ភ្នំពេញៈ រដ្ឋាភិបាលកម្ពុជាបានប្រមូលចំណូលពន្ធសរុបបានប្រហែល ៦ ពាន់លានដុល្លារ នៅឆ្នាំ ២០១៩ ដោយសារម៉ាក្រូសេដ្ឋកិច្ចល្អប្រសើរបណ្ដាលមកពីស្ថិរភាពនយោបាយ។
កាលពីឆ្នាំ ២០១៩ រដ្ឋាភិបាលកម្ពុជាបានបង្កើនចំណូលពន្ធពីការប្រមូលពន្ធជាង ១,៤៨ ពាន់លានដុល្លារ ខណៈរដ្ឋាភិបាលកំណត់ទិសដៅសម្រាប់ប្រាក់ចំណូលពីគយ និងរដ្ឋាករ និងការយកពន្ធដារក្នុងចំនួន ៤,៥៦ ពាន់លានដុល្លារ ក្នុងចំណោមនោះ ២,២៦ ពាន់លានដុល្លារ បានមកពីគយ និងរដ្ឋាករ និង ២,៣ ពាន់លានដុល្លារ បានពីការយកពន្ធដារ។
លោកនាយករដ្ឋមន្ដ្រី ហ៊ុន សែន បានឲ្យដឹងកាលពីថ្ងៃទី ១០ ខែធ្នូថា ប្រាក់ចំណូលរកបានពីគយ និងរដ្ឋាករ និងពន្ធដារបានរួមចំណែកច្រើនដល់កំណើនសេដ្ឋកិច្ចកម្ពុជា។ លោកបានឲ្យដឹងថាត្រឹមថ្ងៃទី ៩ ខែវិច្ឆិកា ប្រាក់ចំណូលបានពីគយ និងពន្ធដារសម្រេចបាន ៤,៥៤ ពាន់លានដុល្លារ លើសពីទិសដៅកំណត់កាលពីឆ្នាំមុន។
លោកថ្លែងថា៖ «ទិសដៅប្រមូលប្រាក់ចំណូលពីគយ និងរដ្ឋាកររបស់យើងសម្រាប់ឆ្នាំនេះមានចំនួន ២,២៦ ពាន់លានដុល្លារ ប៉ុន្តែនៅពេលនេះយើងប្រមូលបានប្រហែល ៣,០១ ពាន់លានដុល្លារ លើស ៧៥៨ លានដុល្លារ ឬកើនឡើង ៣៣,៥ ភាគរយ។ ខណៈការប្រមូលប្រាក់ចំណូលពីពន្ធដារដែលយើងបានគ្រោងទុកសម្រាប់ឆ្នាំនេះមានចំនួន ២,២៩ ពាន់លានដុល្លារ ហើយពេលនេះយើងប្រមូលបានប្រហែល ២,៦៣ ពាន់លានដុល្លារ លើសពីទិសដៅកំណត់ ៣៤៥ លានដុល្លារ។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញប៉ុស្ដិ៍កាលពីថ្ងៃព្រហស្បតិ៍ថា ការបង្កើនការប្រមូលប្រាក់ចំណូលកំពុងឆ្លុះបញ្ចាំងសកម្មភាពសេដ្ឋកិច្ចល្អប្រសើរ និងស្ថិរភាពនយោបាយដែលបង្កើតបរិយាកាសល្អសម្រាប់អាជីវកម្ម និងការវិនិយោគ។
លោកថ្លែងថា៖ «យើងអាចមើលឃើញថា នៅពេលនេះយើងនាំចូលច្រើនដើម្បីបំពេញកំណើនយ៉ាងខ្លាំងនៃការប្រើប្រាស់ក្នុងស្រុក ដូច្នេះវាឆ្លុះបញ្ចាំងកំណើនអំណាចការទិញរបស់យើងនេះនឹងបង្កើនប្រាក់ចំណូលកាន់តែច្រើនដល់គយ និងរដ្ឋាករ ខណៈការកើនឡើងអាជីវកម្មថ្មីៗការពង្រីកអាជីវកម្ម និងការវិនិយោគក៏បានកើនឡើងកាលពីឆ្នាំមុនផងដែរ ដូច្នេះរដ្ឋាភិបាលក៏ទទួលប្រាក់ចំណូលកាន់តែច្រើនពីពន្ធដារ»។
លោកក៏បានកោតសរសើរដល់ការធ្វើទំនើបកម្មនៃការទូទាត់ពន្ធ និងការជម្រះពន្ធគយដែលជាការជួយដ៏ធំដល់វិស័យឯកជន។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា (GMAC) ក៏បានចង្អុលបង្ហាញប្រតិបត្តិការល្អនៃការគាំទ្រសេដ្ឋកិច្ចរបស់ប្រទេសនេះ ដែលបង្កើនការប្រមូលប្រាក់ចំណូល។
លោកបញ្ជាក់ថា៖ «ការកើនឡើងប្រាក់ចំណូលពន្ធគួរឲ្យកត់សម្គាល់ បង្ហាញភាពរឹងមាំនៃសេដ្ឋកិច្ចកម្ពុជា និងរដ្ឋបាលកាន់តែមានប្រសិទ្ធភាពទាក់ទងនឹងការប្រមូលពន្ធ។ ការឆ្ពោះទៅមុខ អគ្គនាយកដ្ឋានពន្ធដារគួរតែផ្ដោតកាន់តែខ្លាំងលើការពង្រីកមូលដ្ឋានពន្ធជាជាងការដាក់សម្ពាធលើអ្នកជាប់ពន្ធដែលមានស្រាប់។
ប៉ុន្តែលោកបានឲ្យដឹងថា ការបង់ពន្ធលើប្រាក់ចំណូលមុន ១ ភាគរយគឺនៅតែជាបញ្ហាសម្រាប់វិស័យឯកជន «ការលុបចោលពន្ធប្រភេទនេះអាចទាក់ទាញការវិនិយោគកាន់តែច្រើន ជាពិសេសការវិនិយោគផ្ទាល់បរទេស (FDI)។ រដ្ឋាភិបាលនឹងមិនបាត់បង់ប្រាក់ចំណូលណាមួយលើមូលដ្ឋានប្រចាំឆ្នាំនោះទេ ពួកគេគ្រាន់តែរង់ចាំប្រមូលពន្ធនៅចុងឆ្នាំនេះតែប៉ុណ្ណោះ»។
តាមមូលនិធិរូបិយវត្ថុអន្តរជាតិ (IMF) ការបង្កើនប្រតិបត្តិការប្រាក់ចំណូលរឹងមាំបានជួយរក្សាបំណុលសាធារណៈឲ្យនៅទាប។ ប៉ុន្តែ IMF បានបញ្ជាក់ថា ចាំបាច់ត្រូវគាំទ្រដល់និរន្តរភាពសារពើពន្ធដោយការរឹតបន្តឹងលើការចំណាយមិនមែនការអភិវឌ្ឍនៅពេលបច្ចុប្បន្នដែលរួមមានច្បាប់ប្រាក់ឈ្នួល និងតាមរយៈការបន្តពង្រឹងការកៀរគរប្រាក់ចំណូល និងលើកកម្ពស់ប្រសិទ្ធភាពពន្ធ។
សម្រាប់ច្បាប់ថវិកាឆ្នាំ ២០២០ ដែលត្រូវបានចុះហត្ថលេខាដោយព្រះមហាក្សត្រនៅពេលថ្មីៗ រដ្ឋាភិបាលកំណត់ក្នុងការប្រមូលប្រាក់ចំណូលសារពើពន្ធ ៥ ២៧២ លានដុល្លារ សម្រាប់ឆ្នាំ ២០២០ ក្នុងចំណោមនោះ ២ ៩១១ លានដុល្លារ បានពីគយ និងរដ្ឋាករ និង ២ ៣៦១ លានដុល្លារបានមកពីពន្ធដារ។
លោក លឹម ហេង បានឲ្យដឹងថា ការបង្កើនប្រាក់ចំណូលនឹងល្អសម្រាប់ប្រទេសនេះ ប៉ុន្តែការប្រមូលត្រូវតែស្មើភាពសម្រាប់អាជីវកម្មទាំងអស់។ លោកបន្តថា៖ «យើងដឹងថា រដ្ឋាភិបាលមិនបង្កើនអត្រាពន្ធ ឬពន្ធថ្មីទេ ប៉ុន្តែក្នុងនាមជាវិស័យឯកជន យើងចង់មានភាពស្មើភាពគ្នាសម្រាប់ការបង់ពន្ធទាំងអស់ដោយស្មើភាពគ្នា»៕LA