ភ្នំពេញៈ គណៈរដ្ឋមន្ត្រីកម្ពុជាបានអនុម័តគម្រោងអភិវឌ្ឍន៍សាងសង់រោងចក្រអគ្គិសនីដុតធ្យូងថ្មចំនួន ២ កន្លែង និងគម្រោងអភិវឌ្ឍន៍ខ្សែបណ្តាញបញ្ជូនចំនួន ១ ដែលមានតម្លៃវិនិយោគសរុបជាង ១,៧ ពាន់លានដុល្លារ។ នេះបើយោងតាមខ្លឹមសារនៃកិច្ចប្រជុំពេញអង្គរបស់គណៈរដ្ឋមន្ត្រី។
សេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រីកាលពីថ្ងៃសុក្របានឲ្យដឹងថា ស្របតាមផែនការមេអភិវឌ្ឍន៍ប្រភពអគ្គិសនីបន្ថែមពីឆ្នាំ ២០២០ ទៅដល់ឆ្នាំ ២០៣០ រដ្ឋាភិបាលបានសម្រេចអនុម័តគម្រោងអភិវឌ្ឍន៍រោងចក្រអគ្គិសនីដុតធ្យូងថ្មចំនួន ២ ទីតាំង។
សេចក្តីប្រកាសនេះបន្តថា ក្រុមហ៊ុន Han Seng Coal Mines Co., Ltd (HSCMC) នឹងធ្វើការវិនិយោគលើគម្រោងអភិវឌ្ឍន៍រោងចក្រអគ្គិសនីដុតធ្យូងថ្ម ដែលអាចផលិតថាមពលបាន ២៦៥ មេហ្គាវ៉ាត់នៅស្រុកត្រពាំងប្រាសាទ ខេត្តឧត្តរមានជ័យដោយប្រើរ៉ែធ្យូងថ្មដែលមាននៅក្នុងតំបន់នោះ ខណៈដែលគម្រោងអភិវឌ្ឍន៍រោងចក្រអគ្គិសនីដុតធ្យូងថ្ម (ធ្យូងថ្មនាំចូលពីក្រៅប្រទេស) មួយទៀតនឹងត្រូវវិនិយោគដោយក្រុមហ៊ុន Royal Group ដែលអាចផលិតថាមពលបាន ៧០០ មេហ្គាវ៉ាត់ស្ថិតនៅស្រុកបទុមសាគរ ខេត្តកោះកុង។
ជាមួយគ្នានេះក្រុមហ៊ុន HSCMC ក៏ត្រូវបានអនុម័តឲ្យវិនិយោគលើការសាងសង់បណ្តាញខ្សែបញ្ជូនកម្លាំង ២៣០ គីឡូវ៉ុលភ្ជាប់ពីរោងចក្រអគ្គិសនីក្នុងស្រុកត្រពាំងប្រាសាទទៅអនុស្ថានីយខាងកើតសៀមរាប។
សេចក្តីប្រកាសព័ត៌មានបានឲ្យដឹងទៀតថា គម្រោងវិនិយោគទាំង ៣ នេះពិតជាមានភាពចាំបាច់ក្នុងការបំពេញឲ្យបានគ្រប់គ្រាន់នូវប្រភពអគ្គិសនី ធានាសុវត្ថិភាព និងសន្តិសុខនៃការផ្គត់ផ្គង់អគ្គិសនីក្នុងព្រះរាជាណាចក្រកម្ពុជាពីឆ្នាំ ២០២១ ដល់ឆ្នាំ ២០២៤ ពិសេសនៅរដូវប្រាំងដែលវារីអគ្គិសនីមួយភាគធំពុំមានលទ្ធភាពផលិតបានច្រើន។ ការវិនិយោគលើរោងចក្រផលិតអគ្គិសនីថ្មីទាំង ២ នេះក៏អាចចូលរួមកាត់បន្ថយថ្លៃអគ្គិសនីបន្ថែមទៀតជូនដល់អ្នកប្រើប្រាស់អគ្គិសនីផងដែរ។
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាបានសរសេរលើបណ្តាញសង្គម Facebook ផ្ទាល់ខ្លួនថា ដើម្បីធ្វើការអភិវឌ្ឍគម្រោងខាងលើ រាជរដ្ឋាភិបាលបានអនុញ្ញាតឲ្យក្រសួងរ៉ែ និងថាមពល បងើ្កតគណៈកម្មការចរចាអន្តរក្រសួងដែលមានសមាសភាពមកពីក្រសួងរ៉ែ និងថាមពល ក្រសួងសេដ្ឋកិច្ច និងហិរញ្ញវត្ថុ និងអាជ្ញាធរអគ្គិសនីកម្ពុជា ដើម្បីចរចាថែមទៀតជាមួយក្រុមហ៊ុនវិនិយោគទាំង ២ នេះ។
លោកបានឲ្យដឹងទៀតថា គម្រោងរោងចក្រអគ្គិសនីដុតធ្យូងរបស់ក្រុមហ៊ុន Han Seng Coal Mines Co., Ltd ដែលមានទុនវិនិយោគចំនួន ២៩៤,៣ លានដុល្លារ នឹងដាក់ឲ្យដំណើរការនៅចុងឆ្នាំ ២០២១ និងឆ្នាំ ២០២២ ចំណែករោងចក្ររបស់ក្រុមហ៊ុន Royal Group ដែលសហការជាមួយក្រុមហ៊ុនមកពីប្រទេស ចិន Sinosteel Equipment & Engineering Co.,Ltd ក្នុងតម្លៃសរុប ១ ៣៤៤,២ លានដុល្លារ នឹងបើកដំណើរការក្នុងឆ្នាំ ២០២៣ និងឆ្នាំ ២០២៤។ ដោយឡែកកាលបរិច្ឆេទនៃការអភិវឌ្ឍបណ្តាញខ្សែបញ្ជូនមិនត្រូវបានប្រកាសពីពេលវេលាទេ ដោយគ្រាន់ថាបានបញ្ជាក់ថានឹងចំណាយ ៦១,៤៥ លានដុល្លារ។
លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពល ក្រសួងរ៉ែ និងថាមពលកាលពីថ្ងៃអាទិត្យបាននិយាយថា ការបង្កើនសមត្ថភាពក្នុងការផ្គត់ផ្គង់ថាមពលអគ្គិសនី គឺជាកិច្ចការសំខាន់ដែលក្រសួងតែងធ្វើដើម្បីឆ្លើយតបតាមតម្រូវការពីគ្រប់វិស័យដែលត្រូវការថាមពល។ លោកបន្តថា កំណើននៃការផ្គត់ផ្គង់ថាមពលដែលផលិតក្នុងស្រុកនឹងកើនឡើង ពិសេសចាប់ពីឆ្នាំ ២០២១ តទៅ។
លោកថ្លែងថា៖ «ការបង្កើនការផ្គត់ផ្គង់ថាមពលគឺជាគោលការណ៍នៃការអភិវឌ្ឍវិស័យឧស្សាហកម្ម កសិកម្ម និងវិស័យផ្សេងៗទៀតដែលជាស្នូល និងមូលដ្ឋានគ្រឹះក្នុងការបង្កើតការងារសម្រាប់ប្រជាជនខ្មែរ»។
ដើម្បីបំពេញតម្រូវការដែលមានកំណើនដ៏ខ្ពស់នារយៈពេល ២-៣ ឆ្នាំចុងក្រោយនេះ កម្ពុជាបាននាំចូលថាមពលអគ្គិសនីពីប្រទេស ថៃ ឡាវ និងវៀតណាមក្នុងបរិមាណចន្លោះពី ៤៦០-៥០០ មេហ្គាវ៉ាត់ក្នុង ១ ឆ្នាំ។
លោក ហ្សូនា បន្ថែមថា រដ្ឋាភិបាលក៏មានផែនការពង្រីកការវិនិយោគលើការផលិតថាមពលបន្ថែមទៀតផងដែរ ហើយចាប់ឆ្នាំ ២០២៣ ទៅកម្ពុជាក៏មានផែនការកាត់បន្ថយការនាំចូលថាមពលពីបរទេសឲ្យមកនៅក្នុងរង្វង់ ៣០០ មេហ្គាវ៉ាត់ក្នុង ១ ឆ្នាំ។
លោក ហែម ឧត្តម អ្នកប្រឹក្សាយោបល់ផ្នែកអភិបាលកិច្ចធនធានធម្មជាតិបាននិយាយថា បើទោះបីជាកំណើនតម្រូវការប្រើប្រាស់ថាមពលអគ្គិសនីនៅកម្ពុជាមានកំណើនខ្ពស់ក៏ដោយ ប៉ុន្តែការវិនិយោគលើរោងចក្រធ្យូងថ្ម វាមិនមែនជារឿងល្អសម្រាប់បរិស្ថានទេ ដោយគេគួរងាកទៅចាប់អារម្មណ៍លើថាមពលកកើតឡើងវិញឲ្យបានច្រើន ដូចជា កង្ហារខ្យល់ ពន្លឺព្រះអាទិត្យ ឬជីវម៉ាស់ជាដើម។
លោកនិយាយថា៖ «ក្នុងនាមជាអ្នកបរិស្ថាន ខ្ញុំមិនលើកទឹកចិត្តឲ្យរដ្ឋាភិបាលចាប់យកការអនុវត្តដោយបង្កើតរោងចក្រដែលដំណើរការដោយធ្យូងថ្មទេ ព្រោះវាបំពុលបរិស្ថានខ្លាំង ជាពិសេសខ្យល់អាកាស»។
លោកបន្ថែមថា កម្ពុជាគួរតែបង្ហាញឆន្ទៈក្នុងការជួយកាត់បន្ថយនូវការកើនឡើងនៃកម្តៅផែនដី។
ទិន្នន័យពីក្រសួងរ៉ែ និងថាមពលបានឲ្យដឹងថា គិតត្រឹមឆ្នាំ ២០១៩ កម្ពុជាអាចផលិតថាមពលអគ្គិសនីសរុបបាន ២ ៣៨៨ មេហ្គាវ៉ាត់ ពីប្រភពចំនួន ៥ រួមមានវារីអគ្គិសនីដែលផ្តល់ថាមពលសរុប ១ ៣២៨ មេហ្គាវ៉ាត់ រោងចក្រអគ្គិសនីដើរដោយធ្យូងថ្មដែលផ្តល់ថាមពល ៦៤០ មេហ្គាវ៉ាត់ រោងចក្រពីចំហេះប្រេងខ្មៅដែលផ្តល់ថាមពល ២៧៤ មេហ្គាវ៉ាត់ រោងចក្រអគ្គិសនីដើរដោយពន្លឺព្រះអាទិត្យដែលផ្តល់ថាមពល ៩០ មេហ្គាវ៉ាត់ និងអគ្គិសនីដើរដោយជីវឧស្ម័នផ្តល់ថាមពល ៥៦ មេហ្គាវ៉ាត់។
លោក វិចទ័រ ហ្សូនា បាននិយាយថា ទន្ទឹមនឹងការអនុម័តគម្រោងអភិវឌ្ឍរោងចក្រអគ្គិសនីដំណើរការដោយធ្យូងថ្មនេះ រដ្ឋាភិបាលកម្ពុជាក៏មានគោលនយោបាយលើកទឹកចិត្តឲ្យមានការវិនិយោគលើថាមពលកកើតឡើងវិញផងដែរ។ លោកបន្ថែមថា ជាក់ស្តែងថាមពលសូឡាត្រូវបានរំពឹងថា នឹងកើនឡើងពីទំហំ ៩០ មេហ្គាវ៉ាត់ គិតត្រឹមដំណាច់ឆ្នាំ ២០១៩ ដល់ ៤០០ មេហ្គាវ៉ាត់នាចុងឆ្នាំ ២០២០។
លោកបានបន្ថែមថា៖ «កម្ពុជាគឺជាប្រទេសដែលបានចុះហត្ថលេខាលើកិច្ចព្រមព្រៀងក្នុងការកាត់បន្ថយឧស្ម័នផ្ទះកញ្ចក់ និងកាត់បន្ថយការកើនឡើងនៃកម្តៅផែនដី»៕ LA