The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​បន្ត​ជំរុញ​ឲ្យ​បង្កើន​ការ​ដាំ​បន្លែ​និង​ផ្លែ​ឈើ​ឲ្យ​ខ្លាំង

រដ្ឋាភិបាល​បន្ត​ជំរុញ​ឲ្យ​បង្កើន​ការ​ដាំ​បន្លែ​និង​ផ្លែ​ឈើ​ឲ្យ​ខ្លាំង

កសិករ​នៅ សង្កាត់​បាក់ខែង កំពុង​ដក​សាលាដ។
កសិករ​នៅ សង្កាត់​បាក់ខែង កំពុង​ដក​សាលាដ។ ហុង មិនា

រដ្ឋាភិបាល​បន្ត​ជំរុញ​ឲ្យ​បង្កើន​ការ​ដាំ​បន្លែ​និង​ផ្លែ​ឈើ​ឲ្យ​ខ្លាំង

ភ្នំពេញៈ ក្រសួង​ពាណិជ្ជកម្ម នឹង​ធ្វើ​ការ​រៀបចំ​ដាក់​តាំង​បង្ហាញ​នូវ​ផលិតផល​បន្លែ និង​ផ្លែ​ឈើ​ក្នុង​ស្រុក​រយៈ​ពេល​បី​ថ្ងៃ​ក្នុង​គោល​បំណង​ពង្រឹង​វិស័យ​ដាំ​ដុះ​ដើម្បី​កាត់​បន្ថយ​ការ​នាំ​ចូល ដែល​មាន​តម្លៃ​រាប់​រយ​លាន​ដុល្លារ​ក្នុង​មួយ​ឆ្នាំៗ។

នេះ​ជា​លើក ទី៥ ហើយ​ដែល កម្ពុជា បាន​ប្រារព្ធ​ធ្វើ​ពិធី​តាំង​ពិពរ័ណ៍​នេះ។

សេចក្តី​ប្រកាស​ព័ត៌មាន​របស់​ក្រសួង​ពាណិជ្ជកម្ម ឲ្យ​ដឹង​ថា ពិព័រណ៍​នេះ​នឹង​ប្រព្រឹត្ត​ទៅ​ចាប់​ពី​ថ្ងៃ ទី៣ ដល់ ទី៥ ខែ​តុលា នៅ កោះ​ពេជ្រ។

សេចក្តី​ប្រកាស​ព័ត៌មាន​ដដែល​បន្ត​ថា៖ «ការ​រៀបចំ​នេះ​ក្នុង​គោល​បំណង​ទាក់​ទាញ​ចំណាប់​អារម្មណ៍​របស់​ប្រតិបត្តិករ​ដែល​កំពុង​បម្រើ​ការ​ក្នុង​វិស័យ​ទេសចរណ៍​ដែល​ជានិច្ច​កាល​តែង​តែ​ប្រើ​ប្រាស់​ផលិត​ផល​បន្លែ និង​ផ្លែ​ឈើ​នាំ​ចូល​ពី​បរទេស ពិសេស​ដើម្បី​ឲ្យ​អ្នក​លក់​ដូរ​ផ្សេង​ទៀត ដែល​ត្រូវ​ការ​ជា​ចាំ​បាច់​នូវ​ផលិត​ផល​បន្លែ ផ្លែ​ឈើ និង​ម្ហូប​អាហារ​ប្រចាំ​ថ្ងៃ សម្រាប់​ផ្គត់​ផ្គង់​ដល់​អតិថិជន​របស់​ខ្លួន​ហើយ​វា​ក៏​ជា​វេទិកា​សម្រាប់​ផ្គូរ​ផ្គង​អ្នក​ត្រូវ​ការ និង​អ្នក​ផ្គត់​ផ្គង់​បាន​ចាប់​ដៃគូ​ផង​ដែរ»។

ប្រទេស​កម្ពុជា​បាន​ខាត​បង់​រាប់​រយ​លាន​ដុល្លារ​ក្នុង​មួយ​ឆ្នាំៗ​ក្នុង​ការ​នាំ​ចូល​នូវ​ផលិតផល​បន្លែ និង​ផ្លែ​ឈើ​ពី​ប្រទេស​ជិត​ខាង​ពិសេស ប្រទេស​ថៃ និង វៀតណាម។

របាយ​ការណ៍​ស្រាវជ្រាវ​របស់​ក្រុមហ៊ុន Emerging Market Consulting ចេញ​ផ្សាយ​កាល​ពី ខែ​មេសា ឆ្នាំ​២០១៤ បង្ហាញ​ថា ផ្ទៃ​ដី​ដាំ​ដុះ​បន្លែ​ក្នុង​មួយ​ឆ្នាំៗ​មាន​ប្រហែល ៥៤ ០០០ ហិកតា (ទិន្នន័យ ឆ្នាំ​២០១២) ហើយ​អាច​មាន​ការ​កើន​ឡើង​តិច​តួច​ប៉ុណ្ណោះ​គិត​មក​ទល់​ពេល​នេះ។ ជាក់ស្តែង​ទិន្នផល​បន្លែ​ក្នុង​ស្រុក​នៅ ឆ្នាំ​២០១១ មាន ៣៧៧ ០០០ តោន​ហើយ​កើន​ឡើង​ប្រមាណ ៦ ភាគរយ​នៅ​ឆ្នាំ​បន្ទាប់​គឺ ឆ្នាំ​២០១២ ដែល​មាន​បរិមាណ​ផលិតកម្ម ៤០០ ០០០ តោន​ក្នុង​មួយ​ឆ្នាំ។

កំណើន​ទេសចរ​អន្តរជាតិ​ក៏​បាន​រួម​ចំណែក​យ៉ាង​សំខាន់​ក្នុង​ការ​ធ្វើ​ឲ្យ​មាន​កំណើន​តម្រូវ​ការ​បន្លែ និង​ផ្លែ​ឈើ​នៅ​កម្ពុជា។ នេះ​បើ​តាម​លោក​រដ្ឋ​មន្រ្តី​ក្រសួង​ទេសចរណ៍ ថោង ខុន។

លោក​បន្ត​ថា កំណើន​ភ្ញៀវ​ទេសចរ​អន្តរជាតិ​ចូល​មក​កម្ពុជា មាន​ការ​កើន​ឡើង​ជា​ប្រចាំ​ឆ្នាំ​បាន​ធ្វើ​ឲ្យ​តម្រូវការ​បន្លែ​ផ្លែឈើ​កើន​ឡើង​ផង​ដែរ ប៉ុន្តែ​ផលិតករ​ក្នុង​ស្រុក​មិន​ទាន់​មាន​លទ្ធភាព​ស្រូប​យក​ប្រយោជន៍​នៃ​កំណើន​នេះ​ឲ្យ​អស់​ពី​សក្តានុពល​នៅ​ឡើយ​ទេ។

លោក​ថ្លែង​ថា៖ «ការ​ផ្គត់​ផ្គង់​របស់​យើង​មាន​តិច​ណាស់។ ការ​ចំណាយ​លើ​ការ​នាំ​ចូល​បន្លែ ផ្លែ​ឈើ មាន​ទឹក​ប្រាក់​រាប់​លាន​ដុល្លារ​ក្នុង​មួយ​ឆ្នាំៗ ចេញ​ទៅ​ក្រៅ​ប្រទេស»។

លោក ច័ន្ទ សុផល អ្នក​វិភាគ​សេដ្ឋកិច្ច​កម្ពុជា​បាន​សរសេរ​មក​កាន់ ភ្នំពេញ ប៉ុស្តិ៍ ពី​សប្តាហ៍​មុន​ថា កង្វះ​ការ​លើក​ទឹក​ចិត្ត និង​ការ​ផ្តល់​បច្ចេកទេស​គ្រប់​គ្រាន់​ពី​សំណាក់​រដ្ឋាភិបាល​ពិសេស​គឺ​មន្ត្រី​ជំនាញ​ក្នុង​ការ​ចុះ​ទៅ​បណ្តុះ​បណ្តាល​ប្រជា​ពលរដ្ឋ​ក្នុង​ការ​ដាំ​ដុះ ដែល​ជា​ហេតុ​ធ្វើ​ឲ្យ​មាន​ការ​នាំ​ចូល​ច្រើន។

លោក​បន្ត​ថា៖ «វៀតណាម និង ថៃ គឺ​គេ​មាន​ការ​លើក​ទឹក​ចិត្ត​ខ្ពស់​ណាស់​ដល់​វិស័យ​នេះ។ ខ្ញុំ​បាន​ទៅ​ធ្វើ​ទស្សនកិច្ច​នៅ ប្រទេស​ថៃ កាល​ពី ខែ​មិថុនា គ្រាន់​តែ​នាយកដ្ឋាន​កសិកម្ម​មួយ រដ្ឋាភិបាល​គេ​បាន​ចំណាយ​ប្រមាណ​ជា ១៦៨ លាន​ដុល្លារ​សម្រាប់​នាយកដ្ឋាន​នេះ​ក្នុង​មួយ​ឆ្នាំ។ ប៉ុន្តែ​ខ្ញុំ​បាន​សាក​សួរ​នាយកដ្ឋាន​ដូច​គ្នា​នៅ​កម្ពុជា គឺ​ការ​ចំណាយ​ត្រឹម​តែ ២០ ម៉ឺន​ដុល្លារ​ប៉ុណ្ណោះ គឺ​ប្រើ​សម្រាប់​តែ​ការ​បើក​ប្រាក់​បៀវត្សរ៍​ប៉ុណ្ណោះ»។

លោក​បន្ថែម​ថា កម្ពុជាបាន​នាំ​ចូល​បន្លែ​ប្រមាណ​ជា ២០០ តោន ពី វៀតណាម ក្នុង​មួយ​ថ្ងៃ មាន​ដូច​ជា​ដំឡូង​បារាំង ស្ពៃ​ក្តោប ឆៃថាវ ការ៉ុត ។ល។

លោក​បាន​បន្ត​ថា៖ «ប្រព័ន្ធ​ចែក​ចាយ និង​បញ្ហា​ទីផ្សារ គឺ​ទាមទារ​ឲ្យ​មាន​ការ​កែ​លម្អ​ប្រសិន​បើ​យើង​ចង់​ធ្វើ​ការ​ជំនួស​ទំនិញ​នាំ​ចូល​ពី​ប្រទេស​ជិត​ខាង»៕

អត្ថបទគួរចាប់អារម្មណ៍