The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​រៀបចំ​ផែន​ការ​ដើម្បី​ជំរុញ​ការ​នាំ​ចេញ

រដ្ឋាភិបាល​រៀបចំ​ផែន​ការ​ដើម្បី​ជំរុញ​ការ​នាំ​ចេញ

សកម្មភាព​ក្នុង​រោង​ម៉ាស៊ីន​កែច្នៃ​អង្ករ​របស់​ក្រុម​ហ៊ុន AMRU Rice ដែល​ជា​ក្រុមហ៊ុន​នាំ​ចេញ​អង្ករ​មួយ​នៅ​កម្ពុជា ។
សកម្មភាព​ក្នុង​រោង​ម៉ាស៊ីន​កែច្នៃ​អង្ករ​របស់​ក្រុម​ហ៊ុន AMRU Rice ដែល​ជា​ក្រុមហ៊ុន​នាំ​ចេញ​អង្ករ​មួយ​នៅ​កម្ពុជា ។ ហេង ជីវ័ន

រដ្ឋាភិបាល​រៀបចំ​ផែន​ការ​ដើម្បី​ជំរុញ​ការ​នាំ​ចេញ

ភ្នំពេញៈ រដ្ឋាភិបាល​កម្ពុជា​បាន​ពិភាក្សា​លើ​ក្របខ័ណ្ឌ​ច្បាប់​ដើម្បី​អភិវឌ្ឍ​កសិឧស្សាហកម្ម​ក្នុង​គោល​បំណង​បង្កើន​ការ​នាំ​ចេញ និង​សមត្ថភាព​ប្រកួត​ប្រជែង​សម្រាប់​ផលិតផល​កសិកម្ម​នៅ​ក្នុង​រយៈ ១០ ឆ្នាំ​ក្រោយ។

គោលការណ៍​សំខាន់ៗ​ដែល​បាន​យល់​ព្រម​នៅ​ក្នុង​កិច្ច​ប្រជុំ​នេះ​រួម​មាន​ការ​ជំរុញ​ការ​ផ្ដល់​ហិរញ្ញប្បទាន​ដើម្បី​ពង្រឹង​បច្ចេកទេស ការ​កែច្នៃ​ផលិតផល​កសិកម្ម ការ​សម្រួល​ដល់​ការ​នាំ​ចេញ និង​ការ​ផ្ដល់​អាទិភាព​ដល់​ផលិតផល​កសិកម្ម​ជាមួយ​នឹង​សក្ដានុពល​ខ្ពស់​សម្រាប់​ការ​នាំ​ចេញ។ នេះ​បើ​យោង​តាម AKP។

កិច្ចប្រជុំ​ដែល​បាន​រៀបចំ​ឡើង​កាល​ពី​សប្ដាហ៍​មុន​បាន​យល់​ព្រម​ចាប់​ផ្ដើម​ដំណើរ​ការ​សិក្សា​ពី​លទ្ធភាព​ដើម្បី​អភិវឌ្ឍ​ផលិតផល​កសិកម្ម និង​ការ​លើក​ទឹក​ចិត្ត​សម្រាប់់​ការ​វិនិយោគ​នៅ​ក្នុង​វិស័យ​នេះ​ជាមួយ​ស្ថាប័ន​រដ្ឋាភិបាល​ដែល​ពាក់ព័ន្ធ​ត្រូវ​បាន​តម្រូវ​ឲ្យ​រៀបចំ​យុទ្ធសាស្ដ្រ​របស់​ខ្លួន​ជាមួយ​នឹង​គោល​នយោបាយ​អភិវឌ្ឍន៍​កសិ​ឧស្សាហកម្ម ជា​ក្របខ័ណ្ឌ​ដែល​បាន​យល់​ព្រម។

លោក ទី សុគន្ធ រដ្ឋលេខាធិការ​ក្រសួង​កសិកម្ម រុក្ខា​ប្រមាញ់ និង​នេសាទ​បាន​ឲ្យ​ដឹង​ថា ក្រសួង​កសិកម្ម កំពុង​រៀបចំ​ធ្វើ​ផែនការ​សកម្មភាព​ដើម្បី​អនុវត្ត​គោល​នយោបាយ​នេះ។

លោក​បន្ត​ថា៖ «ដើម្បី​បង្កើត​ភាព​ប្រកួត​ប្រជែង​របស់​យើង។ យើង​បាន​ឃើញ​ហើយ​ថា ស្រូវ​របស់​យើង​នៅ​សល់​ខ្ទង់ ៤ លាន​តោន​ក្នុង​មួយ​ឆ្នាំ អង្ករ​នាំ​ចេញ​ជា​ផ្លូវ​ការ​របស់​យើង​នេះ​នៅ​មិន​ទាន់​គ្រប់​មួយ​លាន​តោន តាម​គោល​ដៅ​នោះ​ទេ។ យើង​ត្រូវ​បង្កើន​ផ្នែក​កែច្នៃ​ច្រើន ឃ្លាំង និង​ផ្នែក​ទីផ្សារ​ដើម្បី​បង្កើន​តម្លៃ​បន្ថែម និង​ភាព​ប្រកួត​ប្រជែង​ចំណុច​សំខាន់​ក្នុង​ចំណោម​ចំណុច​សំខាន់​ផ្សេងៗ​ទៀត»។

លោក​បន្ថែម​ថា៖ «យើង​កំពុង​រៀបចំ​ផែនការ​សកម្មភាព​ដើម្បី​អនុវត្ត​គោល​នយោបាយ​ឧស្សាហកម្ម ក្រសួង​ពាក់ព័ន្ធ​ច្រើន ក្នុង​នោះ​ក្រសួង​កសិកម្ម​យើង​ត្រូវ​ចូលរួម​ក្នុង​ការ​បង្កើត​ផែនការ​សកម្មភាព​សម្រាប់​ការ​អភិវឌ្ឍ​កសិ​ឧស្សាហកម្ម។ ការ​ធ្វើ Agro-Industry Chain ក្នុង​នោះ​មាន​ការ​បង្កើន​ផលិតភាព ការ​ធ្វើ​ពិពិធកម្ម ហើយ​និង​ធ្វើ​ពាណិជ្ជកម្ម។ តាម​រយៈ​ការ​បង្កើន​តម្លៃ​បន្ថែម និង​អត្ថប្រយោជន៍​ប្រកួត​ប្រជែង របស់​យើង​នៅ​ទីផ្សារ​អន្តរជាតិ»។

លោក​ថ្លែង​ថា ក្របខ័ណ្ឌ​ច្បាប់​នេះ​ត្រូវ​បាន​រៀបចំ​ឡើង​ដើម្បី​គាំទ្រ​ដល់​គោល​នយោបាយ​អភិវឌ្ឍ​ឧស្សាហកម្ម​ឆ្នាំ​ ២០១៥ ដល់ ឆ្នាំ​២០២៥។

លោក គាត ឈន់ ឧបនាយក​រដ្ឋ​មន្ដ្រី​ប្រចាំ​ការ ត្រូវ​បាន​ដក​ស្រង់​សម្ដី​ដោយ AKP ថា៖ «កម្ពុជា​មាន​សក្ដានុពល​ធំ​នៅ​ក្នុង​កសិ​ឧស្សាហកម្ម និង​ស្ថិត​នៅ​ក្នុង​ចំណោម​វិស័យ​មាន​អាទិភាព​ឈាន​មុខ​គេ​ទាំង ៥ របស់​រាជរដ្ឋាភិបាល​កម្ពុជា»។ លោក​បញ្ជាក់​ថា កសិ​ឧស្សាហកម្ម​មិន​គ្រាន់​តែ​គាំទ្រ​ដល់​កំណើន​ម៉ាក្រូ​សេដ្ឋកិច្ច​ប៉ុណ្ណោះ​ទេ ប៉ុន្តែ​ថែម​ទាំង​ធានា​សុវត្ថិភាព​ស្បៀង​អាហារ និង​បង្កើត​ការងារ និង​ចំណូល​ដល់​ប្រជាជន​កម្ពុជា។

រដ្ឋាភិបាល​កម្ពុជា​កំណត់​ទិសដៅ​ក្នុង​ការ​បង្កើន​ចំណែក​វិស័យ​ឧស្សាហកម្ម​ឲ្យ​ដល់ ៣០ ភាគរយ​នៃ​ផលិតផល​ក្នុង​ស្រុក​សរុប (GDP) ត្រឹម​ឆ្នាំ​២០២៥ ដែល​កើន​ឡើង ២៤,១ ភាគរយ​កាលពី​ឆ្នាំ​២០១៣។

លោកស្រី​ចន្ធី អ្នក​វិភាគ​សេដ្ឋកិច្ច​ឯករាជ្យ បាន​ស្វាគមន៍​ដល់​វិធានការ​នេះ។ លោក​ថ្លែង​ថា៖ «ទោះ​បី​ជា​វា​មាន​ភាព​យឺតយ៉ាវ​បន្តិច ក៏​វា​ជា​វិធានការ​មួយ​ដ៏​ត្រឹម​ត្រូវ។ ប្រសិទ្ធភាព​របស់​វា​អាច​មាន​ការ​ខ្វះខាត ខណៈ​ផ្នែក​ផលិត និង​ការងារ​ជាមួយ​កសិករ និង​អ្នក​ផលិត​ហាក់​ដូច​ជា​ត្រូវ​បាន​គេ​មើល​រំលង។ វា​នឹង​បន្ថែម​តម្លៃ​ដល់​វិស័យ​កសិកម្ម ការ​បង្កើត​ការងារ ការ​ជំរុញ​កំណើន​សេដ្ឋកិច្ច ហើយ​បើ​អនុវត្ត​បាន​ត្រឹម​ត្រូវ វា​អាច​រួម​ចំណែក​ក្នុង​ការ​កាត់​បន្ថយ​ភាព​ក្រីក្រ​តាម​ជនបទ​បាន​យ៉ាង​រហ័ស និង​ដើម្បី​កាត់​បន្ថយ​ការ​ធ្វើ​ចំណាក​ស្រុក»។

ទោះ​បី​ជា​កសិកម្ម​ជួយ​ទ្រទ្រង់​ដល់​ជីវភាព​រស់នៅ​ភាគ​ច្រើន​បំផុត​របស់​ប្រទេស​នេះ​ក៏​ដោយ ក៏​កម្ពុជា​នៅ​តែ​នាំ​ចូល​បន្លែ​ជា​ច្រើន​មក​ពី​ប្រទេស​ជិត​ខាង​ដូច​ជា វៀតណាម និង​ថៃ ដើម្បី​បំពេញ​តម្រូវ​ការ​ក្នុង​ស្រុក។ កម្ពុជា​ត្រូវ​គេ​រាយកាណ៍​ថា​បាន​នាំ​ចូល​បន្លែ ២០០ តោន​ពី​វៀតណាម​ក្នុង​មួយ​ថ្ងៃ​ដើម្បី​ផ្គត់ផ្គង់​តម្រូវ​ការ​ក្នុង​ស្រុក៕ PB

អត្ថបទគួរចាប់អារម្មណ៍