.jpg)
ទីក្រុងវ៉ាសូវីៈ ប្រទេសប៉ូឡូញបានរំកិលខ្លួនកាន់តែកៀកទៅនឹងការបញ្ចប់ការពឹងផ្អែកដ៏ខ្លាំងលើធ្យូងថ្ម ពេលរដ្ឋាភិបាល និងសហជីពជីករ៉ែបានឯកភាពគ្នាលើផែនការជាប្រវត្តិសាស្ត្រ ដើម្បីបញ្ចប់ជាបណ្តើរៗនូវការយករ៉ែនេះត្រឹមឆ្នាំ ២០៤៩។
ការយល់ព្រមនេះបានដាក់ប្រទេសប៉ូឡូញនៅលើផ្លូវឆ្ពោះទៅរកទិសដៅអាកាសធាតុរបស់សហភាពអឺរ៉ុប។
រដ្ឋាភិបាលទីក្រុងវ៉ាសូវីបានបដិសេធកាលពីលើកមុននូវទិសដៅរបស់សហភាពអឺរ៉ុបដែលមានស្រាប់នៃការដាក់កម្រិតការបំភាយឧស្ម័នកាបូនិចកម្រិត «សូន្យ» ត្រឹមឆ្នាំ ២០៥០ ដោយតវ៉ាថាខ្លួនត្រូវការពេលច្រើនទៀតដើម្បីផ្លាស់ប្តូរ។
រដ្ឋាភិបាលប៉ូឡូញបានបង្ហាញក្តីបារម្ភកាលពីសប្តាហ៍កន្លងទៅជុំវិញសំណើរបស់ប្រធានសហភាពអឺរ៉ុបលោកស្រី Ursula von der Leyen ដែលបានលើកឡើងនូវគោលដៅឆ្នាំ ២០៣០ របស់តំបន់នេះ សម្រាប់ការកាត់បន្ថយការបំភាយឧស្ម័នផ្ទះកញ្ចក់ពី ៤០ ទៅ ៥៥ ភាគរយ។
ការពឹងផ្អែកលើធ្យូងថ្មចំនួន ៨០ ភាគរយនៃតម្រូវការថាមពលសរុបប្រទេសប៉ូឡូញជាប់ចំណាត់ថ្នាក់ក្នុងចំណោមសមាជិកអឺរ៉ុបដែលពឹងផ្អែកខ្លាំងលើឥន្ធនៈហ្វូស៊ីល និងនៅតែមានអ្នកជីករ៉ែធ្យូងថ្ម ៨០ ០០០ នាក់ដែលព្រួយបារម្ភចំពោះជីវភាពរបស់ពួកគេ។
ប៉ុន្តែសហជីពរបស់ពួកគេបានយល់ព្រមចំពោះផែនការរបស់រដ្ឋាភិបាលដែលមើលឃើញវិស័យធ្យូងថ្មរស់រានទៅបានដោយអាស្រ័យលើការឧបត្ថម្ភធន រហូតដល់ឆ្នាំ ២០៤៩ ជាពេលដែលរ៉ែនេះត្រូវបានបិទទាំងស្រុង។
លោក Dominik Kolorz ប្រធាននៃសហជីពសាមគ្គីអ្នកជីកធ្យូងថ្មបានប្រាប់ក្រុមអ្នកយកព័ត៌មានក្នុងភាគខាងត្បូងប្រទេសប៉ូឡូញដែលជាតំបន់ជីកយករ៉ែនេះថា៖ «យើងបានចុះហត្ថលេខាលើការរំលាយឧស្សាហកម្មសំខាន់បំផុតមួយក្នុងប្រវត្តិសាស្ត្ររបស់សាធារណរដ្ឋប៉ូឡូញ»។
លោក Artur Sobon អនុរដ្ឋមន្ត្រីក្រសួងហិរញ្ញវត្ថុបានហៅផែនការដំណាក់កាលធ្យូងថ្មថាជារឿងយុត្តិធម៌ ព្រោះវាគ្រាន់តែជាផ្លូវឆ្ពោះទៅការផ្លាស់ប្តូរឧស្សាហកម្មរ៉ែ និងថាមពលប៉ូឡូញ។
ដើមឡើយក្រុមសហជីពចង់បានគោលដៅបញ្ចប់រ៉ែធ្យូងថ្ម ត្រូវគេរំកិលពីឆ្នាំ ២០៥០ ទៅដល់ ២០៦០ និងបានព្រមានថា ការបិទអាជីវកម្មរ៉ែយ៉ាងតក់ក្រហល់នឹងមានផលវិបាកដល់សេដ្ឋកិច្ច និងសង្គមធ្ងន់ធ្ងរ។
ការងារក្នុងវិស័យធ្យូងថ្មគឺជាចំណុចរសើបផ្នែកនយោបាយក្នុងប្រទេសប៉ូឡូញ ដែលមានប្រជាជន ៣៨ លាននាក់ដែលអ្នកជីករ៉ែ និងគ្រួសាររបស់ពួកគេនៅតែជាក្រុមបោះឆ្នោតដ៏មានឥទ្ធិពល។
លោក Kolorz បាននិយាយថា៖ «គ្មាននរណាម្នាក់ធ្វើការងារក្នុងវិស័យរ៉ែនឹងបាត់បង់ការងាររបស់ពួកគេនោះទេ» ដោយបានពន្យល់ថា កិច្ចព្រមព្រៀងនោះធានាថា ការងាររបស់អ្នកជីករ៉ែមានរហូតដល់ពេលចូលនិវត្តន៍ ឬក៏ការផ្តល់កញ្ចប់សំណងក្នុងករណីនៃការបញ្ឈប់មុនអាយុ។
ទោះជាយ៉ាងណា វិស័យនេះបានរងគ្រោះពីការធ្លាក់ចុះតម្លៃ ហើយបញ្ហារបស់វាត្រូវបានចងភ្ជាប់ដោយតម្រូវការកាន់តែចុះខ្សោយទៅៗរួតរឹតដោយវិបត្តិវីរុសកូរ៉ូណា។
ក្រុមហ៊ុនធ្យូងថ្មដ៏ធំបំផុត ១ របស់អឺរ៉ុបគឺក្រុមហ៊ុន PGG ដែលគ្រប់គ្រងដោយរដ្ឋត្រូវបានគេរាយការណ៍ថា បានបាត់បង់ចំណូលប្រមាណ ៤០០ លានហ្ស្លទី (Zloty) (១០២ លាន ដុល្លារ) កាលពីឆ្នាំមុន និង សេចក្តីរាយការណ៍របស់ព័ត៌មានបង្ហាញថា ក្រុមហ៊ុននេះបានខាតបង់ចំណូលយ៉ាងហោចណាស់ជិត ៦៨៨ លានដុល្លារក្នុងឆ្នាំនេះ។
អ្នកជីករ៉ែធ្យូងថ្ម និងគ្រួសាររបស់ពួកគេមានសមាមាត្រខ្ពស់នៃករណីឆ្លងវីរុសកូរ៉ូណាក្នុងប្រទេសប៉ូឡូញ។
អ្នកជីករ៉ែរាប់រយនាក់បានចូលរួមធ្វើកូដកម្មនៅសប្តាហ៍កន្លងទៅដោយស្នាក់នៅក្រោមដី បន្ទាប់ពីការបញ្ចប់វេនរបស់ពួកគេក្នុងការតវ៉ាប្រឆាំងគោលនយោបាយរបស់រដ្ឋាភិបាលដែលបានកំណត់បញ្ចប់អនាគតរបស់រ៉ែធ្យូងថ្ម៕ RR
