.jpg)
ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ៦ ដែលមានទុនវិនិយោគសរុប ១០៦,៣ លានដុល្លារ និងបង្កើតឱកាសការងារចំនួន ១ ៨៥២ កន្លែង។ ហុង មិនា
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគចំនួន ៦ បន្ថែមទៀតនៅថ្ងៃទី ៥ ខែឧសភានេះ ដែលមានទុនវិនិយោគសរុប ១០៦,៣ លានដុល្លារ និងបង្កើតឱកាសការងារចំនួន ១ ៨៥២ កន្លែង។
យោងតាមសេចក្តីប្រកាសព័ត៌មាន CDC គម្រោងទាំងនោះ រួមមានគម្រោងសាងសង់ និងអាជីវកម្មសណ្ឋាគារថ្នាក់ផ្កាយ ៥ ចំនួន ១៩៥ បន្ទប់របស់ក្រុមហ៊ុន Jin Bei Palace Co., Ltd នៅភូមិ ៤ សង្កាត់លេខ ៤ ក្រុងព្រះសីហនុ ខេត្តព្រះសីហនុមានទុនវិនិយោគ ៤៨,៧ លានដុល្លារ និងបង្កើតការងារចំនួន ៣៨០ កន្លែង។
គម្រោងបង្កើតរោងចក្រផ្គុំដំឡើងគ្រឿងអេឡិចត្រូនិកគ្រប់ប្រភេទ គ្រឿងបន្លាស់អេឡិចត្រូនិក ម៉ាស់អេឡិចត្រូនិក និងឧបករណ៍បន្សុទ្ធខ្យល់ គ្រប់ប្រភេទរបស់ក្រុមហ៊ុន Kuantech (Cambodia) International Co., Ltd ស្ថិតនៅឃុំពពេល ស្រុកត្រាំកក់ ខេត្តតាកែវ មានទុនវិនិយោគ ២៩,៧ លានដុល្លារ និងបង្កើតការងារចំនួន ៦២៨ កន្លែង។
គម្រោងបង្កើតរោងចក្រផលិតឱសថរបស់ក្រុមហ៊ុន SantelysPharmaceutical Co., Ltd ស្ថិតនៅឃុំសន្លុង ស្រុកខ្សាច់កណ្តាល ខេត្តកណ្តាល មានទុនវិនិយោគ ១២,៥ លានដុល្លារ និងបង្កើតការងារបានចំនួន ២១៥ កន្លែង។
គម្រោងបង្កើតរោងចក្រផលិតបំពង់ទីប ទុយោជ័រ និងបរិក្ខារបំពង់ជ័រ (PVC pipe fittings) គ្រប់ប្រភេទដោយក្រុមហ៊ុន Lesso (Cambodia) Trading Co., Ltd ស្ថិតនៅឃុំឆក់ឈើនាង ស្រុកអង្គស្នួល ខេត្តកណ្តាលជាមួយនឹងទុនវិនិយោគ ៩,៤ លានដុល្លារ និងបង្កើតការងារបានចំនួន ២០១ កន្លែង។
គម្រោងបង្កើតរោងចក្រកែច្នៃម្ហូបអាហាររបស់ក្រុមហ៊ុន YiankangBiological Technology Co., Ltd ស្ថិតនៅឃុំទំនប់រលក ស្រុកស្ទឹងហាវ ខេត្តព្រះសីហនុ មានទុនវិនិយោគ ២,៩ លានដុល្លារ និងបង្កើតការងារចំនួន ២១០ កន្លែង។
គម្រោងវិនិយោគលើរោងចក្របោកគក់ជ្រលក់ពណ៌ និងបោះពុម្ពរបស់ក្រុមហ៊ុន Ocean Treasure Dyeing &Printing Co., Ltd ស្ថិតនៅឃុំព្រះនិព្វាន្ត ស្រុកគងពិសី ខេត្តកំពង់ស្ពឺ មានទុនវិនិយោគ ៣,១ លានដុល្លារ និងបង្កើតការងារចំនួន ២១៨ កន្លែង។
អ្នកស្រាវជ្រាវសេដ្ឋកិច្ចអន្តរជាតិវិទ្យាស្ថានទំនាក់ទំនងអន្តរជាតិនៃកម្ពុជានៃរាជបណ្ឌិត្យសភាកម្ពុជាលោក ហុង វណ្ណៈ បានប្រាប់ ភ្នំពេញ ប៉ុស្តិ៍កាលពីខែមុនថាការចូលមកវិនិយោគផ្ទាល់នៅកម្ពុជានឹងផ្តល់អត្ថប្រយោជន៍យ៉ាងច្រើនសម្រាប់សេដ្ឋកិច្ច និងសង្គម។
លោក ហុង វណ្ណៈ ឲ្យដឹងទៀតថា CDC បានអនុម័តគម្រោងភាគច្រើនលើផលិតផលវាយនភណ្ឌ និងសម្ភារធ្វើដំណើរតែប៉ុណ្ណោះ ដែលផលិតផលទាំងនេះមានទីផ្សារធំនៅបណ្តាប្រទេសក្នុងសហភាពអឺរ៉ុប អាមេរិក និងកាណាដាជាដើម។
លោក ហុង វណ្ណ កត់សម្គាល់ថា៖ «កម្ពុជានឹងមានឱកាសទាក់ទាញវិនិយោគិនពីបរទេស និងឱកាសទទួលបានកំណើននៃការបណ្តាក់ទុនកាន់តែច្រើននៅពេលអនាគតតាមរយៈសក្តានុពលទីតាំងភូមិសាស្ត្រ ច្បាប់វិនិយោគ ទំនាក់ទំនងការទូត និងការបង្កើតបាននូវកិច្ចព្រមព្រៀងពាណិជ្ជកម្មសេរីទ្វេភាគីនានារបស់កម្ពុជា»។
កាលពីឆ្នាំ ២០២០ មានគម្រោងចំនួន ២៣៨ ដែលមានតម្លៃវិនិយោគសរុប ៨,២ ពាន់លានដុល្លារត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័ត ដោយតម្លៃទុនវិនិយោគនេះ គឺធ្លាក់ចុះ ១២ ភាគរយ បើធៀបនឹងឆ្នាំ ២០១៩៕
