ភ្នំពេញៈ លោក ជា វ៉ាន់ដេត រដ្ឋមន្ដ្រីក្រសួងប្រៃសណីយ៍ និងទូរគមនាគមន៍ដែលទើបតែងតាំងថ្មីបានជំរុញឲ្យក្រុមហ៊ុនបច្ចេកវិទ្យាឈានមុខគេចំនួន ២ របស់ចិនគឺក្រុមហ៊ុន China Communication Construction Company (CCCC) និងក្រុមហ៊ុន Huawei Technologies វិនិយោគបន្ថែមទៀតទៅលើហេដ្ឋារចនាសម្ព័ន្ធទូរគមនាគមន៍នៅកម្ពុជា ដើម្បីជាការរួមចំណែកជំរុញការអភិវឌ្ឍវិស័យបច្ចេកវិទ្យាឌីជីថលនៅប្រទេស កម្ពុជា។
ទន្ទឹមនឹងនេះក្រសួងប្រៃសណីយ៍ និងទូរគមនាគមន៍ក៏កំពុងត្រៀមទទួលយកហ្វ្រេកង់ប្រមាណ ៧០០ MHz ពីក្រសួងព័ត៌មានក្នុងរយៈពេលប៉ុន្មានឆ្នាំខាងមុខក្នុងគោលបំណងដើម្បីបង្កើនការអភិវឌ្ឍបណ្ដាញប្រព័ន្ធ 5G ផងដែរ។
ការអំពាវនាវនេះបានធ្វើឡើងក្នុងអំឡុងកិច្ចប្រជុំរវាងលោក ជា វ៉ាន់ដេត និងលោក Zhan Jinsheng អគ្គនាយកក្រុមហ៊ុន China Communication Construction Company (CCCC) និងលោក Yuya Yao អគ្គនាយកក្រុមហ៊ុន Huawei នៅទីស្ដីការក្រសួងកាលពីថ្ងៃសុក្រមុន។
លោក ជា វ៉ាន់ដេត បានឲ្យដឹងថា ការងារអាទិភាពរបស់ក្រសួងគឺការអភិវឌ្ឍហេដ្ឋារចនាសម្ព័ន្ធទូរគមនាគមន៍ឲ្យកាន់តែល្អទាំងគុណភាព វិសាលភាព និងថ្លៃសេវាដែលមានជាអាទិ៍ ហេដ្ឋារចនាសម្ព័ន្ធបណ្ដាញខ្សែកាប្លិ៍អុបទិកក្រោមបាតសមុទ្រ បណ្ដាញខ្សែកាប្លិ៍អុបទិកឆ្អឹងខ្នងបណ្ដាញខ្សែកាប្លិ៍អុបទិកចែកចាយ និងមាត់ច្រកអ៊ីនធឺណិតអន្តរជាតិជាដើម។
លោកថ្លែងថា៖ «ការគ្រប់គ្រងលើប្រតិបតិ្តការហេដ្ឋារចនាសម្ព័ន្ធទូរគមនាគមន៍ ជាចំណុចគន្លឹះមួយមិនត្រឹមតែសម្រាប់ការប្រកួតប្រជែងផ្នែកសេដ្ឋកិច្ចប៉ុណ្ណោះទេ ប៉ុន្តែរួមបញ្ចូលនូវផ្នែកសន្ដិសុខជាតិ និងការប្រជែងឥទ្ធិពលភូមិសាស្ដ្រនយោបាយផងដែរ»។
លោកបានជំរុញដល់ក្រុមហ៊ុនទាំង ២ ឲ្យបន្ថែមការវិនិយោគ និងសហការគ្នាកសាងហេដ្ឋារចនាសម្ព័ន្ធទូរគមនាគមន៍នៅកម្ពុជាឲ្យកាន់តែបានទូលំទូលាយ ដើម្បីជាមូលដ្ឋានរឹងមាំមួយក្នុងការកាត់បន្ថយគម្លាតឌីជីថល និងការនាំយកកម្ពុជាចូលទៅក្នុងយុគសម័យបដិវត្ដន៍ឧស្សាហកម្មទី ៤។
លោកអគ្គនាយកក្រុមហ៊ុន Huawei បានឲ្យដឹងថា ក្រុមហ៊ុនរបស់លោកកំពុងវិនិយោគលើគម្រោងហេដ្ឋារចនាសម្ព័ន្ធទូរគមនាគមន៍ជាច្រើននៅក្នុងប្រទេសកម្ពុជា។
កាលពីខែមិថុនាឆ្នាំមុនក្រុមហ៊ុន Huawei បានប្រកាសផែនការមួយក្នុងការធ្វើជាដៃគូជាមួយក្រុមហ៊ុន China Communications Construction Co ដើម្បីដំឡើងបណ្ដាញខ្សែកាប្លិ៍អុបទិកក្រោមបាតសមុទ្រដែលតភ្ជាប់ក្រុងព្រះសីហនុ និងទីក្រុងហុងកុង។ បណ្ដាញខ្សែកាប្លិ៍ក្រោមសមុទ្រនឹងជួយបង្កើនការតភ្ជាប់អ៊ីនធឺណិតរបស់ប្រទេសកម្ពុជា ពិសេសនៅពេលប្រទេសនេះក្លាយជាសេដ្ឋកិច្ចឌីជីថល នៅពេលអ៊ីនធឺណិតល្បឿនលឿនត្រូវការចាំបាច់។
បណ្ដាញខ្សែកាប្លិ៍ទូរគមនាគមន៍ក្រោមសមុទ្រលើកដំបូងរបស់ប្រទេសកម្ពុជាមានចម្ងាយ ១ ៣០០ គីឡូម៉ែត្រត្រូវបានដាក់ឲ្យដំណើរការជាផ្លូវការចាប់តាំងពីខែមីនា ឆ្នាំ ២០១៧ ដោយមានតម្លៃប្រហែល ១០០ លានដុល្លារ។
ដោយត្រូវបានគេស្គាល់ថាជា «ខ្សែកាប្លិ៍អុបទិក MCT » (រួមមានប្រទេស ម៉ាឡេស៊ី កម្ពុជា និងថៃ) គម្រោងនេះគឺជាការវិនិយោគរួមរវាងក្រុមហ៊ុន Telcothech របស់កម្ពុជា ក្រុមហ៊ុន Telekom Malaysia Berhad ដែលមានមូលដ្ឋាននៅប្រទេស ម៉ាឡេស៊ី និងក្រុមហ៊ុនថៃ Symphony Communication Public Company Limited។
កាលពីឆ្នាំមុន កម្ពុជាមានអ្នកប្រើប្រាស់អ៊ីនធឺណិតតាមរយៈស៊ីមកាត ១៦,៧ លានស៊ីម និងការភ្ជាប់អ៊ីនធឺណិតលើតុ ២១៥ ០០០។ នេះបើតាមក្រសួងប្រៃសណីយ៍៕LA