.jpg)
បុគ្គលិករបស់គ្រឹះស្ថានមីក្រូហិរញ្ញវត្ថុទទួលប្រាក់សងត្រឡប់ពីអតិថិជន។ ហេង ជីវ័ន
ភ្នំពេញ៖ លោកនាយករដ្ឋមន្ត្រី ហ៊ុន សែន បានស្វាគមន៍ជាមួយវិធានការ ៦ ចំណុចពីគ្រឹះស្ថានហិរញ្ញវត្ថុបានដាក់ចេញកាលពីពេលថ្មីៗនេះ និងបានស្នើសុំឲ្យមានការរៀបចំឥណទានឡើងវិញបន្ថែមទៀតដល់អ្នករងផលប៉ះពាល់ក្នុងព្រឹត្តិការណ៍សហគមន៍ ២០ កុម្ភៈ។
ការថ្លែងរបស់លោកនាយករដ្ឋមន្ត្រីធ្វើឡើងក្នុងសេចក្តីថ្លែងសារពិសេសស្តីពីស្ថានភាពជំងឺកូវីដ១៩នៅថ្ងៃទី ១០ មេសាបានថ្លែងអំណរគុណដល់សមាគមមីក្រូហិរញ្ញវត្ថុ និងសមាគមធនាគារកម្ពុជាកាលពីថ្ងៃទី ៧ ខែមេសាដោយបានដាក់ចេញនូវវិធានការ ៦ ចំណុចក្នុងការរៀបចំឥណទានឡើងវិញសម្រាល់បន្ទុកដល់អ្នកឆ្លងជំងឺកូវីដ១៩ និងកំពុងធ្វើចត្តាឡីស័ក ប៉ុន្តែលោកស្នើសុំបន្ថែមដោយលើកលែងការផាកពិន័យ និងលើកលែងការបង់ការប្រាក់យ៉ាងតិចឲ្យបាន ២ ខែទៀតពីវិធានការបច្ចុប្បន្ន។
លោក ហ៊ុន សែន ថ្លែងថា៖ «ខ្ញុំសុំស្នើក្នុងការផ្តល់វិសាលភាពដល់កម្មកររោងចក្របាត់បង់ការងារដែលជាប់ពាក់ព័ន្ធនឹងជំងឺកូវីដ១៩ បើសិនគ្រួសារកម្មករជាប់បំណុលគួរអនុគ្រោះឲ្យគាត់ គ្រាន់តែរោងចក្រមួយមានកម្មករ ឆ្លងជំងឺកូវីដ១៩ ចំនួនជាង ៦០០ នាក់សូមអធ្យាស្រ័យបានទៅដល់ក្រុមគ្រួសារគាត់ ខ្ញុំសូមសិក្សាពីបញ្ហានេះ ដូច្នេះពួកគាត់គួរត្រូវបានផ្អាកការសង និងការផាកពិន័យដោយរៀបចំឥណទានឡើងវិញត្រូវរៀបចំជាក់ស្តែង»។
ជាមួយគ្នានេះ លោក ហ៊ុន សែន ក៏បានស្នើឲ្យមានការរៀបចំហិរញ្ញប្បទានពិសេស ឬបន្ថែម ព្រមទាំងធ្វើការបញ្ចុះអត្រាការប្រាក់គ្រប់គ្រឹះស្ថានហិរញ្ញវត្ថុទាំងអស់។
លោកឲ្យដឹងទៀតថា៖ «រៀបចំបញ្ចេញឥណទានសង្គ្រោះបន្ទាន់ ឬបន្ថែមដោយបន្ធូរបន្ថយលក្ខខណ្ឌ ព្រមទាំងកាត់បន្ថយអត្រាការប្រាក់ដើម្បីបន្ត និងស្តារឡើងវិញសេដ្ឋកិច្ចគ្រួសារ និងអាជីវកម្មមុន និងក្រោយពេលមានវិបត្តិ។ ខ្ញុំសូមឲ្យសមាគមធនាគារ និងធនាគារជាតិនៃកម្ពុជាធ្វើកិច្ចការងារនេះជាមួយគ្រឹះស្ថានមីក្រូហិរញ្ញវត្ថុ និងគ្រឹះស្ថានធនាគារទាំងអស់»។
វិធានការទាំងនោះទាំង ៦ ចំនុចដែលបានដាក់ចេញរួមគ្នាដោយសមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុកម្ពុជា (CMA)រួមមាន៖ ទី ១ សម្រាប់អតិថិជនដែលឆ្លងជំងឺកូវីដ១៩ លើកលែងការបង់ការប្រាក់ និងរាល់ការផាកពិន័យទាំងអស់រយៈពេលយ៉ាងតិច ១ ខែព្រមទាំងទទួលបានការរៀបចំឥណទានឡើងវិញដោយស្វ័យប្រវត្តិ (បើអតិថិជនយល់ព្រម) រួមទាំងការពន្យារការបង់ប្រាក់ដើមរយៈពេល ៣ ខែ។ រាល់អតិថិជនដែលឆ្លងជំងឺកូវីដ ១៩ ត្រូវបង្ហាញលទ្ធផលតេស្តវិជ្ជមានកូវីដ ១៩ ចេញដោយអាជ្ញាធរមានសមត្ថកិច្ច, ទី២. សម្រាប់អតិថិជនដែលជាប់ធ្វើចត្តាឡីស័កផ្តល់ការរៀបចំឥណទានឡើងវិញដោយស្វ័យប្រវត្តិ (បើអតិថិជនយល់ព្រម) រួមទាំងពន្យារការបង់ទាំងប្រាក់ដើម និងការប្រាក់រយៈពេល ១ ខែ និងលើកលែងការផាកពិន័យទាំងអស់, ទី ៣. បន្តធ្វើការផ្តល់ជូនការរៀបចំឥណទានឡើងវិញឱ្យបានឆាប់រហ័ស និងបង្កលក្ខណៈងាយស្រួលសម្រាប់អតិថិជនដែលរងផលប៉ះពាល់ពីជំងឺកូវីដ ១។ ទី ៤. បញ្ចេញឥណទានសង្គ្រោះបន្ទាន់ ឬបន្ថែម ដោយបន្ធូរបន្ថយ លក្ខខណ្ឌព្រមទាំងកាត់បន្ថយអត្រាការប្រាក់ដើម្បីជួយបន្ត និងស្តារឡើងវិញនូវសេដ្ឋកិច្ចគ្រួសារ និងអាជីវកម្មមុន និងក្រោយពេលមានវិបត្តិ។ ទី ៥. ធ្វើការរៀបចំឥណទានឡើងវិញ ព្រមទាំងលើកលែងរាល់ការផាកពិន័យទាំងអស់សម្រាប់អតិថិជនដែលទិញផ្ទះផ្ទាល់ខ្លួនទី ១ សម្រាប់រស់នៅ និងទី ៦. ផ្តល់នូវការអនុគ្រោះសម្រាប់អតិថិជនដែលទទួលមរណភាពដោយជំងឺកូវីដ១៩ តាមលទ្ធភាពជាក់ស្តែងរបស់គ្រឹះស្ថាននីមួយ៕
