ភ្នំពេញ: រដ្ឋាភិបាលហុងគ្រី និងឆែកបានគាំទ្រកម្ពុជាលើបញ្ហា EBA ខណៈសភាពាណិជ្ជកម្មអឺរ៉ុបប្រចាំនៅកម្ពុជាបានសម្តែងក្តីកង្វល់ជាថ្មីពីដំណើរការឆ្ពោះទៅការដកហូតភាពអនុគ្រោះពាណិជ្ជកម្ម EBA ពីកម្ពុជា។
ក្នុងជំនួបពិភាក្សារវាងលោក ហ៊ុន សែន នាយករដ្ឋមន្ត្រីកម្ពុជាជាមួយលោក Janos ADER ប្រធានាធិបតីនៃសាធារណរដ្ឋហុងគ្រីកាលពីថ្ងៃទី ១៥ ខែតុលា លោក ហ៊ុន សែន បានឲ្យដឹងថា រដ្ឋាភិបាលហុងគ្រីបានគាំទ្រកម្ពុជាដែលចង់ឲ្យសហភាពអឺរ៉ុបផ្តល់យុត្តិធម៌បញ្ហា EBA។ នេះបើតាមទំព័រហ្វេសប៊ុកផ្លូវការរបស់នាយករដ្ឋមន្ត្រី។
លោក ហ៊ុន សែន ថ្លែងថា៖ «ប្រធានាធិបតីហុងគ្រី មានប្រសាសន៍ថា ហុងគ្រី គឺជាមិត្តមួយរបស់កម្ពុជា។ រដ្ឋាភិបាលហុងគ្រីនៅតែបន្តគាំទ្រដល់កម្ពុជា ជាពិសេសទាក់ទងទៅនឹងបញ្ហា EBA នេះ»។
ជាមួយគ្នានេះសភាពាណិជ្ជកម្មអឺរ៉ុបប្រចាំកម្ពុជា (EuroCham) នៅសប្តាហ៍នេះបានសម្តែងក្តីកង្វល់ជាថ្មីពីដំណើរការឆ្ពោះទៅការដកហូតភាពអនុគ្រោះពន្ធ EBA នេះដែលនឹងធ្វើឲ្យប៉ះពាល់ដល់ប្រយោជន៍ពាណិជ្ជកម្មយូរអង្វែងរបស់សហភាពអឺរ៉ុបនៅកម្ពុជា។ នេះបើតាមសេចក្តីប្រកាសព័ត៌មាន EuroCham ចេញផ្សាយកាលពីថ្ងៃទី ១៥ ខែតុលា ។
EuroCham បានស្នើសុំជួបពិភាក្សាជាមួយគណៈកម្មការអឺរ៉ុបក្នុងការវាយតម្លៃអំពីដំណើរការព្យួរ EBA ដើម្បីលើកឡើងពីស្ថានភាពនៅកម្ពុជា និងក្តីកង្វល់របស់ផ្នែកឯកជនអឺរ៉ុប។ នេះបើតាមសេចក្តីប្រកាសព័ត៌មាន។
សេចក្តីប្រកាសព័ត៌មាន៖ «យើងនៅតែសង្ឃឹមថានឹងមានការចរចាបន្តទៀតដើម្បីស្វែងរកឱ្យឃើញនូវវិធីកាន់តែប្រសើរសម្រាប់ឆ្លើយតបទៅនឹងក្តីកង្វល់នានារបស់សហភាពអឺរ៉ុប»។
សភាពាណិជ្ជកម្មអឺរ៉ុបបានស្នើសុំជួបជាមួយលោកស្រី Cecilia Malmstrom ស្នងការទទួលបន្ទុកពាណិជ្ជកម្មក្នុងឱកាសសម័យប្រជុំកំពូលរវាង អាស៊ី-អឺរ៉ុប នៅទីក្រុងប្រ៊ុចសែល និងសុំឲ្យសមាជិករបស់ខ្លួនអាចចូលរួមក្នុងការពិភាក្សាវាយតម្លៃអំពីដំណើរការនេះ។
សេចក្តីប្រកាសព័ត៌មាន៖ «សមាជិករបស់សភាអឺរ៉ុបពិតជាមានបទពិសោធផ្ទាល់ជាដុំកំភួននៅកម្ពុជា ហើយស្ថិតក្នុងស្ថានភាពមួយដ៏ប្រសើរបំផុតក្នុងការផ្តល់ព័ត៌មានផែ្អកលើអង្គហេតុជាក់លាក់ស្តីពីស្ថានភាពនៅកម្ពុជា ដូច្នេះពួកយើងគួរតែទទួលបានឱកាសចូលរួមនៅក្នុងការពិភាក្សាវាយតម្លៃអំពីដំណើរការព្យួរ ឬដកហូតភាពអនុគ្រោះ EBA»។
EuroCham បានឲ្យដឹងថា អភិក្រមនេះនឹងធានាឲ្យសហភាពអឺរ៉ុបប្រមូលបាននូវការវាយតម្លៃត្រឹមត្រូវ និងពេញលេញអំពីបរិស្ថានសេដ្ឋកិច្ចនៅក្នុងប្រទេសកម្ពុជា។
សេចក្តីប្រកាសព័ត៌មាននេះបានឲ្យដឹងថា ការចាប់ផ្តើមព្យួរប្រព័ន្ធអនុគ្រោះពន្ធ EBA ឬក៏ការដាក់ទណ្ឌកម្មជាឯកតោភាគីរយៈពេលខ្លីណាមួយអាចធ្វើឲ្យប៉ះពាល់អវិជ្ជមានយូរអង្វែង ដែលវាមិនមែនជាឧបករណ៍មួយមានប្រសិទ្ធភាពសម្រាប់កែលម្អដំណើរការប្រជាធិបតេយ្យឲ្យប្រសើរឡើង ដូចកិច្ចសហប្រតិបត្តិការនោះទេ។
សេចក្តីប្រកាសព័ត៌មាន៖ «ក្នុងករណីព្យួរ EBA នៅកម្ពុជានឹងដើរផ្ទុយពីរបៀបវារៈពាណិជ្ជកម្មរបស់សហភាពអឺរ៉ុប និងការប្តេជ្ញាចិត្តរបស់ខ្លួនចំពោះការបញ្ចូល ប្រទេសកំពុងអភិវឌ្ឍន៍ទៅក្នុងសេដ្ឋកិច្ចពាណិជ្ជកម្មពិភពលោក ហើយក៏ផ្ទុយពីគោលការណ៍អឺរ៉ុបក្នុងការប្រើប្រាស់ពាណិជ្ជកម្មជាវ៉ិចទ័រសំខាន់សម្រាប់សាយភាយគុណតម្លៃប្រជាធិបតេយ្យ»។
ធនាគារពិភពលោក និងមូលនិធិរូបិយវត្ថុអន្តរជាតិ (IMF) សុទ្ធតែបានលើកឡើងពីផលប៉ះពាល់របស់កម្ពុជាបើសហភាពអឺរ៉ុបព្យួរប្រព័ន្ធអនុគ្រោះពន្ធ EBA នេះដែលជាផ្នែកមួយនឹងធ្វើឲ្យរាំងស្ទះដល់កំណើនសេដ្ឋកិច្ចកម្ពុជា។
ទោះបីយ៉ាងនេះក្តីទាំងធនាគារពិភពលោក និង IMF នៅតែរក្សាការព្យាករកំណើនសេដ្ឋកិច្ចកម្ពុជាក្នុងអត្រាខ្ពស់ ៧ ភាគរយឆ្នាំ ២០១៩ ខណៈនឹងធ្លាក់ចុះបន្តិចនៅឆ្នាំ ២០២០។
លោក Jarkko Turunen ប្រធានក្រុមមូលនិធិរូបិយវត្ថុអន្តរជាតិ (IMF) បានឲ្យដឹងថា រដ្ឋាភិបាលកម្ពុជាកំពុងសកម្មក្នុងការដោះស្រាយហានិភ័យចំពោះភាពមិនច្បាស់លាស់ដែលបង្កឡើងដោយភាពតានតឹងពាណិជ្ជកម្ម និងលទ្ធភាពនៃការដកប្រព័ន្ធអនុគ្រោះពន្ធពីអឺរ៉ុប EBA តាមរយៈផែនការកំណែទម្រង់រចនាសម្ព័ន្ធដើម្បីលើកកម្ពស់ការប្រកួតប្រជែង និងការធ្វើពិពិធកម្ម។
សភាពាណិជ្ជកម្មអឺរ៉ុបប្រចាំនៅប្រទេសកម្ពុជាបានតំណាងឲ្យធុរកិច្ចវិស័យឯកជនចំនួន ៣៣៥ មកពីប្រទេសបារាំង អាល្លឺម៉ង់ ចក្រភពអង់គ្លេស អ៊ីតាលី ដាណឺម៉ាក ស៊ុយអែត ន័រវែស ហ្វាំងឡង់ អ៊ីស្លង់ ដែលមាននិយោជិតជាង ៥០០០០ នាក់៕LA