ភ្នំពេញៈ អគ្គនាយកដ្ឋានពន្ធដារប្រមូលចំណូលពន្ធអាករបានជាង ១,៥ ពាន់លានដុល្លារ ក្នុងឆមាសទី១ ឆ្នាំ ២០១៩ កើនឡើងជាង ៣២៤ លានដុល្លារ បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមសេចក្តីប្រកាសព័ត៌មានរបស់ អគ្គនាយកដ្ឋានពន្ធដារពីល្ងាចថ្ងៃពុធ។
ក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំឆមាសទី១ ឆ្នាំ ២០១៩ និងទិសដៅសម្រាប់អនុវត្តបន្តរបស់អគ្គនាយកដ្ឋានពន្ធដារ លោក គង់ វិបុល អគ្គនាយកនៃនាយកដ្ឋានពន្ធដារបានឲ្យដឹងថា ក្នុងរយៈពេល ៦ ខែ ឆ្នាំ ២០១៩ ចំណូលពន្ធអាករគ្រប់ប្រភេទដែលប្រមូលបានមានជាង ១,៥ ពាន់លានដុល្លារ ស្មើនឹង ៦៦,៧១ ភាគរយ បើធៀបរយៈពេលដូចគ្នាកាលពីឆ្នាំមុន។
លោក វិបុល បានបន្ថែមថា ក្នុងខែមិថុនា ឆ្នាំនេះការប្រមូលចំណូលពន្ធអាករបានប្រមាណ ១៩៧ លានដុល្លារ កើនឡើង ៥៧,១៨ លានដុល្លារ បើធៀបនឹងខែមិថុនាឆ្នាំមុន។
បើតាមទិន្នន័យរបស់អគ្គនាយកដ្ឋានពន្ធដារក្នុងរយៈពេល ៥ ឆ្នាំចុងក្រោយនេះ អគ្គនាយកដ្ឋានពន្ធដារ សម្រេចបានកំណើនចំណូលពន្ធក្នុងរង្វង់ប្រមាណ ២០ ភាគរយ ក្នុង ១ ឆ្នាំ គិតចាប់តាំងពីឆ្នាំ ២០១៤ មក បន្ទាប់ពីរដ្ឋាភិបាលបានដាក់ចេញនូវកំណែទម្រង់ស៊ីជម្រៅក្រោយការបោះឆ្នោតឆ្នាំ ២០១៣។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុដែលចូលកិច្ចប្រជុំនេះបានបន្តគាំទ្រអគ្គនាយកដ្ឋានពន្ធដារក្នុងបេសកកម្មដើម្បីធានាបាននូវប្រសិទ្ធភាពក្នុងការអនុវត្តការប្រមូលចំណូលពន្ធ និងឈានទៅសម្រេចឲ្យបានលើសផែនការឲ្យបានជាអតិបរិមា សម្រាប់ឆ្នាំ ២០១៩ នេះ។
តាមរដ្ឋមន្ត្រីក្រសួងសេដ្ឋកិច្ច GDT ត្រូវបន្តជំរុញលើកទឹកចិត្តផ្នែកពន្ធដារដើម្បីទាក់ទាញការវិនិយោគនៅកម្ពុជា។
លោកបន្តថា៖ «ជាធាតុចូលក្នុងសេចក្តីព្រាងច្បាប់វិនិយោគថ្មី ចៀសវាងការយកពន្ធត្រួតស៊ីគ្នា ពិនិត្យ និងពង្រឹងការគ្រប់គ្រងប្រមូលពន្ធលើវិស័យអចលនទ្រព្យ និងជំរុញការប្រមូលចំណូលពន្ធលើសហគ្រាស និងអាជីវកម្ម ជ្រកក្រោមស្លាកយីហោកាស៊ីណូដែលមិនបំពេញកាតព្វកិច្ចចុះបញ្ជីពន្ធដារ និងមិនបង់ពន្ធស្របតាមច្បាប់កំណត់»៕