.jpg)
ភ្ញៀវទេសចរជាតិទៅលេងឆ្នេរអូរឈើទាល ក្នុងខេត្តព្រះសីហនុនាពេលកន្លងមក។ រូបថត Yousos Apdoulrashim
ភ្នំពេញៈ ភ្ញៀវទេសចរក្នុងស្រុកនឹងជំរុញវិស័យទេសចរណ៍ឲ្យងើបឡើងវិញយ៉ាងឆាប់រហ័ស ក្រោយពីវិបត្តិសុខភាពវិលទៅរកស្ថានភាពធម្មតាវិញ។ នេះបើតាម លោក គន្ធា ភិរម្យ ប្រធានការិយាល័យជំរុញទេសចរណ៍ក្នុងស្រុកនៃក្រសួងទេសចរណ៍។
ក្រោយវិបត្តិជំងឺកូវីដ ១៩ ប្រទេសកម្ពុជា ក៏ដូចជាប្រទេសនានាលើសកលលោក ត្រូវបានគេរំពឹងថា នឹងមានប្រជាជនធ្វើដំណើរកម្សាន្តច្រើនឡើងវិញ នៅពេលដែលស្ថានភាពវិលទៅរកភាពប្រក្រតីឡើងវិញ។
លោក ភិរម្យ ឲ្យដឹងថា ចំពោះវិស័យទេសចរណ៍ដែលរងផលប៉ះពាល់ធ្ងន់ធ្ងរជាងគេនឹងមានសម្ទុះរីកចម្រើនខ្លាំងជាងគេ ព្រោះអនុវិស័យមួយចំនួនក្នុងឧស្សាហកម្មទេសចរណ៍ រួមមាន ភោជនីយដ្ឋាន ក្រុមហ៊ុនទេសចរណ៍ ការដឹកជញ្ជូនទេសចរណ៍ និងសេវាកម្មស្នាក់នៅជាដើម ត្រូវបានគេរំពឹងថា នឹងងើបឡើងវិញយ៉ាងឆាប់រហ័សផងដែរ ក្រោយវិបត្តិសុខភាពនេះ។
លោកថា មានតែភ្ញៀវទេសចរក្នុងស្រុកប៉ុណ្ណោះដែលអាចស្តារឧស្សាហកម្មទេសចរណ៍ទាំងមូលបានដែលធនធានធម្មជាតិនឹងដើរតួនាទីយ៉ាងសំខាន់បំផុត សម្រាប់សកម្មភាពទេសចរណ៍ក្រោយវិបត្តិជំងឺកូវីដ ១៩ ត្រូវបានបញ្ចប់។
យោងតាមការសិក្សាខាងលើនេះបាននាំឲ្យនាយកដ្ឋានជំនាញនៃក្រសួងទេសចរណ៍ជឿជាក់ថា វិស័យទេសចរណ៍ក្នុងស្រុកនៅកម្ពុជានឹងមានការកើនឡើងយ៉ាងឆាប់រហ័សបំផុតក្នុងទម្រង់ជាអក្សរ V។
លោកបញ្ជាក់ថា៖ «បន្ទាប់ពីការហាមឃាត់ការធ្វើដំណើរ និងការជួបជុំដោយសារការរីករាលដាលជំងឺកូវីដ ១៩ ត្រូវបានគេរំពឹងថា ប្រជាពលរដ្ឋកម្ពុជានឹងធ្វើដំណើរឡើងវិញយ៉ាងគំហុកដោយសារតែការខកខានធ្វើដំណើរកម្សាន្តក្នុងរយៈពេលជាង ១ ឆ្នាំកន្លងមកនេះ»។
ការសិក្សាលើចិត្តសាស្ត្ររបស់មនុស្សពីសាកលវិទ្យាល័យ Johns Hopkins និងមន្ទីរពេទ្យ Bangkok Hospital បានបង្ហាញថា ទោះបីជាមនុស្សមិនបានឆ្លងជំងឺកូវីដ ១៩ ក៏ដោយ ក៏មនុស្សភាគច្រើនត្រូវគេរកឃើញថាបានកើតជំងឺថប់អារម្មណ៍ (ស្ត្រេស) និងបញ្ហាសុខភាពផ្លូវចិត្តផ្សេងទៀត។
ហេតុផលទាំងនេះអាចបញ្ជាក់ថា ប្រជាពលរដ្ឋខ្មែរដែលនឹងមានការអនុញ្ញាតឲ្យមានការជួបជុំនិងបំផ្លាស់ទីឡើងវិញដែលទំនងជាពួកគេនឹងធ្វើដំណើរចេញពីលំនៅឋានយ៉ាងច្រើនសន្ធឹកសន្ធាប់ដើម្បីលម្ហែខួរក្បាល និងស្រូបយកខ្យល់អាកាស។
ការធ្វើដំណើរកម្សាន្តយ៉ាងគំហុកនេះត្រូវបានគេរំពឹងថា នឹងមានភ្ញៀវជាច្រើនបានកក់បន្ទប់សណ្ឋាគារ និងផ្ទះសំណាក់ក្នុងអំឡុងដំណើរកម្សាន្តរបស់ពួកគេ។ ក្នុងន័យនេះមូលដ្ឋានអាជីវកម្មក្នុងវិស័យស្នាក់នៅគួរត្រៀមខ្លួនឲ្យរួចរាល់ ដើម្បីឆ្លើយតបនឹងតម្រូវការក្នុងអំឡុងពេលនេះ។
ទន្ទឹមនឹងនេះការដឹកជញ្ជូនភ្ញៀវទេសចរនឹងមានភាពមមាញឹកឡើងវិញយ៉ាងឆាប់រហ័សផងដែរ។ ថ្វីដ្បិតតែគ្រួសារភាគច្រើនមានរថយន្តផ្ទាល់ខ្លួន តែគេនៅតែជឿថា ការធ្វើដំណើរទេសចរណ៍ជាក្រុមៗក៏នឹងមានតម្រូវការខ្លាំងផងដែរ។
លោក ភិរម្យ ឲ្យដឹងទៀតថា៖ «ការធ្វើដំណើរតាមផ្លូវអាកាសក្នុងស្រុក (ភ្នំពេញ-សៀមរាប-ព្រះសីហនុ) ក៏មានសកម្មភាពរស់រវើកឡើងវិញ ដែលអ្នកដំណើរភាគច្រើនជាអ្នកជំនួញ ថ្នាក់ដឹកនាំរបស់ក្រសួងស្ថាប័នរដ្ឋ បុគ្គលិកក្រុមហ៊ុន និងអង្គការ ព្រមទាំងអ្នកទេសចរលំដាប់លើមធ្យម។ មិនតែប៉ុណ្ណោះការធ្វើដំណើរតាមទូកទេសចរណ៍និងកប៉ាល់ធំៗ ដើម្បីឆ្លងទៅតាមកោះនានាតាមតំបន់សមុទ្រក៏ត្រូវបានរំពឹងថានឹងមានភាពមមាញឹកខ្លាំងផងដែរ»។
លោក សយ ស៊ីណុល ប្រធានមន្ទីរទេសចរណ៍ខេត្តកំពតប្រាប់ ភ្នំពេញ ប៉ុស្តិ៍ថា រមណីយដ្ឋានទេសចរណ៍ និងសហគមន៍ទេសចរណ៍ភាគច្រើនត្រូវបានបើកដំណើរការឡើងវិញតាមការណែនាំរបស់រដ្ឋាភិបាលដោយបន្តពង្រឹងវិធានសុវត្ថិភាពតាមក្រសួងសុខាភិបាល។ សក្តានុពលភូមិសាស្រ្តជាប់មាត់សមុទ្រនិងភ្នំជាច្រើននោះលោករំពឹងថា នឹងមានភ្ញៀវជាច្រើនទៅកម្សាន្តនៅខេត្តកំពត។
លោកថ្លែងថា៖ «អាជ្ញាធរខេត្តបានរៀបចំរួចហើយទាំងទីតាំង និងវិធានការការពារសម្រាប់ទទួលភ្ញៀវមកកម្សាន្តបន្ទាប់ពីរដ្ឋាភិបាលអនុញ្ញាតឲ្យរមណីយដ្ឋានបើកដំណើរការឡើងវិញ»។
លោក ភិរម្យ កត់សម្គាល់ថា និន្នាការនៃការធ្វើដំណើរជាក្រុមរបស់យុវជនក៏គេរំពឹងថានឹងមានចលនាយ៉ាងរស់រវើកឡើងវិញដែលពួកគេនឹងអាចដើរព្រៃ បោះតង់ និងការជិះរថភ្លើង ជាដើម។ ការណ៍នេះ ប្រតិបត្តិករទេសចរណ៍ឬក៏សមាគមការីទេសចរណ៍គួរត្រៀមឲ្យរួចរាល់នូវការរៀបចំកញ្ចប់ខ្សែទស្សនកិច្ចក្នុងស្រុកទៅតាមគោលដៅទេសចរណ៍សំខាន់ៗ ព្រោះតម្រូវការរបស់ភ្ញៀវទេសចរជាតិនឹងងើបឡើងខ្លាំងបន្ទាប់ពីការហាមឃាត់ធ្វើដំណើរក្នុងមួយរយៈពេលខ្លី។
ទោះជាយ៉ាងណា តម្លៃនៃកញ្ចប់ទស្សនកិច្ចក្នុងស្រុកនាពេលខ្លីខាងមុខនេះគួរជាតម្លៃទាប ឬមធ្យមដោយសារស្ថានភាពនៃប្រាក់ចំណូលរបស់មនុស្សម្នាក់ៗទើបបានធូរស្រាលបន្តិចបន្ទាប់ពីវិបត្តិសុខភាពនេះ។
យោងតាមទិន្នន័យពីក្រសួងទេសចរណ៍ ក្នុងឆ្នាំ ២០២០ ភ្ញៀវទេសចរក្នុងស្រុកដែលធ្វើដំណើរទៅកម្សាន្តកន្លែងនានាក្នុងប្រទេស មានចំនួនសរុប ៧,២៣ លាននាក់ ធ្លាក់ចុះ ៣៦,១ ភាគរយ ពីចំនួន ១១,៣ លាននាក់ កាលពីឆ្នាំ ២០១៩៕
