The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាលៈ អន្តរាគមន៍​ទី​ផ្សារ​ និង​​កំណត់​តម្លៃ​ការ​ហៅទូរស័ព្ទ​

រដ្ឋាភិបាលៈ អន្តរាគមន៍​ទី​ផ្សារ​ និង​​កំណត់​តម្លៃ​ការ​ហៅទូរស័ព្ទ​

រដ្ឋាភិបាលៈ អន្តរាគមន៍​ទី​ផ្សារ​ និង​​កំណត់​តម្លៃ​ការ​ហៅទូរស័ព្ទ​

131210_11b
កាតកោសរបស់ក្រុមហ៊ុនទូរស័ព្ទដែលដាក់លក់នៅតាមដងផ្លូវក្នុងរាជធានីភ្នំពេញ ហេង ជីវ័ន

ភ្នំពេញៈ រដ្ឋាភិបាល​បាន​ការពារ​ការ​សម្រេចចិត្ត​របស់​ខ្លួន​កាលពី​ម្សិលមិញ ចំពោះ​ការ​ធ្វើ​អន្តរាគមន៍​នៅ​ក្នុង​ទីផ្សារ​ទូរគមនាគមន៍​ជាមួយ​ការ កំណត់​តម្លៃ​អប្បបរមា​លើ​ការ​ហៅ​ទូរស័ព្ទ​។

ពួកគេ​អះអាង​ថា ការ​គិត​ប្រាក់​អប្បបរមា​នេះ​ចាំបាច់ ដើម្បី​ចៀសវាង​ការ​បន្ត​ខាតបង់​ចំណូល​ពន្ធ និង​ចៀសវាង​ក្រុមហ៊ុន​មួយ ឬ​ឧស្សាហកម្ម​ផ្ដាច់មុខ​តែ​ឯង​។

លោក ប្រាក់ សុខុន រដ្ឋមន្ដ្រី​ក្រសួង​ប្រៃសណីយ៍​និង​ទូរគមនាគមន៍​បាន​និយាយ​នៅក្នុង​សន្និសីទ​កាសែត កាលពី​ម្សិលមិញ​ថា​៖ «​បទប្បញ្ញត្តិ​នេះ​មិនមែន​ដើម្បី​ជាន់​ក​ពី​ប្រតិបត្តិករ ឬ​អ្នក​ប្រើប្រាស់​នោះ​ទេ ប៉ុន្តែ​ដើម្បី​ធានា​បាន​សុវត្ថិភាព​ការ​ប្រកួតប្រជែង​ដោយ​សេរី និង​យុតិធម៌ »។

តម្លៃ​អប្បបរមា​ត្រូវ​បាន​ដាក់​ចេញ​កាលពី​ឆ្នាំ​២០០៩ ដើម្បី​ការ​ពារការ​ដួលរលំ​របស់​ប្រតិបត្តិករ​ទូរគមនាគមន៍ ដែល​ត្រូវ​បាន​គេ​មើល​ឃើញ​ថា ជា​ទីផ្សារ​ចង្អៀត​។ ការ​គិត​ប្រាក់​អប្បបរមា​ចំនួន​៤,៥​សេន​ក្នុង​មួយ​នាទី​សម្រាប់​ការ ហៅ​ទូរស័ព្ទ​ក្នុង​ប្រព័ន្ធ និង​៥,៩៥​សេន​ក្នុង​មួយ​នាទី​សម្រាប់​ការ​ហៅ​ទូរស័ព្ទ ឆ្លង​ប្រព័ន្ធ​។ តាម​និយតករ​ទូរគមនាគមន៍​ឯករាជ្យ បន្ទាប់ពី​មាន​បំណង​ពង្រឹង​ច្បាប់​ឡើង​វិញ​កាលពី​ខែ​ឧសភា រដ្ឋាភិបាល​បាន​ផ្អាក​តម្លៃ​នេះ ដូច្នេះ​វា​មិន​បង្ក​ឲ្យ​មាន​ការ​វឹកវរ​ក្នុង​ចំណោម​អតិថិជន​មុន​ការ បោះឆ្នោត​ខែ​កក្កដា​នោះ​ទេ​។

ឥឡូវ​នេះ​វា​បាន​ត្រឡប់​មក​វិញ ហើយ​រដ្ឋាភិបាល​កំពុង​ពន្យល់​ដោយ​ផ្ទាល់​ដល់​អតិថិជន​ដែល​កំពុង​តែ​ខឹង សម្បា​អំពី​មូលហេតុ​ដែល​ពួកគេ​ត្រូវ​បាន​កំណត់​ឲ្យ​បង់​ប្រាក់​កាន់​តែ ច្រើន​សម្រាប់​ការ​ហៅ​ទូរស័ព្ទ​របស់​ពួកគេ​។

មន្ដ្រី​បាន​និយាយ​កាលពី​ម្សិលមិញ​ថា កាលពី​ឆ្នាំ​២០០៨ អ្នក​ប្រើប្រាស់​លេខទូរស័ព្ទ​មាន​ចំនួន​៣,៨​លាន​ហើយ​កាលពី​ឆ្នាំ ២០១២ មាន​អ្នក​ជាវ​ស៊ីមកាត​១៩​លាន​ស៊ីម​។ ទោះ​បី​យ៉ាង​ណា​ប្រាក់​ចំណូល​របស់​ឧស្សាហកម្ម​នេះ​មាន​ចំនួន​៨០​លាន ដុល្លារអាមេរិក​កាលពី​ឆ្នាំ​២០១២ ហើយ​រដ្ឋាភិបាល​ទទួល​បាន​ពន្ធ​ចំនួន ២០ លាន​ដុល្លារ ដែល​មន្ត្រី​ជំនាញ​អះអាង​ថា ជា​ចំនួន​តិច​ជាង​ការ​រំពឹង​ទុក​។

លោក ប្រាក់ សុខុន បាន​និយាយ​ថា​៖ « យើង​បាន​មើល​ឃើញ​ការ​កើនឡើង​នៅក្នុង​ការ​ប្រកួតប្រជែង​របស់​ទូរគមនាគមន៍ ប៉ុន្តែ​យើង​មិន​បាន​ឃើញ​ការ​កើនឡើង​ប្រាក់​ចំណូល​ពន្ធ​ទេ​»។

ប៉ុន្តែ​សេដ្ឋវិទូ​បាន​ចោទសួរ​ពី​ច្បាប់​ដ៏​ចម្រូងចម្រាស​នេះ​។​ លោក ចាន់ សុផល អ្នកវិភាគ​សេដ្ឋកិច្ច​ឯករាជ្យ​និយាយ​ថា​៖ «​មិន​មាន​ភាព​ផ្ដាច់​មុខ​ទេ​រហូត​មក​ដល់​ពេល​នេះ​ដែល​ជា​លទ្ធផល នៃ​ការ​ប្រកួតប្រជែង​តម្លៃ​សេរី​នោះ​»​។

លោក​បាន​បន្ត​ថា​៖ «​ផ្ទុយ​ទៅ​វិញ ការ​ប្រកួតប្រជែង​តម្លៃ​សេរី​ធានា​មិន​ឲ្យ​មាន​ភាព​ផ្ដាច់មុខ ខណៈ​ប្រជាជន​មាន​ការ​ប្រកួតប្រជែង​សេរី​ដោយ​មិន​មាន​ការ​ឃុបឃិត ឬ​ការ​ធ្វើ​អន្តរាគមន៍​នោះ​ទេ»​។

ស្ដីពី​បញ្ហា​នៃ​ការ​បង្កើន​ប្រាក់ ចំណូល​ពន្ធ លោក សុផល និយាយ​ថា រដ្ឋាភិបាល​គួរតែ​គិត​អត្រា​ពន្ធ «​ឲ្យ​បាន​ត្រឹមត្រូវ​»៕PB

អត្ថបទគួរចាប់អារម្មណ៍