ភ្នំពេញ: គណៈរដ្ឋមន្ត្រី និងក្រុមប្រឹក្សាអភិវឌ្ឍន៍កម្ពុជាកាលពីថ្ងៃសុក្របានអនុម័តគម្រោងវិនិយោគហេដ្ឋារចនាសម្ព័ន្ធអគ្គិសនីទំហំទឹកប្រាក់ជិត ១ ២០០ លានដុល្លារ សម្រាប់គម្រោងវារីអគ្គិសនីតាតៃលើ ខ្សែបញ្ជូន និងរោងចក្រថាមពលដើរដោយធ្យូងថ្ម។
សេចក្តីប្រកាសព័ត៌មានស្តីពីលទ្ធផលនៃសម័យប្រជុំពេញអង្គគណៈរដ្ឋមន្ត្រីដែលដឹកនាំដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ២៣ តុលា បានឱ្យដឹងថា គណៈរដ្ឋមន្ត្រីបានឯកភាពលើគម្រោងអភិវឌ្ឍន៍វារីអគ្គិសនីស្ទឹងតាតៃលើដែលមានអានុភាព ១៥០ មេហ្គាវ៉ាត់ នៅស្រុកថ្មបាំង ខេត្តកោះកុង។
គម្រោងវិនិយោគនេះនឹងត្រូវបានសាងសង់ដោយក្រុមហ៊ុន China National Heavy Machinery Corporation (CHMC) របស់ក្រុមហ៊ុនចិនដែលវិនិយោគក្នុងតម្លៃជាង ៣៨៩ លានដុល្លារ។
គណៈរដ្ឋមន្ត្រីឲ្យដឹងបន្តថា៖ «គម្រោងនេះនឹងត្រូវធ្វើឡើងក្រោមរូបភាពជាគម្រោងវិនិយោគសាងសង់ដំណើរការផ្ទេរ (Build-Operation-Transfer) ដែលទទួលបានសម្បទានរយៈពេល ៣៩ ឆ្នាំក្នុងនោះ ៤ ឆ្នាំសម្រាប់ការសាងសង់និង ៣៥ ឆ្នាំសម្រាប់ការធ្វើអាជីវកម្ម»។
គណៈរដ្ឋមន្ត្រីក៏បានអនុម័តគម្រោងសាងសង់ខ្សែបណ្ដាញបញ្ជូនអគ្គិសនី ៥០០ គីឡូវ៉ុល ពីភ្នំពេញទៅព្រំដែនកម្ពុជា-ឡាវ មានប្រវែង ១៩៩,៥២ គីឡូម៉ែត្រដោយចំណាយវិនិយោគក្នុងតម្លៃជាង ៣៣០ លានដុល្លារ ដោយរយៈពេលសម្បទានសរុប ២៨ ឆ្នាំ ក្នុងនោះ ៣ ឆ្នាំជារយៈពេលសាងសង់។
គណៈរដ្ឋមន្ត្រីក៏បានអនុម័តគម្រោងវិនិយោគខ្សែបណ្តាញបញ្ជូនអគ្គិសនី ៥០០ គីឡូវ៉ុលប្រវែង ១០៧ គីឡូម៉ែត ពីខេត្តបាត់ដំបងទៅព្រំដែនកម្ពុជា-ថៃ ក្នុងទំហំទឹកប្រាក់វិនិយោគជិត ១១១ លានដុល្លារ ដែលសម្បទានរយៈពេល ៣៩ ឆ្នាំក្នុងនោះ ៤ ឆ្នាំសម្រាប់ការសាងសង់ និង ៣៥ ឆ្នាំសម្រាប់ការធ្វើអាជីវកម្ម។
ក្រុមហ៊ុន SchneiTec Co., Ltd នឹងវិនិយោគលើគម្រោងខ្សែបញ្ជូនទាំង ២ នេះ ក្រោមរូបភាពវិនិយោគសាងសង់ដំណើរការផ្ទេរ (Build-Operation-Transfer)។
លោក ផៃ ស៊ីផាន អ្នកនាំពាក្យរដ្ឋាភិបាលបានឱ្យដឹងថា តាមរយៈគម្រោងទាំងនេះរដ្ឋាភិបាលនឹងទទួលបានចំណូលពន្ធ និងអាករលើតម្លៃបន្ថែមជាង ៣៤០ លានដុល្លារ ដោយជិត ២០០ លានដុល្លារបានពីពន្ធលើប្រាក់ចំណូល ពន្ធកាត់ទុកលើចំណាយការប្រាក់ និងពន្ធកាត់ទុកលើការបែងចែកភាគលាភក្នុងរយៈពេលសម្បទាន ៣៩ ឆ្នាំ និងជិត ១៤៤ លានដុល្លារបានពីពន្ធលើអាករលើតម្លៃបន្ថែម (VAT) សរុបជាង ១៤៤ លានដុល្លារក្នុងរយៈពេល ៣៥ ឆ្នាំនៃអាណត្តិប្រតិបត្តិការអាជីវកម្មដែលប្រាក់ចំណូលពន្ធខាងលើនេះពុំទាន់គិតបញ្ចូលចំណូលពន្ធមួយចំនួនទៀតដូចជា ពន្ធលើប្រាក់បៀវត្សរ៍ ពន្ធកាត់ទុកលើការជួលនានា និងពន្ធដោយប្រយោលដទៃទៀត។
បរិមាណមូលដ្ឋាននៃថាមពលអគ្គិសនីផលិតប្រចាំឆ្នាំលក់ឱ្យអគ្គិសនីកម្ពុជាគឺជាមធ្យម ៥២៧ លានគីឡូវ៉ាត់ម៉ោង ហើយលក់ក្នុងតម្លៃ ៧,៩២ សេនដុល្លារក្នុង ១ គីឡូវ៉ាត់ម៉ោង។ នេះបើតាមសេចក្តីប្រកាសព័ត៌មាន។
កាលពីថ្ងៃសុក្រកន្លងទៅនេះដែរ ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចុះបញ្ជីជាស្ថាពរជូនក្រុមហ៊ុន Oddormeanchey Power Industrial Co.លើគម្រោងសាងសង់រោងចក្រអគ្គិសនីដើរដោយធ្យូងថ្ម អានុភាព ២៦៥ មេហ្គាវ៉ាត់ស្ថិតនៅស្រុកត្រពាំងប្រាសាទ ខេត្តឧត្តរមានជ័យ ជាមួយទុនវិនិយោគ ២៩៤,៣ លានដុល្លារ។
CDC ក៏បានចុះបញ្ជីឱ្យ ODM Power Line Company Co. វិនិយោគជាង ៦១ លានដុល្លារសាងសង់ខ្សែបញ្ជូនតង់ស្យុង ២៣០ គីឡូវ៉ុលតភ្ជាប់ពីរោងចក្រអគ្គិសនីនៅខេត្តឧត្តរមានជ័យទៅកាន់ខេត្តសៀមរាប៕LA