The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល ​ជំរុញ​ការអភិវឌ្ឍ​តំបន់​ទេសចរណ៍​ពិសេស

រដ្ឋាភិបាល ​ជំរុញ​ការអភិវឌ្ឍ​តំបន់​ទេសចរណ៍​ពិសេស

Content image - Phnom Penh Post
ទេសភាព​ព្រៃភ្នំ​នៃ​តំបន់​ទេសចរណ៍​ធម្មជាតិ​មួយ​ក្នុង​ខេត្ត​មណ្ឌលគិរី​។ រដ្ឋាភិបាល​ជំរុញ​ការអភិវឌ្ឍ​តំបន់​ទេសចរណ៍​ពិសិដ្ឋ​ដើម្បី​ទាក់ទាញ​កំណើន​ភ្ញៀវទេសចរ​បរទេស និង​ក្នុង​ស្រុក​។ ហុង មិនា

រដ្ឋាភិបាល ​ជំរុញ​ការអភិវឌ្ឍ​តំបន់​ទេសចរណ៍​ពិសេស

ភ្នំពេញៈ រដ្ឋាភិបាល​បាន​ជំរុញ​ឲ្យ​មាន​ការអភិវឌ្ឍ និង​វិនិយោគ​បន្ថែម​ទៀត​លើ​តំបន់​ទេសចរណ៍ ពិសេស​ដើម្បី​រួមចំណែក​អភិវឌ្ឍ​សេដ្ឋកិច្ច​ប្រទេស​កម្ពុជា​។ នេះ​បើ​តាម​អនុក្រឹត្យ​មួយ​របស់​រដ្ឋាភិបាល​ស្តីពី «​តំបន់​ទេសចរណ៍​ពិសិដ្ឋ​»​។

អ្នក​ក្នុង​វិស័យ​នេះ​បាន​ស្វាគមន៍​អនុក្រឹត្យ​នេះ​ដោយ​បាន​អះអាង​ថា នឹង​ជួយ​ធ្វើ​ឲ្យ​ប្រទេស​កម្ពុជា​មាន​កន្លែង​សម្រាក​កម្សាន្ត​កាន់តែ​ច្រើន ហើយ​ការរៀបចំ និង​គ្រប់គ្រង​ក៏កាន់​តែ​មាន​ប្រសិទ្ធភាព​ដើម្បី​ជំរុញ​ឲ្យ​វិស័យ​ទេសចរណ៍​កម្ពុជា​កាន់តែ​មាន​សក្តានុពល និង​ភាពទាក់ទាញ​។

អនុក្រឹត្យ​ស្តីពី «​តំបន់​ទេសចរណ៍​ពិសិដ្ឋ​» ដែល​ចុះ​ហត្ថលេខា​ដោយ​លោក​នាយក​រដ្ឋមន្ត្រី ហ៊ុន សែន កាលពី​ថ្ងៃទី​ ៧ ខែ​មីនា​បាន​ឲ្យ​ដឹងថា​អនុក្រឹត្យ​នេះ​មាន​គោលបំណង​ជំរុញ​ការអភិវឌ្ឍ​ផលិតផល​ទេសចរណ៍​ទាក់ទាញ​ភ្ញៀវទេសចរ​ជាតិ អន្តរជាតិ និង​ជំរុញ​ការវិនិយោគ​លើ​វិស័យ​ទេសចរណ៍ ដើម្បី​រួមចំណែក​អភិវឌ្ឍ​សេដ្ឋកិច្ច​សង្គម​នៅ​កម្ពុជា​។ អនុក្រឹត្យ​នេះ​មាន​គោលដៅ​កំណត់​វិធាន និង​យន្តការ​ក្នុង​ការបង្កើត និង​គ្រប់គ្រង​តំបន់​ទេសចរណ៍​។

យោង​តាម​អនុក្រឹត្យ​តំបន់​ទេសចរណ៍​ពិសិដ្ឋ គឺ​សំដៅ​ដល់​តំបន់​ដែលមាន​សក្តានុពល​ទេសចរណ៍​នៅ​កម្ពុជា​ដែល​ត្រូវបាន​កំណត់​ដោយ​រដ្ឋាភិបាល​។ តំបន់​ទេសចរណ៍​ពិសិដ្ឋ​នីមួយៗ​ប្រមូលផ្តុំ​ដោយ​សម្បទា និង​សេវាកម្ម​ទេសចរណ៍​សំខាន់ៗ​រួមមាន សេវាកម្ម​ស្នាក់នៅ និវេសនដ្ឋាន​ទេសចរណ៍ សេវាកម្ម​ម្ហូបអាហារ និង​ភេសជ្ជៈ មណ្ឌល​សម្រាកលម្ហែ​កម្សាន្ត​ទេសចរណ៍ មណ្ឌលកីឡា​ទេសចរណ៍ សួនឧទ្យាន មណ្ឌល​ផ្តល់​សេវាកម្ម​ថែទាំ​សុខភាព​ទេសចរណ៍ មណ្ឌល ឬ​សេវាកម្ម​ទេសចរណ៍​ពាក់ព័ន្ធ​ផ្សេងៗ​ទៀត​។

អនុក្រឹត្យ​ដដែល​បន្ត​ថា​បុគ្គល​ទាំងឡាយ​ដែល​មាន​បំណង​បង្កើត​តំបន់​ទេសចរណ៍​ពិសិដ្ឋ​នៅក្នុង​តំបន់​សក្តានុពល​ទេសចរណ៍​ណាមួយ​ត្រូវ​ធ្វើ​សំណើសុំ​គោលការណ៍​អនុញ្ញាត​ឲ្យ​បង្កើត និង​អភិវឌ្ឍ​តំបន់​ទេសចរណ៍​ពិសិដ្ឋ​ពី​រាជរដ្ឋាភិបាល​តាមរយៈ​គណៈកម្មការ​អភិវឌ្ឍន៍​ទេសចរណ៍​ដែល​ជា​សេនាធិការ​។ គណៈកម្មការ​អភិវឌ្ឍន៍​ទេសចរណ៍​មាន​ភារកិច្ច​ធ្វើការ​សិក្សា​វាយតម្លៃ និង​សន្និដ្ឋាន​លើ​សំណើសុំ​ដាក់​ទៅ​រដ្ឋាភិបាល​ដើម្បី​ពិនិត្យ​សម្រេច​។

តំបន់​ទេសចរណ៍​ពិសិដ្ឋ​ក៏​អាច​នឹង​ត្រូវ​បាន​ផ្តួចផ្តើម​បង្កើត​ឡើង​ដោយ​រដ្ឋ ឬ​ឯកជន ឬ​រដ្ឋ​ចម្រុះ​ឯកជន​ផងដែរ​។ កន្លែង​ដែល​អាច​បង្កើត​តំបន់​ទេសចរណ៍​ពិសិដ្ឋ​បាន​លុះត្រា​តែ​មាន​ទំហំ​ដី​ចាប់ពី ១០០ ​ហិកតា​ឡើង​ទៅ និង​មាន​ផែនការមេ​អភិវឌ្ឍន៍​ច្បាស់លាស់​។ នេះ​បើ​យោង​តាម​អនុក្រឹត្យ​។

លោក ជុក ជំនោរ អ្នក​នាំពាក្យ​ក្រសួង​ទេសចរណ៍​បាន​ប្រាប់​ភ្នំពេញ ប៉ុស្តិ៍ កាលពី​ថ្ងៃ​ម្សិលមិញ​ថា​អនុក្រឹត្យ​នេះ​ត្រូវ​បាន​ផ្តួចផ្តើម​ឡើង​ដោយ​ក្រសួង​ទេសចរណ៍ ដើម្បី​ជំរុញ​ការវិនិយោគ​ក្នុង​វិស័យ​ទេសចរណ៍​នៅ​កម្ពុជា​ឲ្យ​មាន​កាន់តែ​ច្រើន​បន្ថែម​ទៀត​។ លោក​បន្ត​ថា​តាមរយៈ​អនុក្រឹត្យ​នេះ​គណៈកម្មការ​អភិវឌ្ឍន៍​ទេសចរណ៍​នឹង​ចុះ​ធ្វើការ​សិក្សា និង​កំណត់​តំបន់​មួយ​ចំនួន​ជា​អាទិភាព​សម្រាប់​បង្កើត​ជា​តំបន់​ទេសចរណ៍​ពិសិដ្ឋ​នាពេល​ខាង​មុខ​។

លោក​ថ្លែង​ថា​៖ «[​វា​] នឹង​ចូលរួម​ចំណែក​ក្នុង​ការបង្កើត​ការផលិត និង​ប្រើប្រាស់​ផលិតផល​ទេសចរណ៍​ថ្មីៗ​នៅ​កម្ពុជា​»​។

បើ​តាម​លោក ជំនោរ បច្ចុប្បន្ន​កន្លែង​ដែល​មាន​សក្តានុពល​សម្រាប់​អភិវឌ្ឍ​តំបន់​ទេសចរណ៍​ពិសិដ្ឋ​មាន​ដូចជា​ក្នុង​ខេត្ត​សៀមរាប​តំបន់​បឹង​ទន្លេសាប ឆាយ​អារ៉ែង ជីផាត់ តំបន់​មាត់សមុទ្រ និង​ភូមិភាគ​ឦសាន​។

លោក​បន្ត​ថា «​តំបន់​ទេសចរណ៍​ពិសិដ្ឋ​» គឺ​មាន​លក្ខណៈ​ស្រដៀង​គ្នា​ទៅ​នឹង​តំបន់​សេដ្ឋកិច្ច​ពិសេស​ដែរ ដោយ​គ្រាន់​តែ​វា​ផ្តោត​តែ​ទៅលើ​វិស័យ​ទេសចរណ៍​ប៉ុណ្ណោះ​។

លោក​ប្រាប់​ទៀត​ថា អ្នក​វិនិយោគ​តំបន់​ទេសចរណ៍​ពិសិដ្ឋ​នឹង​ទទួល​បាន​ការលើក​ទឹកចិត្ត និង​យន្តការ​មួយ​ចំនួន​ទៀត​ដែល​នេះ​គឺជា​ការលើក​ទឹកចិត្ត​ឲ្យ​វិស័យ​ឯកជន​ចូលរួម​ក្នុង​ការអភិវឌ្ឍ​ភាព​ជា​ដៃគូ​រវាង​រដ្ឋ និង​វិស័យ​ឯកជន​នៅ​តំបន់​គោលដៅ​ទេសចរណ៍​សំខាន់ៗ​។

លោក​ថ្លែង​ថា​៖ «​ការអភិវឌ្ឍ​ទាំងអស់​នេះ​សុទ្ធ​តែ​ត្រូវការ​ចាំបាច់​ការសហការ​គ្នារ​វាង​រដ្ឋ និង​វិស័យ​ឯកជន ដើម្បី​រក្សា​បាន​នូវ​បរិស្ថាន​ស្រស់បំព្រង​»​។

លោក ធួន ស៊ីណាន ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា​បាន​និយាយ​ថា ការសម្រេច​របស់​រដ្ឋាភិបាល​គឺជា​រឿង​ល្អ​ណាស់ ព្រោះ​នឹង​ជួយ​ឲ្យ​កម្ពុជា​មាន​រមណីយដ្ឋាន​សម្រាក​កម្សាន្ត​កាន់តែ​ច្រើន​។

លោក​ថ្លែង​ថា​៖ «​ការ​មាន​ច្បាប់​ដើម្បី​កំណត់​ពី​ការអភិវឌ្ឍ​បែប​នេះ​គឺ​ល្អ ព្រោះ​អាច​ចៀស​បាន​ពី​ភាព​គ្មាន​សណ្តាប់ធ្នាប់ និង​ចំណុច​អវិជ្ជមាន​ដែល​កំពុង​កើត​មាន​នៅ​តំបន់​ទេសចរណ៍​មួយ​ចំនួន​នាពេល​នេះ​»​។

លោក​លើក​ឧទាហរណ៍​ថា ជាក់ស្តែង​តំបន់​ប្រវត្តិសាស្ត្រ​ឧដុង្គ​ពេល​នេះ​មិន​សូវ​គេ​នឹក​ច្រើន​ទេ ព្រោះ​ការរៀបចំ និង​ការគ្រប់គ្រង​នៅ​ទីនោះ​មិន​សូវ​ល្អ​ទេ ដូចជា កន្លែង​លក់​អាហារ ហេដ្ឋារចនាសម្ព័ន្ធ សំរាម និង​ឥរិយាបថ​ប្រជាជន​មួយ​ចំនួន​។

លោក​ ធួន ស៊ីណាន បាន​បញ្ជាក់​ថា​៖ «​កម្ពុជា​ត្រូវតែ​រៀបចំ​ច្បាប់​សម្រាប់​គ្រប់គ្រង​តំបន់​ទេសចរណ៍​នីមួយៗ​ឲ្យ​បាន​ល្អ​។ ការរៀបចំ​ឲ្យ​មាន​ច្បាប់ ឬ​អនុក្រឹត្យ​ថ្មីៗ​វា​នឹង​ជួយ​ពង្រឹង​ការគ្រប់គ្រង​តំបន់​កុំ​ឲ្យ​មាន​ភាពអនាធិបតេយ្យ​។

យោង​តាម​ទិន្នន័យ​របស់​ក្រសួង​ទេសចរណ៍​បាន​ឲ្យ​ដឹងថា​កាលពី​ឆ្នាំ​ ២០១៨ ប្រទេស​កម្ពុជា​ទទួល​បាន​ភ្ញៀវទេសចរ​អន្តរជាតិ​ជាង ៦,២ លាន​នាក់ កើនឡើង​ ១០,៧ ​ភាគរយ​ធៀប​នឹង​ឆ្នាំ​ ២០១៧ ដោយ​ទទួល​បាន​ចំណូល​សរុប​ជាង ៤,៣ ​ពាន់​លាន​ដុល្លារ​៕LA

អត្ថបទគួរចាប់អារម្មណ៍