.jpg)
គម្រោងរុករករ៉ែមាស ក្នុងស្រុកកែវសីមា ខេត្តមណ្ឌលគិរី។ EMERALD RESOURCES
ភ្នំពេញៈ កម្ពុជាទទួលបានចំណូលមិនមែនសារពើពន្ធពីវិស័យរ៉ែជាង ២១ លានដុល្លារកាលពីឆ្នាំ ២០២០ កើនឡើងតិចតួច ធៀបនឹងឆ្នាំ ២០១៩ មានចំនួន ២១ លានដុល្លារ។ នេះបើតាមមន្រ្តីជាន់ខ្ពស់ក្រសួងរ៉ែ និងថាមពល។
អគ្គនាយកនៃអគ្គនាយកដ្ឋានធនធានរ៉ែនៃក្រសួងរ៉ែ និង ថាមពល លោក យស់ មុនីរ៉ាត់ ប្រាប់ភ្នំពេញ ប៉ុស្តិ៍ថា ចំណូលមិនមែនសារពើពន្ធក្នុងវិស័យរ៉ែសំដៅដល់ប្រាក់កម្រៃអាជ្ញាប័ណ្ណ និងសួយសារធនធានរ៉ែពីក្រុហ៊ុនធ្វើអាជីវកម្ម។
លោកនិយាយថា៖ «នៅឆ្នាំ ២០២០ ចំណូលមិនមែនសារពើពន្ធពីវិស័យរ៉ែជាតួលេខមូលជាង ២១ លានដុល្លារ កើនបន្តិច បើធៀបនឹងឆ្នាំមុន។ ចំណូលនេះដោយមិនគិតពីចំណូលពន្ធផ្សេងទៀតទេ»។
របាយការណ៍ក្រសួង រ៉ែ និង ថាមពល បានឲ្យដឹងថា នៅឆ្នាំ ២០១៨ ការប្រមូលចំណូលមិនមែនសារពើពន្ធបានចំនួន ២០ លានដុល្លារ ដែលស្មើនឹង ១៣៣ ភាគរយ នៃចំណូលដែលបានគ្រោងទុក។
បច្ចុប្បន្ន ក្រសួងរ៉ែ និងថាមពល បានផ្តល់អាជ្ញាប័ណ្ណអាជីវកម្មខ្សាច់គ្រប់ប្រភេទសរុបជាង ១០០ អាជ្ញាប័ណ្ណនៅទូទាំងប្រទេស និងក្រសួងបានផ្តល់អាជ្ញាប័ណ្ណសិក្សាស្វែងរករ៉ែលោហៈចំនួន ៤០ នៅទូទាំងប្រទេស៕
