ភ្នំពេញ: រដ្ឋាភិបាលកម្ពុជាបានដាក់ឱ្យដំណើររវាងប្រព័ន្ធបច្ចេកវិទ្យាព័ត៌មានសម្រាប់គ្រប់គ្រងហិរញ្ញវត្ថុសាធារណៈ (FMIS) និងប្រព័ន្ធគ្រប់គ្រងទិន្នន័យពន្ធដារ ដើម្បីគ្រប់គ្រងដោយប្រសិទ្ធភាពនៃព័ត៌មានហិរញ្ញវត្ថុរដ្ឋាភិបាល តាមរយៈការតភ្ជាប់ក្រសួងសំខាន់ៗ និងរតនាគាររាជធានី-ខេត្តក្នុងការធ្វើឱ្យប្រសើរឡើងយ៉ាងខ្លាំងនូវថវិកា គណនេយ្យ និងដំណើរការសវនកម្មសម្រាប់ការគ្រប់គ្រងហិរញ្ញវត្ថុសាធារណៈ។
លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុដែលបានធ្វើជាអធិបតីក្នុងការដាក់ឱ្យដំណើរការនេះបានឱ្យដឹងកាលពីថ្ងៃអង្គារមុនថា រហូតមកដល់ពេលនេះ FMIS បានដាក់ឱ្យដំណើរការស្ទើរតែគ្រប់អង្គភាពស្នូលទទួលបន្ទុកហិរញ្ញវត្ថុ និងថវិកាទូទាំងប្រទេស។
លើសពីនេះប្រព័ន្ធ FMIS ក៏បានតភ្ជាប់ជាមួយប្រព័ន្ធផ្សេងៗជាច្រើនទៀតក្នុងនោះមានប្រព័ន្ធស្វ័យប្រវត្តិកម្មទិន្នន័យគយ ប្រព័ន្ធអេឡិចត្រូនិកគយ ប្រព័ន្ធធនាគាររបស់ធនាគារជាតិនៃកម្ពុជា និងរបស់ធនាគារពាណិជ្ជដៃគូជាច្រើន ប្រព័ន្ធគ្រប់គ្រងបំណុលសាធារណៈ និងប្រព័ន្ធគ្រប់គ្រងចំណូលមិនមែនសារពើពន្ធ។
លោកថា៖ «ប្រព័ន្ធសន្ធានកម្មនេះកំពុងបង្ហាញការសម្រេចបានដោយជោគជ័យរបស់រដ្ឋាភិបាលលើគោលនយោបាយកែទម្រង់ការគ្រប់គ្រងហិរញ្ញវត្ថុសាធារណៈក្នុងគោលបំណងគ្រប់គ្រង និងប្រមូលប្រាក់ចំណូលពន្ធប្រកបដោយប្រសិទ្ធភាព»។
លោក គង់ វិបុល អគ្គនាយកនៃអគ្គនាយកដ្ឋានពន្ធដារ (GDT) បានឱ្យដឹងថា GDT កំពុងធ្វើឱ្យប្រសើរឡើងរបៀបធ្វើការងារក្នុងការចាប់យកបច្ចេកវិទ្យាឌីជីថលនៅឆ្នាំនេះ ដើម្បីធ្វើទំនើបកម្ម និងស្វ័យប្រវត្តិកម្មក្នុងការប្រមូលប្រាក់ចំណូលពីពន្ធរបស់ប្រទេស ជាពិសេសការកែលម្អសេវាសម្រាប់អ្នកបង់ពន្ធ។
លោកថា៖ «អគ្គនាយកដ្ឋានពន្ធដារបានផ្ដល់ឧបករណ៍សន្ធានកម្មរវាងអគ្គយកដ្ឋានគយ និងរដ្ឋាករលើប្រព័ន្ធការប្រមូលប្រាក់ចំណូល ហើយនឹងដាក់ឱ្យប្រើប្រាស់ប្រព័ន្ធគ្រប់គ្រងយានយន្ត សម្រាប់ក្រសួងសាធារណៈការ និងដឹកជញ្ជូននៅពេលអនាគតខាងមុខ»។
លោក Anthony Galliano ប្រធានប្រតិបត្តិក្រុមហ៊ុនវិនិយោគហិរញ្ញវត្ថុសាជីវកម្ម Investment Management បានប្រាប់ភ្នំពេញប៉ុស្ដិ៍កាលពីថ្ងៃអាទិត្យថា ប្រព័ន្ធ FMIS នេះផ្ដល់អត្ថប្រយោជន៍ដំបូងនឹងត្រូវបានដឹងនៅក្នុងវិស័យសាធារណៈ។ លោកថា៖ «ខ្ញុំរំពឹងថា FMIS នឹងពង្រីកទៅដល់វិស័យផ្សេងទៀតនៃទិន្នន័យការប្រមូលប្រាក់ចំណូល។
បច្ចុប្បន្នវិស័យឯកជននឹងទទួលបានអត្ថប្រយោជន៍ពីអ្វីជាការកែលម្អដ៏ធំនៃដំណើរការការគ្រប់គ្រងហិរញ្ញវត្ថុសាធារណៈ ដែលអាចធ្វើឱ្យមានប្រសិទ្ធភាពនៅក្នុងក្រសួងរដ្ឋាភិបាល និងរតនាគារខេត្ត និងជាបន្តបន្ទាប់ធ្វើឱ្យប្រសើរឡើង និងកែលម្អសេវាដល់វិស័យឯកជន»។
កាលពីឆ្នាំមុនកម្ពុជាប្រមូលប្រាក់ចំណូលបានប្រហែល ៦ ពាន់លានដុល្លារ។ ក្នុងចំណោមនោះ អគ្គនាយកដ្ឋានគយ និងរដ្ឋាករប្រមូលបាន ២,២៦ ពាន់លានដុល្លារ ខណៈដែលអគ្គនាយកដ្ឋានពន្ឋដារប្រមូលបាន ២,៣ ពាន់លានដុល្លារ៕ LA