ភ្នំពេញៈ វិធានការផ្នែកពាណិជ្ជកម្មបានលេចចេញជារូបរាងជាបន្តបន្ទាប់នៅក្នុងអ្វីដែលរដ្ឋាភិបាលបានលើកឡើងថាជាកំណែទម្រង់មួយដើម្បីពង្រឹងឯករាជភាពផ្នែកសេដ្ឋកិច្ចនៅក្នុងគ្រាដែលប្រទេស កម្ពុជា បានបាត់បង់ការអនុគ្រោះពន្ធលើការនាំចេញអង្ករ និងប្រឈមមុខការបាត់បង់ប្រព័ន្ធអនុគ្រោះពន្ធនានា។
លោក ហ៊ុន សែន កាលពីចុងសប្តាហ៍មុន បានប្រកាសសម្រេចលុបចោលអង្គភាពភ្នាក់ងារកម្ពុជានាវាចរ (កាំសាប) ដែលជាភ្នាក់ងាររដ្ឋមួយត្រូវបានបង្កើតឡើងក្នុងឆ្នាំ ១៩៧៩ ដើម្បីសម្រួលដល់ការធ្វើពាណិជ្ជកម្មតាមនាវា ពោលគឺ ១ ថ្ងៃបន្ទាប់ពីលោកនាយករដ្ឋមន្ត្រីបានចុះហត្ថលេខាលើអនុក្រឹត្យបញ្ចប់វត្តមានរបស់កាំកុងត្រូលនៅតាមមាត់ច្រកព្រំដែនទាំងអស់។
ចំណាត់ការទាំងនេះត្រូវបានប្រមុខរាជរដ្ឋាភិបាលលើកឡើងថា ដើម្បីកាត់បន្ថយភាពសាំញ៉ាំ និងស្មុគស្មាញក្នុងការធ្វើធុរកិច្ច និងសម្រួលការនាំចេញទំនិញកម្ពុជាទៅទីផ្សារអន្តរជាតិឲ្យកាន់តែប្រសើរបន្ថែមទៀត។
លោកថ្លែងថា៖ «ការលុបចោលអង្គភាពកាំសាបនេះ ក៏មានចំណែកក្នុងការឆ្លើយតបទៅនឹងការជួយសម្រួលផ្នែកពាណិជ្ជកម្ម ដើម្បីឆ្លើយតបទៅនឹងអ្នកវិនិយោគដែលមករកស៊ីនៅកម្ពុជា និងដើម្បីភាពរស់រាននៃវិស័យសេដ្ឋកិច្ចជាតិ និងភាពប្រកួតប្រជែងរបស់សេដ្ឋកិច្ចជាតិ»។
បើតាម លោក ហ៊ុន សែន កន្លងមក ក្នុង ១ ឆ្នាំអង្គភាពកាំសាប រកចំណូលបានប្រហែល ២ លានដុល្លារ ក្នុងនោះប្រាក់ប្រមាណ ៥០ ម៉ឺនដុល្លារត្រូវបានបញ្ចូលទៅក្នុងថវិកាជាតិ ខណៈដែលចំណែកនៅសល់ត្រូវបានប្រើប្រាស់សម្រាប់ការចំណាយនៅក្នុងអង្គភាពស្វយ័តមួយនេះ។
បើទោះជាការលុបចោលអង្គភាពនេះ នឹងមិនចូលរួមចំណែកធំដល់ការកាត់បន្ថយថ្លៃដើមរបស់ធុរជនក្តី តែវាជាសញ្ញាវិជ្ជមានថ្មីមួយបន្ថែមទៀតសម្រាប់វិស័យឯកជន ខណៈតម្លៃអគ្គិសនីខ្ពស់នៅតែជាបញ្ហា។
លោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជា បានប្រាប់ថា នេះជាការគិតគូរដ៏ល្អរបស់ថ្នាក់ដឹកនាំក្នុងការជួយដល់វិស័យឯកជន បើទោះបីជាការចំណាយពេលឆ្លងកាត់កាំសាបមិនច្រើនក្តី។
លោកបន្ថែមថា ការសម្រេចលុបចោលភ្នាក់ងារកម្ពុជានាវាចរ នឹងធ្វើឲ្យតម្លៃដឹកជញ្ជូនទំនិញនៅកម្ពុជាធ្លាក់ចុះបន្ថែមទៀត។
លោកថ្លែងថា៖ «ការសម្រេចលុបចោលកាំសាប នឹងរួមចំណែកបន្ថែមទៀតក្នុងការជួយលើកទឹកចិត្ត និងការទាក់ទាញឲ្យមានការចូលមកវិនិយោគនៅកម្ពុជាបានកាន់តែច្រើន»។
លោកប្រាប់ទៀតថា កន្លងមកលោកតែងឮការត្អូញត្អែរយ៉ាងច្រើនពីអ្នកវិនិយោគចំពោះការចំណាយខ្ពស់នៅកម្ពុជាទៅលើការដឹកជញ្ជូន បើធៀបជាមួយប្រទេសជិតខាង។
ថ្មីៗនេះសហភាពអឺរ៉ុបបានសម្រេចយកពន្ធលើការនាំចូលអង្ករពីកម្ពុជាក្នុងតម្លៃ ១៧៥ អឺរ៉ូ (ប្រហែល ២០០ ដុល្លារ) ក្នុង ១ តោននៅឆ្នាំដំបូង និងថយចុះបន្តិចនៅឆ្នាំទី ២ និងទី ៣ ក្រោមហេតុផលដើម្បីការពារផលប្រយោជន៍កសិករផលិតអង្ករនៅអឺរ៉ុប ខណៈដែលប្រព័ន្ធអនុគ្រោះពន្ធ EBA របស់សហភាពអឺរ៉ុប និង GSP របស់សហរដ្ឋអាមេរិកដែលផ្តល់ឲ្យកម្ពុជាកំពុងស្ថិតក្នុងហានិភ័យ។
លោក ចន្ធី អះអាងថា សេដ្ឋកិច្ច និងប្រាក់ចំណូលរបស់ប្រជាជនខ្មែរ បានកើនឡើងជាបន្តបន្ទាប់ ហេតុនេះការបាត់បង់ភាពអនុគ្រោះផ្សេងៗពីអន្តរជាតិ គឺជារឿងដែលចៀសមិនផុត។
លោកបញ្ជាក់ថា៖ «ការសម្រេចរបស់រាជរដ្ឋាភិបាលក្នុងការជួយកាត់បន្ថយចំណាយលើថ្លៃដើមផលិតនៅពេលនេះ គឺជាដំណើរលើផ្លូវត្រូវ និងចំពេល ខណៈកម្ពុជាត្រូវពង្រឹងខ្លួនដើម្បីត្រៀមចំពោះការដក EBA ដោយសហភាពអឺរ៉ុប»។
លោកបន្ថែមថា៖ «ប៉ុន្តែទន្ទឹមនឹងការជួយរបស់រដ្ឋាភិបាល វិស័យឯកជនក៏ត្រូវតែខិតខំអភិវឌ្ឍផលិតផល និងសេវារបស់ខ្លួនឲ្យកាន់តែល្អផងដែរដើម្បីមានឧត្តមភាពក្នុងការប្រកួតជាមួយប្រទេសនានា»។
លោក ច័ន្ទ សុផល នាយកមជ្ឈមណ្ឌលគោលនយោបាយ បានឲ្យដឹងថា ការលុបចោលអង្គភាពកាំសាប និងអង្គភាពមួយចំនួនទៀតដែលមិនចាំបាច់ គឺជារឿងត្រឹមត្រូវ ព្រោះបច្ចុប្បន្ននៅកម្ពុជាមានអាជ្ញាធរជាច្រើនដែលកំពុងធ្វើការងារជាន់ជំនាញគ្នា។
លោកបន្ថែមថា ជាធម្មតាអង្គភាពគយ មានភារកិច្ចជាអ្នកត្រួតពិនិត្យលើចរាចរណ៍ទំនិញឆ្លងកាត់ព្រំដែនទាំងអស់ទាំងផ្លូវគោក ទឹក និងផ្លូវអាកាស ដូច្នេះការលុបចោលនេះនឹងមិនប៉ះពាល់ដល់ការត្រួតពិនិត្យទំនិញទេ។
លោកបញ្ជាក់ថា៖ «(ការលុបចោលកាំសាប) វាជាការល្អ ជាការជួយសម្រួលទៅដល់ការចេញចូល នៅកំពង់ផែហ្នឹងដោយសារយើងមានអាជ្ញាធរច្រើនរួចមកហើយ ហើយកាំសាបហ្នឹងជាអាជ្ញាធរដែលមិនចាំបាច់»។
លោកលើកឡើងថា ទោះយ៉ាងណារដ្ឋាភិបាលក៏គួរជួយដល់វិស័យឯកជនឲ្យបានកាន់តែច្រើនបន្ថែមទៀត ពិសេសការបញ្ចុះតម្លៃអគ្គិសនីសម្រាប់សហគ្រាសសំខាន់ៗដូចជា ម៉ាស៊ីនកិនស្រូវជាដើម។
កាំសាបស្ថិតនៅក្រោមក្រសួងចំនួន ២ ជាអាណាព្យាបាល គឺក្រសួងសេដ្ឋកិច្ច និងហិរញ្ញវត្ថុ និងក្រសួងសាធារណការ និងដឹកជញ្ជូន។
លោកនាយករដ្ឋមន្ត្រី ហ៊ុន សែន ថ្លែងថា ការសម្រេចលុបចោលអង្គភាពនេះ នឹងមិនធ្វើឲ្យបុគ្គលិកកាំសាបបាត់បង់ការងារទេ ដោយបុគ្គលិកទាំងអស់នឹងត្រូវផ្ទេរទៅបម្រើការងារនៅក្រោមឱវាទក្រសួងសាធារណការ។
បច្ចុប្បន្ននៅអាស៊ាន មានប្រទេសតែ ២ ប៉ុណ្ណោះនៅមានអង្គភាពកាំសាបគឺ កម្ពុជា និងមីយ៉ាន់ម៉ា ខណៈប្រទេសផ្សេងៗទៀតលុបចោលហើយ។ នេះបើតាមលោកនាយករដ្ឋមន្ត្រី៕ LA