ភ្នំពេញៈ រាជរដ្ឋាភិបាលបានសម្រេចដាក់ចេញនូវវិធានការជុំទី ៤ ក្នុងគោលបំណងដើម្បីធានានូវលំនឹងសេដ្ឋកិច្ច និងសង្គមក្នុងអំឡុងពេលការរីករាលដាលជំងឺកូវីដ១៩ ដែលកំពុងធ្វើឲ្យប៉ះពាល់ដល់សេដ្ឋកិច្ចពិភពលោក និងក្នុងតំបន់ព្រមទាំងកម្ពុជាផងដែរ។
សេចក្តីប្រកាសព័ត៌មានរបស់រដ្ឋាភិបាលដែលចេញផ្សាយកាលពីថ្ងៃអង្គារ បានឲ្យដឹងថា វិធានការនេះនឹងជួយរក្សាលំនឹងអាជីវកម្មរបស់ក្រុមហ៊ុន រោងចក្រ និងសហគ្រាសឲ្យអាចបន្តអាជីវកម្មឆ្លងផុតពីវិបត្តិនៃជំងឺកូវីដ១៩ និងដើម្បីកាត់បន្ថយផលប៉ះពាល់ដែលពួកគេកំពុងប្រឈម ព្រមទាំងជាការចូលរួមចំណែកបន្ធូរបន្ទុកនៃការរស់នៅរបស់ប្រជាពលរដ្ឋដែលមានជីវភាពក្រីក្រតាមរយៈកម្មវិធីជំនួយសង្គម (Social Assistance) ផងដែរ។ វិធានការជុំទី ៤ នេះក៏បានផ្តោតលើការជួយស្តារ និងជំរុញលទ្ធភាពអាជីវកម្ម និងធុរកិច្ចឲ្យងើបឡើងវិញ ដើម្បីចូលរួមជំរុញកំណើនសេដ្ឋកិច្ចក្នុងបរិការណ៍ក្រោយវិបត្តិនៃជំងឺនេះ។
សេចក្តីប្រកាសព័ត៌មានបានបន្តថា រដ្ឋាភិបាលសម្រេចធ្វើការបន្ធូរបន្ថយការអនុវត្តពន្ធកាត់ទុកលើការប្រាក់សម្រាប់អ្នកផ្តល់កម្ចីក្នុងស្រុក និងក្រៅស្រុក (Withholding Tax)។ សម្រាប់កម្ចីថ្មី រដ្ឋាភិបាលសម្រេចទម្លាក់អត្រាពន្ធកាត់ទុកលើកម្ចីរបស់ធនាគារ និងស្ថាប័នមីក្រូហិរញ្ញវត្ថុទាំងពីប្រភពខាងក្រៅ និងខាងក្នុងស្រុកមកនៅត្រឹម ៥% (ទាំងការខ្ចីពីប្រទេសដែលមានកិច្ចព្រមព្រៀងស្តីពីការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការការគេចវេះពន្ធ និងការចៀសវាងពន្ធ (DTA) និងការខ្ចីពីប្រទេសដែលមិនមាន DTA) សម្រាប់ឆ្នាំ ២០២០។
ទម្លាក់អត្រាពន្ធកាត់ទុកលើកម្ចីរបស់ធនាគារ និងស្ថាប័នមីក្រូហិរញ្ញវត្ថុ ទាំងពីប្រភពខាងក្រៅ និងខាងក្នុងស្រុកមកនៅត្រឹម ១០% (ទាំងការខ្ចីពីប្រទេសដែលមាន DTA និងការខ្ចីពីប្រទេសដែលមិនមាន DTA) សម្រាប់ឆ្នាំ ២០២១ និងកែតម្រូវអត្រាពន្ធកាត់ទុកលើកម្ចីរបស់ធនាគារ និងស្ថាប័នមីក្រូហិរញ្ញវត្ថុ ទាំងពីប្រភពខាងក្រៅ និងខាងក្នុងស្រុកឲ្យឡើងដល់កម្រិតធម្មតា ស្របតាមច្បាប់ និងបទប្បញ្ញត្តិជាធរមានវិញនៅឆ្នាំ ២០២២។
សម្រាប់កម្ចីចាស់ រដ្ឋាភិបាលសម្រេចទម្លាក់អត្រាពន្ធកាត់ទុកលើកម្ចីរបស់ធនាគារ និងស្ថាប័នមីក្រូហិរញ្ញវត្ថុទាំងពីរប្រភពខាងក្រៅ និងខាងក្នុងស្រុក មកនៅត្រឹម ១០% (ទាំងការខ្ចីពីប្រទេសដែលមាន DTA និងការខ្ចីពីប្រទេសដែលមិនមាន DTA) សម្រាប់ឆ្នាំ ២០២០។ កែតម្រូវអត្រាពន្ធកាត់ទុកលើកម្ចីរបស់ធនាគារ និងស្ថាប័នមីក្រូហិរញ្ញវត្ថុ ទាំងពីប្រភពខាងក្រៅ និងខាងក្នុងស្រុកឲ្យឡើងដល់កម្រិតធម្មតា ស្របតាមច្បាប់ និងបទប្បញ្ញត្តិជាធរមានវិញនៅឆ្នាំ ២០២១។
ចំពោះប្រភពហិរញ្ញប្បទានសម្រាប់ទុនបង្វិលក្រសួងសេដ្ឋកិច្ច និងហិរញ្ញវត្ថុ នឹងរៀបចំបង្កើត «មូលនិធិធានាឥណទាន» ជាមួយថវិកា ២០០ លានដុល្លារ។ មូលនិធិនេះអាចធានាឥណទានកម្ចីតាមរយៈធនាគារ និងមីក្រូហិរញ្ញវត្ថុ ដោយប្រើគោលការណ៍ទីផ្សារ ដើម្បីជួយសម្រាលសម្ពាធលំហូរសាច់ប្រាក់ និងទុនបង្វិលរបស់អាជីវកម្មធុរកិច្ចក្នុងគ្រប់វិស័យបានយ៉ាងតិចចំនួន ២ ០០០ លានដុល្លារអាមេរិក។
ទន្ទឹមនឹងនេះ ក្រសួងសេដ្ឋកិច្ច និងហិរញ្ញវត្ថុក៏នឹងត្រៀមថវិកាសម្រាប់ហិរញ្ញប្បទានបន្ថែមចំនួន ៣០០ លានដុល្លារដើម្បីគាំទ្រ និងដើរតួជាកាតាលីករជំរុញកំណើនតាមវិស័យសំខាន់ៗក្នុងអំឡុងពេលវិបត្តិ និងក្រោយពេលវិបត្តិ។ លើសពីនេះ រដ្ឋាភិបាលសម្រេចពង្រីកវិសាលភាពគ្របដណ្តប់ និងទំហំថវិកាសម្រាប់ «កម្មវិធីសាច់ប្រាក់ពលកម្ម» (Cash for work) នៅក្នុងឆ្នាំ ២០២០ ឲ្យឡើងដល់ ១០០ លានដុល្លារ ដើម្បីស្រូបយកកម្លាំងពលកម្មដែលបាត់បង់ការងារពីរោងចក្រ សហគ្រាស និងដែលបានវិលត្រឡប់មកពីបរទេសមកស្រុកកំណើតវិញផង ព្រមទាំងដើម្បីជួយទ្រទ្រង់ជីវភាពរស់នៅរបស់ប្រជាពលរដ្ឋនៅតាមមូលដ្ឋានជាទូទៅផង និងដើម្បីបង្កើតនូវសមិទ្ធផលសង្គមសេដ្ឋកិច្ចតាមរយៈការអនុវត្តគម្រោងកសាងហេដ្ឋារចនាសម្ព័ន្ធរូបវន្តតូចៗនៅតាមមូលដ្ឋានសំដៅលើកស្ទួយកសិកម្ម និងសេដ្ឋកិច្ចផងដែរ។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានថ្លែងក្នុងកម្មវិធីចុះបញ្ជីផ្លូវការភាគហ៊ុនរបស់ធនាគារអេស៊ីលីដាកាលពីថ្ងៃចន្ទថា ទន្ទឹមនឹងបង្កើនការចំណាយទៅលើវិស័យសុខាភិបាល រដ្ឋាភិបាលកម្ពុជាក៏បានដាក់ចេញនូវកញ្ចប់វិធានការបន្តបន្ទាប់ ដើម្បីរក្សាលំនឹងអាជីវកម្មដែលរងផលប៉ះពាល់ធ្ងន់ធ្ងរ និងជួយសម្រាលជីវភាពកម្មករ និយោជិត និងប្រជាពលរដ្ឋទូទៅផងដែរ។
លោកថ្លែងថា៖ «ជាក់ស្តែងយើងបានដាក់វិធានការ ៣ ជុំរួចមកហើយ ដើម្បីជួយស្រោចស្រង់វិស័យឯកជន ពិសេសវិស័យសំខាន់ៗដូចជា ទេសចរណ៍ អាកាសចរណ៍ និងវិស័យកាត់ដេរ វាយនភណ្ឌ ព្រមទាំងរក្សាលំនឹងជីវភាពកម្មករ-និយោជិត ដែលបម្រើការក្នុងវិស័យទាំងនេះដែលទទួលរងប៉ះពាល់ធ្ងន់ធ្ងរតាមរយៈការលើកទឹកចិត្ត និងការអនុគ្រោះផ្នែកសារពើពន្ធ ការអនុញ្ញាតមិនឲ្យបង់ប្រាក់វិភាគទានហានិភ័យការងារ និងថែទាំសុខភាព និងលើកលែងអនុគ្រោះឥណទានជាដើម»។
លោកបន្តថា ជាមួយគ្នានេះរដ្ឋាភិបាលគ្រោងនឹងដាក់ចេញកម្មវិធីជំនួយសង្គមដើម្បីជួយសម្រាលការលំបាក និងរក្សាលំនឹងជីវភាពប្រជាពលរដ្ឋតាមរយៈការអនុវត្តផ្ទេរសាច់ប្រាក់សម្រាប់ក្រុមគ្រួសារក្រីក្រ កម្មវិធីសាច់ប្រាក់ពលកម្ម ការបណ្តុះបណ្តាលជំនាញវិជ្ជាជីវៈរយៈពេលខ្លី ដើម្បីបង្កើនលទ្ធភាពក្នុងការបង្កើតអាជីវកម្មថ្មី និងឈានទៅចាប់យកការងារអាជីវកម្មថ្មីនៃហិរញ្ញប្បទានសម្រាប់ទុនបង្វិល ដើម្បីបំពេញតម្រូវការរោងចក្រ សហគ្រាស។
លោកថ្លែងថា៖ «ក្នុងស្មារតីបុរេសកម្មក្នុងទិសដៅស្តារសេដ្ឋកិច្ច និងសង្គមឡើងវិញ បន្ទាប់ពីជំងឺកូវីដ១៩ រដ្ឋាភិបាលក៏បានត្រៀមកញ្ចប់ថវិកាដោយផ្តោតលើការពង្រឹងភាពប្រកួតប្រជែងសេដ្ឋកិច្ច និងបង្កើនល្បឿនពិពិធកម្មសេដ្ឋកិច្ច»។
លោក ហុង វណ្ណៈ អ្នកសិក្សាស្រាវជ្រាវសេដ្ឋកិច្ចនៃរាជបណ្ឌិត្យសភាបានឲ្យដឹងថា វិធានការជុំទី ៤ នឹងផ្តល់ប្រយោជន៍ច្រើនដល់វិស័យឯកជនក្នុងការរក្សាលំនឹងអាជីវកម្មក្នុងអំឡុងការរាតត្បាតជំងឺកូវីដ ១៩ នេះ។ លោកនិយាយថា៖ «រាល់វិធានការទាំងអស់តែងតែជួយដល់ប្រជាពលរដ្ឋ ពិសេសវិស័យធុរកិច្ច ព្រោះធុរជនទាំងអស់កំពុងទន្ទឹងរង់ចាំការជួយជ្រោមជ្រែងពីរដ្ឋាភិបាលក្នុងអំឡុងពេលនេះ ប៉ុន្តែបើកូវីដ ១៩ បន្តអូសបន្លាយយូរ រដ្ឋាភិបាលក៏នឹងមានផលវិបាកក្នុងការជួយពួកគេដែរ»។
ជាមួយនឹងការប្តេជ្ញាបន្តអនុវត្តរាល់កម្មវិធីគាំពារសង្គមទាំងឡាយដែលមានស្រាប់ រាជរដ្ឋាភិបាលនឹងរៀបចំដាក់ឲ្យអនុវត្តនៅក្នុងខែមិថុនា ឆ្នាំ ២០២០ នេះនូវកម្មវិធីជំនួយសង្គមសំដៅជួយសម្រួលជីវភាពប្រចាំថ្ងៃនៅក្នុងអំឡុងពេលនៃវិបត្តិដោយសារជំងឺកូវីដ ១៩ នេះជូនដល់គ្រួសារប្រជាពលរដ្ឋក្រីក្រ និងក្រុមជនងាយរងគ្រោះដែលមានបណ្ណសមធម៌ ដោយយកចិត្តទុកដាក់បន្ថែមដល់កុមារអាយុក្រោម ៥ ឆ្នាំ ជនពិការ ជនចាស់ជរាអាយុចាប់ពី ៦០ ឆ្នាំ និងអ្នកផ្ទុកមេរោគអេដស៍នៅក្នុងគ្រួសារប្រជាពលរដ្ឋក្រីក្រទាំងនោះផងដែរ។
រាជរដ្ឋាភិបាលនឹងដាក់ឲ្យដំណើរការជាជំហានទី ១ នូវថ្នាលចុះបញ្ជីតាមប្រព័ន្ធអេឡិចត្រូនិកនៅដើមខែមិថុនា ឆ្នាំ ២០២០ នេះដើម្បីសម្រួល និងជំរុញដល់ការចុះបញ្ជីក្រុមហ៊ុនជាទូទៅ និងជាពិសេសជួយសម្រួលដល់ក្រុមហ៊ុនដែលមានបំណងចុះបញ្ជី ដើម្បីទទួលបានកម្ចីពីកម្មវិធីហិរញ្ញប្បទានពិសេសរបស់រាជរដ្ឋាភិបាល៕LA