ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បានចេញប្រកាសស្តីពីវិធាន និងនីតិវិធីគ្រប់គ្រងប្រមូលពន្ធប៉ាតង់ ដើម្បីគ្រប់គ្រងការប្រមូលចំណូលពន្ធឲ្យមានប្រសិទ្ធភាពស្របតាមការរីកចម្រើននៃសេដ្ឋកិច្ចរបស់កម្ពុជា។
ប្រកាសនេះ ធ្វើឡើងក្នុងគោលបំណងកំណត់វិធាន និងនីតិវិធីគ្រប់គ្រងប្រមូលពន្ធប៉ាតង់លើសកម្មភាពអាជីវកម្មរបស់អ្នកជាប់ពន្ធតាមរបបស្វ័យប្រកាសដែលមានវិសាលភាពអនុវត្តចំពោះអ្នកជាប់ពន្ធតាមរបបស្វ័យប្រកាសដែលប្រកបអាជីវកម្មនៅកម្ពុជា។
ពន្ធប៉ាតង់ គឺជាពន្ធប្រចាំឆ្នាំដែលត្រូវបានកំណត់លើសកម្មភាពអាជីវកម្មដោយផ្អែកលើប្រភេទអ្នកជាប់ពន្ធ និងកម្រិតផលរបរ។
ប្រកាសនេះបានផ្សាយកាលពីថ្ងៃទី ៨ មេសា បានឲ្យដឹងទៀតថា អ្នកជាប់ពន្ធដែលមានសកម្មភាពអាជីវកម្មច្រើន ត្រូវបង់ពន្ធប៉ាតង់ផ្សេងៗគ្នាទៅតាមសកម្មភាពអាជីវកម្មនីមួយៗ។ ឧទាហរណ៍ អ្នកជាប់ពន្ធម្នាក់ដែលមានសកម្មភាពអាជីវកម្មនីហរណ៍ អាហរណ៍ ដឹកជញ្ជូន និងសណ្ឋាគារ ត្រូវបង់ពន្ធប៉ាតង់សម្រាប់សកម្មភាព ៣ អាជីវកម្មផ្សេងគ្នា។
ដោយឡែក សកម្មភាពជាឧបសម្ព័ន្ធនានានៃសកម្មភាពអាជីវកម្មត្រូវបានចាត់ទុកថា ជាសកម្មភាពអាជីវកម្មតែមួយ។ ឧទាហរណ៍ សណ្ឋាគារមួយដែលមានក្លិបកម្សាន្ត ភោជនីយដ្ឋាន កន្លែងម៉ាស្សា ក្លិបហាត់ប្រាណ ឬសកម្មភាពដទៃទៀត ដែលជាឧបសម្ព័ន្ធនៃសកម្មភាពសណ្ឋាគារដែលស្ថិតក្រោមការគ្រប់គ្រងផ្ទាល់របស់អ្នកជាប់ពន្ធតែមួយ និងស្ថិតក្នុងទីតាំងរួមជាមួយសណ្ឋាគារត្រូវបង់ពន្ធប៉ាតង់តែមួយ។
អ្នកជាប់ពន្ធដែលមានទីកន្លែងអាជីវកម្មជាគោលដើម ទីចាត់ការសហគ្រាស សាខា ឃ្លាំង រោងចក្រ រោងជាង សម្រាប់សកម្មភាពអាជីវកម្មតែមួយនៅរាជធានី ខេត្តតែមួយ ត្រូវបង់ពន្ធប៉ាតង់តែមួយ ហើយអ្នកជាប់ពន្ធដែលមានសកម្មភាពអាជីវកម្មនៅរាជធានី ខេត្តផ្សេងគ្នា ត្រូវបង់ប៉ាតង់ទៅតាមរាជធានី ខេត្តដែលអាជីវកម្មនោះស្ថិតនៅ។
កម្រិតប្រាក់ពន្ធប៉ាតង់ត្រូវបង់កំណត់ដូចខាងក្រោម៖ អ្នកជាប់ពន្ធតូចត្រូវបង់ពន្ធប៉ាតង់ប្រចាំឆ្នាំចំនួន ៤០០ ០០០ រៀល។ អ្នកជាប់ពន្ធមធ្យម ត្រូវបង់ពន្ធប៉ាតង់ប្រចាំឆ្នាំចំនួន ១ ២០០ ០០០ រៀល។ ចំណែក អ្នកជាប់ពន្ធធំ ត្រូវបង់ប្រចាំឆ្នាំចំនួន ៣ ០០០ ០០០ រៀល និង ៥ ០០០ ០០០ រៀល ក្នុងករណីដែលមានផលរបរលើសពី ១០ ០០០ លានរៀល។
ពន្ធប៉ាតង់ត្រូវបង់ក្នុងអំឡុងពេលចាប់ពីថ្ងៃទី ១ ខែមករា ដល់ ថ្ងៃទី ៣១ ខែមីនា ជារៀងរាល់ឆ្នាំ។ ពន្ធប៉ាតង់ត្រូវបង់នៅរដ្ឋបាលសារពើពន្ធដែលអ្នកជាប់ពន្ធមានកន្លែងប្រកបអាជីវកម្មពិតប្រាកដ។ អ្នកជាប់ពន្ធដែលចាប់ផ្តើមអាជីវកម្មក្នុងរយៈពេល ៦ ខែដើមឆ្នាំ ត្រូវបង់ពន្ធត្រូវបង់ពន្ធប៉ាតង់ពេញ ១ ឆ្នាំ ប៉ុន្តែប្រសិនបើចាប់ផ្តើមអាជីវកម្មក្នុងរយៈពេល ៦ ខែចុងឆ្នាំ អ្នកជាប់ពន្ធត្រូវបង់ពន្ធប៉ាតង់ពាក់កណ្តាល៕