.jpg)
គម្រោងសង់សណ្ឋាគារជាច្រើនបានលេចឡើងក្នុងខេត្តព្រះសីហនុ។ រូបថត រ៉ាហ៊ីម
ភ្នំពេញៈ រដ្ឋាភិបាលបានអនុម័តលើគម្រោងសាងសង់សណ្ឋាគារលំដាប់ផ្កាយ ៥ មួយកន្លែងនៅក្នុងខេត្តព្រះសីហនុដែលមានទុនវិនិយោគជាង ១០០ លានដុល្លារ ដោយមន្ត្រីអះអាងថា ការសាងសង់សណ្ឋាគារប្រណីតៗ គឺដើម្បីត្រៀមស្វាគមន៍ភ្ញៀវទេសចរក្រោយកូវីដ ១៩ ត្រូវបានបញ្ចប់។
ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃសុក្របានចេញវិញ្ញាបនបត្រចុះបញ្ជីជាស្ថាពរឲ្យក្រុមហ៊ុន Yong Wang (Cambodia) Co., Ltd ដើម្បីសាងសង់ និងធ្វើអាជីវកម្មសណ្ឋាគារលំដាប់ផ្កាយ ៥ ដែលមាន ៧០០ បន្ទប់ ដោយមានទុនវិនិយោគ ១០៨ លានដុល្លារ និងបង្កើតការងារបាន ៨៥៨ កន្លែង។ គម្រោងនេះស្ថិតនៅសង្កាត់លេខ ៤ ក្រុងព្រះសីហនុ។
លោក ឃាង ភារម្យ អ្នកនាំពាក្យសាលាខេត្តព្រះសីហនុប្រាប់ភ្នំពេញ-ប៉ុស្តិ៍កាលពីថ្ងៃចន្ទថា ខេត្តព្រះសីហនុគឺជាតំបន់ដែលមានសក្តានុពលអេកូទេសចរណ៍នឹងនៅតែជាគោលដៅទាក់ទាញវិនិយោគផ្ទាល់ពីបរទេស បើទោះជំងឺកូវីដ ១៩ កំពុងធ្វើឲ្យប៉ះពាល់ដល់សេដ្ឋកិច្ចពិភពលោកក៏ដោយ។
លោកបានថ្លែងថា៖ «ការសាងសង់ ឬគម្រោងវិនិយោគនានា ជាពិសេសការសាងសង់សណ្ឋាគារផ្កាយ ៥ នេះគឺជាវិស័យអាទិភាព ឬជាមាសបៃតងរបស់កម្ពុជា។ វិស័យនេះមិនត្រឹមតែបង្កើតកាលានុវត្តភាពការងារ និងប្រាក់ចំណូលប៉ុណ្ណោះទេ តែថែមទាំងទាក់ទាញការវិនិយោគផ្ទាល់ពីបរទេស និងក្នុងស្រុកផងដែរ»។
លោកបន្ថែមថា ការកែលម្អប្រព័ន្ធហេដ្ឋារចនាសម្ព័ន្ធផ្លូវថ្នល់ លូបង្ហូរទឹក ការរៀបចំឆ្នេរសមុទ្រឡើងវិញ និងការរៀបចំតំបន់អេកូទេសចរណ៍នានានៅតាមបណ្តាកោះទាំង ៣២ កំពុងទាក់ទាញការវិនិយោគ និងភ្ញៀវទេសចរបានយ៉ាងច្រើន។
បច្ចុប្បន្ននៅខេត្តព្រះសីហនុមានសណ្ឋាគារចំនួន ១០៧ កន្លែង ហើយខេត្តនេះមានក្រុមហ៊ុនចំនួន ៣៣ ដែលវិនិយោគលើវិស័យសេវាកម្មស្នាក់នៅផ្សារទំនើប និងតំបន់អភិវឌ្ឍន៍ទេសចរណ៍។ នេះបើតាមលោក ភារម្យ។
លោកប្រាប់ទៀតថា ជំងឺកូវីដ១៩ បានធ្វើឲ្យភ្ញៀវទេសចរអន្តរជាតិធ្លាក់ចុះ តែសម្រាប់ភ្ញៀវទេសចរក្នុងស្រុកគឺកំពុងមាននិន្នាការកើនឡើងវិញ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងថា ក្នុងរយៈពេល ២ សប្តាហ៍ដើមខែឧសភា ឆ្នាំ ២០២០ នេះចលនាទេសចរក្នុងស្រុកបានបន្តកើនឡើងជាបណ្តើរវិញហើយ ជាក់ស្តែងមានភ្ញៀវទេសចរជាង ២៥ ម៉ឺននាក់បានធ្វើដំណើរកម្សាន្តនៅទូទាំងប្រទេស។ លោកកត់សម្គាល់ថា ភ្ញៀវភាគច្រើនធ្វើដំណើរទៅតំបន់អេកូទេសចរណ៍នៅភូមិភាគឦសាន ភាគនិរតី និងតំបន់ឆ្នេរ ពិសេសខេត្តព្រះសីហនុ ខេត្តកំពត និងខេត្តកែប។
លោកថ្លែងថា៖ «ចំពោះមុខនៃការកើនឡើងចលនាទេសចរផ្ទៃក្នុងនេះ ក្រសួងទេសចរណ៍បានសហការជាមួយវិស័យឯកជនរៀបចំនូវវិធានការស្តង់ដាពិសេសសម្រាប់សុវត្ថិភាពទេសចរណ៍ រួមមានក្រមប្រតិបត្តិ និងគោលការណ៍ណែនាំចាំបាច់មួយចំនួនបន្ថែមពីលើវិធានការសុវត្ថិភាព និងអនាម័យដែលចេញដោយក្រសួងសុខាភិបាល»៕ LA
