ភ្នំពេញៈ កម្ពុជាផ្អាកការនាំចូលសាច់បង្កក និងមុខទំនិញបង្កកដែលមានហានិភ័យខ្ពស់មួយចំនួនទៀត ដែលមានប្រភពមកពីប្រទេសឥណ្ឌាជាបណ្តោះអាសន្នរហូតដល់មានការជូនដំណឹងជាថ្មី ដើម្បីបង្ហារការឆ្លងរីករាលដាលនៃជំងឺកូវីដ១៩ដែលកំពុងផ្ទុះខ្លាំងនៅប្រទេសមហាអំណាចសេដ្ឋកិច្ចក្នុងតំបន់មួយនេះ ។
វិធានការនេះត្រូវបានអនុវត្តកាលពីថ្ងៃទី ១ ខែឧសភា ឆ្នាំ ២០២១ តទៅ រហូតដល់មានការណែនាំជាថ្មី។
ដោយស្ថានភាពយ៉ាងធ្ងន់ធ្ងរនៃការឆ្លងរាលដាលជំងឺកូវីដ ១៩ បម្លែងថ្មី (B1617) ប្រភពនៅប្រទេសឥណ្ឌា និងអនុលោមតាមការណែនាំរបស់ក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានគយ និងរដ្ឋាករកម្ពុជាបានណែនាំឲ្យអនុវត្តជាបណ្តោះអាសន្នលើការនាំចូលសាច់បង្កក និងមុខទំនិញបង្កកដែលមានហានិភ័យផ្សេងទៀតមានប្រភពមកពីប្រទេសឥណ្ឌា។
នេះបើយោងតាមលិខិតណែនាំដល់ប្រធាននាយកដ្ឋាន សាខា និងការិយាល័យគយ និងរដ្ឋករចុះថ្ងៃទី ១ ឧសភាលិខិតនេះឲ្យដឹងទៀត អគ្គនាយកដ្ឋានគយ និងរដ្ឋាករក៏ព្យួរការបំពេញបែបបទបញ្ចេញទំនិញពីគយចំពោះប្រភេទទំនិញទាំងនោះដែលបានមកដល់ទីលានគយ ឬសន្និធិគយនានារួចហើយផងដែរ។
ការសម្រេចផ្អាកនាំចូលនេះត្រូវបានធ្វើឡើង បន្ទាប់ពីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានស្នើសុំគោលការណ៍អនុញ្ញាតពីលោក ហ៊ុន សែន នាយករដ្ឋមន្ត្រីកាលពីថ្ងៃទី ៣០ មេសា។
ក្នុងលិខិតរបស់លោករដ្ឋមន្ត្រីឲ្យដឹងថា ការឃាត់ទំនិញដែលបាននាំចូលរួចហើយ និងផ្អាកការនាំចូលជាបណ្តោះអាសន្នសាច់បង្កកគឺស្របតាមមាត្រា ២០ នៃកិច្ចព្រមព្រៀងទូទៅស្តីពីពន្ធគយ និងពាណិជ្ជកម្មនៃអង្គការពាណិជ្ជកម្មពិភពលោក (WTO) និងមាត្រា ១២ នៃកិច្ចព្រមព្រៀងស្តីពីពាណិជ្ជកម្មទំនិញរវាងអាស៊ាន-ឥណ្ឌា ដោយឈរលើមូលដ្ឋានកិច្ចការពារសុខភាពសាធារណៈជាបន្ទាន់។
លិខិតសំណើនេះបន្ថែមទៀតថា កម្ពុជាក៏នឹងធ្វើការស្រាវជ្រាវ និងធ្វើតេស្តរកវីរុសផ្សេងៗទៀត ពិសេសវីរុសកូរ៉ូណាលើសាច់ និងមុខទំនិញបង្កកដែលមានហានិភ័យខ្ពស់ទាំងនេះ ដែលកិច្ចការនេះនឹងស្នើសុំកិច្ចសហការជាមួយរដ្ឋាភិបាលឥណ្ឌា ដើម្បីស្វែងរកប្រភព និងបញ្ជាក់ពីការពាក់ព័ន្ធដែលជាអ្នកបម្រើការផលិត វេចខ្ចប់ បង្កក និងដឹកជញ្ជូននូវផលិតផលទាំងនេះ។
ក្នុងករណីរកឃើញថា ផលិតផលទាំងនោះមានជាប់ពាក់ព័ន្ធ និងមានផ្ទុកវីរុសកូវីដ១៩ កម្ពុជានឹងអនុវត្តវិធានការច្បាប់ រួមទាំងកម្ទេចផលិតផលសាច់បង្កក និងមុខទំនិញបង្កកនាំចូលពីប្រទេសឥណ្ឌា ដូច្នេះដើម្បីចៀសវាងការភាន់ច្រឡំ ក្រសួងពាណិជ្ជកម្មនឹងធ្វើការពន្យល់ទៅភាគីឥណ្ឌាតាមការទូត។
ទោះបីយ៉ាងណារហូតមកដល់ពេលនេះពុំទាន់មានការបញ្ជាក់ណាមួយ ឬឯកសារវិទ្យាសាស្ត្រ (Scientific Study) ណាមួយពីស្ថាប័នអន្តរជាតិ ពិសេសអង្គការសុខភាពពិភពលោកថាមានការឆ្លងវីរុសកូវីដ១៩តាមរយៈការវេចខ្ចប់ ឬសាច់ស្រស់នៅឡើយទេ។
ទន្ទឹមនឹងនេះ អង្គការស្បៀង និងកសិកម្មសហប្រជាជាតិ (FAO) និងរដ្ឋបាលចំណីអាហារ និងឱសថអាមេរិក (US FDA) ធ្លាប់បានបញ្ជាក់ថាគ្មានទិន្នន័យណាបង្ហាញថាការឆ្លងជំងឺកូវីដ១៩បណ្តាលមកពីសម្បកវេចខ្ចប់ និងសាច់បង្កកនោះទេ ប៉ុន្តែរដ្ឋាភិបាលប្រទេសមួយចំនួនរួមទាំងប្រទេសចិនធ្លាប់បានចាត់វិធានការបង្ការហានិភ័យតាមរយៈការហាមឃាត់ និងដុតកម្ទេចចោលផលិតផលដែលមានហានិភ័យទាំងនេះ។ នេះបើតាមលិខិតសំណើរបស់លោករដ្ឋមន្ត្រី។
ដោយឡែក ការត្រួតពិនិត្យ និងធ្វើតេស្តពិនិត្យរកកូវីដ១៩លើសាច់បង្កក និងមុខទំនិញដែលមានហានិភ័យខ្ពស់គឺជាវិធានការហានិភ័យនេះអាចត្រូវបានបកស្រាយក្រោមក្របខ័ណ្ឌអនាម័យ និងភូតគាមអនាម័យក្នុងឧបសម្ព័ន្ធ «ក» នៃកិច្ចព្រមព្រៀងស្តីពីអនាម័យ និងភូតគាមអនាម័យនៃអង្គការ WTO ដែលមាត្រា ៥ នៃកិច្ចព្រមព្រៀងនេះតម្រូវឲ្យមានការបញ្ជាក់ពីភាពចាំបាច់ និងមូលហេតុនានា ដោយផ្អែកលើភ័ស្តុតាងបែបវិទ្យាសាស្ត្រត្រឹមត្រូវមុននឹងឈានដល់ការប្រើប្រាស់វិធានការអនាម័យ និងភូតគាមអនាម័យ ដូចកម្ពុជាគម្រោងនឹងចាត់ការនេះ៕