The Phnom Penh Post Search

Search form

រដ្ឋាភិបាល ​ចាត់​ចំណាត់​ថ្នាក់​អ្នក​ជាប់​ពន្ធ​ជា​បី​ប្រភេទ

Content image - Phnom Penh Post
អគារ​អគ្គនាយក​ដ្ឋាន​ពន្ធដារ​ស្ថិត​នៅ​កែង​មហាវិថី​ម៉ៅ​សេង​ទុង និង​សហព័ន្ធ​រុស្ស៊ី។ ផា លីណា

រដ្ឋាភិបាល ​ចាត់​ចំណាត់​ថ្នាក់​អ្នក​ជាប់​ពន្ធ​ជា​បី​ប្រភេទ

ភ្នំពេញៈ រដ្ឋាភិបាល​កម្ពុជា​បាន​ប្រកាស​ពី​ចំណាត់​ថ្នាក់​នៃ​អនុ​លោម​ភាព​សារ​ពើពន្ធ ដែល​ជា​ការ​បែង​ចែក​ចំណាត់​ថ្នាក់​សម្រាប់​អ្នក​បង់ពន្ធ ដើម្បី​ជំរុញ​ការ​បំពេញ​កាតព្វកិច្ច​ពន្ធ​ឲ្យ​កាន់​តែ​ប្រសើរ ដែល​ការ​ធ្វើ​បែប​នេះ​ត្រូវ​បាន​អ្នក​ជំនាញ​លើក​ឡើង​ថា នឹង​ផ្តល់​អត្ថ​ប្រយោជន៍​ដល់​អ្នក​ដែល​ជាប់​ចំណាត់​ថ្នាក់​ខ្ពស់​។

ប្រព័ន្ធ​ចំណាត់​ថ្នាក់ ឬ ចំណាត់​ថ្នាក់​អនុ​លោមភាព​សារពើពន្ធ​នេះ​ត្រូវ​បាន​បញ្ជាក់​នៅ​ក្នុង​ប្រកាស​ចេញ​ដោយ​អគ្គនាយកដ្ឋាន​ពន្ធដារ (GDT) កាលពី​ចុង​ខែ​ធ្នូ ត្រូវ​បាន​កំណត់​ក្នុង​លក្ខណ​វិនិច្ឆ័យ​ផ្សេងៗ​គ្នា​ចំនួន​១២ ដែល​មាន​ពិន្ទុ​១ ឬ​២ ។

លក្ខណ​វិនិច្ឆ័យ​ទាំង​នោះ​រួម​មាន​ការ​ចុះ​បញ្ជី​របស់​ក្រុមហ៊ុន​នៅ​ពន្ធដារ និង​បច្ចុប្បន្ន​ភាព​ចុះ​បញ្ជី ការ​ជូន​ដំណឹង​ពី​ការ​ផ្លាស់​ប្តូរ​ព័ត៌មាន​នៃ​ការ​ចុះ​បញ្ជី ក៏​ដូច​ជា​ការ​ដាក់​លិខិត​ប្រកាស​សារ​ពើ​ពន្ធ​ទៀង​ទាត់​តាម​កាល​កំណត់​ជាដើម​។

ចំណាត់​ថ្នាក់​អនុលោម​ភាព​សារ​ពើ​ពន្ធ​របស់​អ្នក​ជាប់​ពន្ធ​ត្រូវ​បែង​ចែក​ជា​បី​ប្រភេទ គឺ​មាស (​ចំណាត់​ថ្នាក់​ខ្ពស់​) ប្រាក់​(​ចំណាត់​ថ្នាក់​មធ្យម​) និង​សំរឹទ្ធ​(​ចំណាត់​ថ្នាក់​ទាប​)​។ អ្នក​ជាប់​ពន្ធ​ប្រភេទ​មាស មាន​ពិន្ទុ​សរុប​ចាប់​ពី​១៦ ដល់​២០ និង​ប្រភេទ​មធ្យម​មាន​ពិន្ទុ​ពី​១១​ដល់​១៥ ខណៈ​អ្នក​ជាប់​ពន្ធ​ទាប​គឺ​ពី​១ ដល់​១០​។

វិញ្ញាបនបត្រ​ប្រភេទ​មាស​ត្រូវ​បាន​ប្រគល់​ដោយ​អគ្គនាយក​ដ្ឋាន​ពន្ធដារ ខណៈ​អ្នក​ជាប់​ពន្ធ​ប្រភេទ​ប្រាក់ និង​សំរិទ្ធ ត្រូវ​បាន​ផ្តល់​តាម​ការ​ស្នើ​សុំ​។ សុពលភាព​នៃ​អនុលោមភាព​សារ​ពើ​ពន្ធ​មាន​រយៈពេល​២​ឆ្នាំ ហើយ​វា​ត្រូវ​បាន​ដក​ហូត​ប្រសិន​បើ​រក​ឃើញ​ថា​មិន​គោរព​តាម​លក្ខណ​វិនិច្ឆ័យ​ដែល​ខ្លួន​ទទួល​បាន​។

លោក Clint O’Connell ប្រធាន​ផ្នែក​អនុវត្ត​ពន្ធ​កម្ពុជា​នៅ​ក្រុមហ៊ុន​ប្រឹក្សា​យោបល់​វិនិយោគ​បរទេស និង​ក្រុមហ៊ុន​ពន្ធ DFDL Cambodia បាន​ឲ្យ​ដឹង​ថា អត្ថប្រយោជន៍​ជា​ពិសេស​នៃ​ចំណាត់​នីមួយៗ​មិន​ត្រូវ​បាន​បង្ហាញ​នៅ​ក្នុង​ប្រកាស​នេះ​ទេ​។ ប៉ុន្តែ​លោក​បាន​កត់​សម្គាល់​ថា អាច​មាន​ភាព​ស្រប​គ្នា​នឹង​ផែនការ​ពាណិជ្ជករ ដែល​ត្រូវ​បាន​សាកល្បង​ដោយ​អគ្គ​នាយក​ដ្ឋាន​គយ និង​រដ្ឋករ (GDCE)​។

លោក​បញ្ជាក់​ថា​៖ «​សម្រាប់​សហគ្រាស​ធុន​តូច និង​មធ្យម [SME] នៅ​ក្នុង​ប្រទេស​កម្ពុជា គំនិត​នៃ​ការ​ធ្វើ​ឲ្យ​មាន​ប្រភេទ​ពន្ធ​ផ្សេង​គ្នា​បី​នេះ សម្រាប់​ពន្ធ​រយៈពេល​មួយ​ឆ្នាំ​នឹង​មិន​មែន​ជា​ក្តី​រីករាយ​ទេ ផ្ទុយ​ទៅ​វិញ​វិធានការ​ណា​ដែល​ត្រូវ​បាន​ធ្វើ​ឡើង​ដើម្បី​កាត់​បន្ថយ​ផល​ប៉ះ​ពាល់​ទាំង​ស្រុង​នៃ​របប​ពន្ធ​ផ្លូវ​ការ យើង​គិត​ថា​នឹង​ត្រូវ​បាន​ស្វាគមន៍​»​។

លោក O’Connell បន្ថែម​ថា វិធានការ​នេះ​ត្រូវ​បាន​ធ្វើ​ឡើង ​ដើម្បី​ជំរុញ​តែ​អ្នក​ជាប់​ពន្ធ​ស្រាប់ ជា​ជាង​ការ​ជំរុញ​ក្រុមហ៊ុន​មិន​គោរព​តាម​ច្បាប់​ឲ្យ​អនុវត្ត​កាតព្វកិច្ច​ពន្ធ​។

លោក​លើក​ឡើង​ថា​៖ «​ខណៈ​ដែល​រយៈពេល​ ១២​ ខែ​មុន បាន​ផ្ដោត​ការ​យក​ចិត្ត​ទុក​ដាក់​លើ​ការ​លុប​ចោល​របប​ពន្ធ​ម៉ៅការ និង​តម្រូវ​ឲ្យ​ក្រុមហ៊ុន​ទាំង​អស់​ត្រូវ​ចូល​ក្នុង​របប​ពន្ធ​ផ្លូវ​ការ ប្រកាស​នេះ​ត្រូវ​បាន​គេ​មើល​ឃើញ​ថា ក្រុមហ៊ុន​ដែល​បង់ពន្ធ​ស្រាប់​ត្រូវ​បាន​គេ​ជំរុញ​ឲ្យ​គោរព​កាតព្វ​កិច្ច​ពន្ធ​ដែល​ពួក​គេ​កំពុង​ធ្វើ​»​។

លោក​ស្រី ឈីវ គីមស្រូយ នាយក​ផ្នែក​សេវា​ពន្ធ និង​ការ​ប្រឹក្សា​យោបល់​នៅ​ក្រុមហ៊ុន Deloitte Cambodia បាន​កត់​សម្គាល់​ថា វិធានការ​ថ្មី​នេះ បាន​បម្រើ​អត្ថ​ប្រយោជន៍​ទាំង​អាជ្ញាធរ និង​អ្នក​ជាប់ពន្ធ​។

ប៉ុន្តែ លោក​ស្រី​បាន​ពន្យល់​ថា ការ​ដាក់​ទោស​អ្នក​មិន​គោរព​តាម​ច្បាប់​នៅ​តែ​ត្រូវ​ការ​យុទ្ធសាស្ដ្រ​ជារួម​របស់ GDT ដើម្បី​ធ្វើ​ឲ្យ​មាន​ប្រសិទ្ធភាព​។

លោក​ស្រី​បាន​លើក​ឡើង​ទៀត​ថា​៖«សម្រាប់ GDT ពន្ធ​អាច​ត្រូវ​បាន​ប្រមូល​ទាន់​ពេល ហើយ​វា​នឹង​សន្សំ​ពេលវេលា សម្រាប់​សវនករ​ពន្ធ ក្នុង​ការ​ធ្វើ​សវនកម្ម​ពន្ធ​»​។

លោក​ស្រី​បាន​បញ្ជាក់​ថា​៖«​ប៉ុន្តែ ការ​ផាក​ពិន័យ​សម្រាប់​អ្នក​មិន​គោរព​តាម​ច្បាប់ នៅ​តែ​ត្រូវ​ធ្វើ ក្នុង​ករណី​អ្នក​ជាប់ពន្ធ​មួយ​ចំនួន​មិន​គោរព​តាម​បទ​ប្បញ្ញត្តិ​ពន្ធ ឬ​លែង​គោរព​តាម​បទ​ប្បញ្ញត្តិ​នេះ​នៅ​ពេល​អនាគត​»​។

លោកស្រី គីមស្រូយ បាន​ឲ្យ​ដឹង​ថា ប្រតិបត្តិ​ករ​អាជីវកម្ម​តូចៗ អាច​យល់​ថា ការ​គោរព​តាម​លក្ខណ​វិនិច្ឆ័យ​មួយ​ចំនួន​ដែល​មាន​នៅ​ក្នុង​ប្រកាស​នេះ មាន​ការ​ពិបាក ប៉ុន្តែ​ថា វិធានការ​នេះ​គឺជា​សញ្ញា​វិជ្ជមាន​សម្រាប់​ការ​គោរព​តាម​ច្បាប់​ពន្ធ​នៅ​ពេល​អនាគត​។

លោក​ស្រី​បាន​បន្ត​ថា​៖ «SME អាច​យល់​ថា​មានការ​ពិបាក​បន្តិច​បន្តួច​ក្នុង​ការ​រៀបចំ​កំណត់​ត្រា​ត្រឹម​ត្រូវ ដូច​បាន​បញ្ជាក់​ដោយ​លក្ខណ​វិនិច្ឆ័យ​តម្រូវ​ឲ្យ​មាន​នៅ​ក្នុង​ប្រកាស​នេះ​»​។

លោក​ស្រី​បន្ថែម​ថា ប៉ុន្តែ​ថា​៖ «​វិធានការ​នេះ​គឺជា​ការ​ចាប់​ផ្ដើម​ជំរុញ​ឲ្យ​មាន​ការ​គោរព​តាម​ច្បាប់​ពន្ធ​កាន់​តែ​ទូលំ​ទូលាយ​សម្រាប់​អ្នក​ជាប់​ពន្ធ​»៕ LA

អត្ថបទគួរចាប់អារម្មណ៍

  • សណ្ឋាគារ​ប្រណីត​នៅ​កោះរ៉ុង បើក​ជា​ផ្លូវការ

    ភ្នំពេញៈ សណ្ឋាគារ​ដ៏ប្រណីត Royal Sands នៅលើ​កោះរ៉ុង​របស់​លោក គិត ម៉េង បាន​បើក​ដំណើរការ​ជា​ផ្លូវការ​កាលពី​ថ្ងៃ​ម្សិលមិញ ដែល​គេ​រំពឹង​ថា​នឹង​ទាក់ទាញ​ភ្ញៀវទេសចរ​កាន់តែ​ច្រើន​។

  • ដំរី​ដែល​ចូល​ចម្ការ​អ្នក​ភូមិ​បាន​គេច​ទៅ​ភ្នំ​ដងរែក

    ឧត្តរមានជ័យៈ ក្រុម​មន្ត្រី​បាន​និយាយ​ថា​សត្វ​ដំរី​ញី​មួយ​ក្បាល​ដែល​បាន​ចូល​លុកលុយ​ក្នុង​ចម្ការ​អ្នកភូមិ​រំដួល​ចាស់ ឃុំ​អម្ពិល ស្រុក​បន្ទាយ​អម្ពិល ខេត្ត​ឧត្តរមានជ័យ​កាលពី​ព្រឹក​ថ្ងៃ​អាទិត្យ​នោះ​បាន​គេច​ខ្លួន​ចូល​ទៅ​ក្នុង​តំបន់​ជួរ​ភ្នំ​ដងរែក​វិញ​ហើយ ខណៈ​ដែល​ក្រុម​មន្ត្រី​ជំនាញ​បរិស្ថាន និង​អាជ្ញាធរ​កំពុង​បន្ត​ឃ្លាំ​មើល​ពី​ដំណើរ​របស់​វា​។

  • ព្រះមហាក្សត្រ​អំពាវនាវ​ឲ្យ​ធានា​ការពារ​យុត្តិធម៌​ និង គោរព​សិទ្ធិ​មនុស្ស

    ភ្នំពេញៈ ក្រោយពី​ឈ្នះ​អាសនៈ​ទាំង​ ៥៨ ដោយ​មិន​មាន​អតីត​បក្ស​សង្គ្រោះ​ជាតិ​ដែល​ជា​គូប្រកួត​ដ៏ស័ក្តិសម​នឹង​គ្នា​សម្រាប់​ការបោះឆ្នោត​ព្រឹទ្ធសភា​ពី​ខែ​កុម្ភៈ គណបក្ស​កាន់​អំណាច​ដែល​ទទួល​ជ័យជម្នះ​បាន​បន្ត​គ្រប់គ្រង​ស្ថាប័ន​នីតិប្បញ្ញត្តិ​ជាថ្មី​ដោយ​បើក​សម័យប្រជុំ​លើក​ដំបូង នីតិកាល​ទី​ ៤ ​នៃ​ព្រឹទ្ធសភា​ពី​ម្សិលមិញ​ក្រោម​ព្រះរាជាធិបតីភាព​ព្រះមហាក្សត្រ​ព្រះបាទ​សម្តេច​ព្រះនរោត្តម សីហមុនី ដែល​ព្រះអង្គ​អំពាវនាវ​ឲ្យ​មាន​ការធានា​ការពារ​យុត្តិធម៌ និង​គោរព​សិទ្ធិ​មនុស្ស និង​រួម​សាមគ្គី​គ្នា​ជា​ធ្លុង​មួយ​។

  • នាយក​រដ្ឋមន្ត្រី​បញ្ជា​ឲ្យ​ដកហូត​កោះ​ ៣០ ​មក​វិញ និង​ឲ្យ​ពិនិត្យ​អ្នក​នៅ​ពី​ក្រោយ​ការទន្ទ្រាន​យក​ដី

    ព្រះសីហនុៈ លោក​នាយករដ្ឋមន្ត្រី ហ៊ុន សែន បាន​បញ្ជា​ឲ្យ​ដកហូត​កោះ​ដែល​មិន​បាន​អភិវឌ្ឍ​ប្រមាណ​ ៣០ ​មក​វិញ​ ខណៈ​អត្តសញ្ញាណ​របស់​ម្ចាស់​ក្បាល​ដី​ចំនួន​ ៥៨៤ ​ដែល​មាន​ទាំង​មន្ត្រី​មាន​អំណាច​កំពុង​ត្រូវបាន​ពិនិត្យ​រឿង​នៅ​ពី​ក្រោយ​ខ្នង​ការកាប់​ទន្ទ្រាន​យក​ដី​ដ៏ក្តៅគគុក​នៅ​កោះរ៉ុង ហើយ​មន្ត្រី​ជាន់ខ្ពស់​ខ្លះ​នឹង​មិន​ត្រូវ​ឲ្យ​ចូលរួម​បង្កើត​រដ្ឋាភិបាល​ថ្មី​នៅ​​អាណត្តិ​ក្រោយ​ឡើយ​។