.jpg)
ភ្នំពេញៈ រដ្ឋាភិបាលបានសម្រេចផ្តល់ការអនុគ្រោះផ្នែកពន្ធសម្រាប់សហគ្រាសក្នុងវិស័យកសិកម្ម តាមរយៈការព្យួរទុកការបង់ប្រាក់រំដោះពន្ធលើប្រាក់ចំណូលរបស់សហគ្រាសទាំងនេះរយៈពេល ៥ ឆ្នាំ។ នេះបើយោងតាមសេចក្តីប្រកាសមួយដែលចេញផ្សាយកាលពីថ្ងៃម្សិលមិញ។
សេចក្តីប្រកាសរបស់ក្រសួងសេដ្ឋកិច្ច និងហិរញ្ញវត្ថុដែលចុះថ្ងៃទី ២៩ ខែមករា ឆ្នាំ ២០១៩ បានឲ្យដឹងថា ការព្យួរទុកការបង់ប្រាក់រំដោះពន្ធលើប្រាក់ចំណូលនេះនឹងផ្តល់ជូនដល់សហគ្រាសដែលប្រកបអាជីវកម្មផលិត និងផ្គត់ផ្គង់ក្នុងស្រុក ឬនាំចេញផលិតផលកសិកម្មមួយចំនួន រួមមាន ស្រូវ អង្ករ ពោត សណ្តែក ម្រេច គ្រាប់ស្វាយចន្ទី ដំឡូងមី និងកៅស៊ូ ក្នុងគោលបំណងជំរុញ និងគាំទ្រដល់ផលិតកម្ម និងការនាំចេញផលិតផលកសិកម្ម។
ប្រាក់រំដោះពន្ធលើប្រាក់ចំណូល គឺជាប្រាក់ពន្ធលើប្រាក់ចំណូលតាមរបបពិត ដែលសហគ្រាស និងក្រុមហ៊ុនមានកាតព្វកិច្ចបង់ប្រាក់រំដោះប្រចាំខែសម្រាប់ពន្ធលើប្រាក់ចំណូលតាមអត្រា ១ ភាគរយនៃផលរបរ គិតរួមបញ្ចូលទាំងពន្ធអាករទាំងអស់វៀរលែងតែអាករលើតម្លៃបន្ថែម ដែលសម្រេចបានក្នុងខែមុន។ ប្រាក់រំដោះនឹងត្រូវបានយកមកកាត់កងពីពន្ធលើប្រាក់ចំណូលនៅពេលធ្វើការទូទាត់ប្រចាំឆ្នាំ។
សេចក្តីប្រកាសនេះបានឲ្យដឹងថា សហគ្រាសដាំដុះ ផលិត និងផ្គត់ផ្គង់ក្នុងស្រុក ឬនាំចេញផលិតផលកសិកម្មទាំងនេះ នឹងទទួលបានការ «អនុគ្រោះព្យួរទុកជាបណ្តោះអាសន្ននូវការបង់ប្រាក់រំដោះពន្ធលើប្រាក់ចំណូលប្រចាំខែរយៈពេល ៥ ឆ្នាំ គិតចាប់ពីខែមករា ឆ្នាំ ២០១៩ តរៀងទៅ»។
សហគ្រាសដែលទទួលបានការអនុគ្រោះនេះ ត្រូវតែជាសហគ្រាសដែលគោរពតាមច្បាប់ស្តីពីសារពើពន្ធ និងច្បាប់ស្តីពីគណនេយ្យ ដូចជាបានអនុវត្តការប្រកាសបង់ពន្ធអាករតាមកាលកំណត់ និងកាន់បញ្ជិកាគណនេយ្យត្រឹមត្រូវជាដើម។ នេះបើតាមសេចក្តីប្រកាស។
សេចក្តីប្រកាសនេះបានបន្តថា ក្នុងករណីសហគ្រាសមិនគោរពតាមលក្ខខណ្ឌ ការព្យួរទុកការបង់ប្រាក់រំដោះពន្ធលើប្រាក់ចំណូលប្រចាំខែ ត្រូវបានដកហូត ហើយសហគ្រាសត្រូវទទួលរងការដាក់ទោសទណ្ឌតាមច្បាប់ជាធរមាន៕
