) និងទីតាំងក្នុងភូមិត្រពាំងថ្លឹង៣ សង្កាត់ចោមចៅ។
ចំណែក ទីតាំងនៅក្នុងខណ្ឌសែនសុខមានចំនួន ៣ ទីតាំង ដូចជា ភូមិគោកឃ្លាង សង្កាត់គោកឃ្លាង (ទល់មុខផ្សារបឹងឈូក) ភូមិសំរោង សង្កាត់ឈ្មួញ (ទល់មុខហ្គ្រេនភ្នំពេញ) ភូមិទឹកថ្លា សង្កាត់ទឹកថ្លា (មជ្ឈមណ្ឌល Water Park ) ព្រមទាំង ១ ទីតាំងក្នុងខណ្ឌទួលគោក ស្ថិតនៅភូមិ១២ សង្កាត់បឹងសាឡាង៕