.jpg)
ច្រកព្រំដែនអន្តរជាតិបាវិតនៃខេត្តស្វាយរៀងជាប់ជាមួយព្រំដែនប្រទេស វៀតណាម។ រូបថត ភ្នំពេញ ប៉ុស្តិ៍
ភ្នំពេញ: រដ្ឋាភិបាលកម្ពុជាបានដាក់ចេញវិធានការមួយចំនួន ដើម្បីធ្វើឲ្យប្រសើរឡើងនូវហេដ្ឋារចនាសម្ព័ន្ធនៅតាមច្រកព្រំដែនពិសេសជំរុញការអនុវត្ត ការត្រួតពិនិត្យច្រកចេញចូលតែមួយនៅព្រំដែនរវាងកម្ពុជាជាមួយវៀតណាម និងថៃក្នុងការជំរុញពាណិជ្ជកម្មឆ្លងកាត់ព្រំដែន។
ការដាក់ចេញនូវវិធានការនេះធ្វើឡើងក្នុងកិច្ចប្រជុំស្តីពីការអនុវត្តការត្រួតពិនិត្យច្រកចេញចូលតែមួយរវាងកម្ពុជា ថៃ និងវៀតណាមរបស់គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុកាលពីថ្ងៃសុក្រ។ នេះបើយោងតាមសេចក្តីប្រកាសព័ត៌មាន។
សេចក្តីប្រកាសព័ត៌មានរបស់គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុបានចង្អុលបង្ហាញឲ្យរដ្ឋាភិបាលចាំបាច់ត្រូវធ្វើការលើកកម្ពស់ការដឹកជញ្ជូនទំនិញឆ្លងកាត់ព្រំដែនជាមួយប្រទេសថៃ និងប្រទេសវៀតណាម។
សេចក្តីប្រកាសព័ត៌មាន៖ «ដើម្បីលើកកម្ពស់ពាណិជ្ជកម្មទ្វេភាគី រដ្ឋាភិបាលកម្ពុជាត្រូវផ្តោតលើការកែលម្អហេដ្ឋារចនាសម្ព័ន្ធនៅតាមព្រំដែនអន្តរជាតិបាវិត-ម៉ុកបៃនៅក្នុងខេត្តស្វាយរៀង។ សេចក្តីប្រកាសព័ត៌មានឲ្យដឹងទៀតថា៖ «ដើម្បីជំរុញការកែលម្អហេដ្ឋារចនាសម្ព័ន្ធរូបវន្តក្នុងទឹកដីកម្ពុជា ពិសេសផ្លូវភ្ជាប់ច្រកព្រំដែនត្រូវមានការបែងចែកតាមប្រភេទចរាចរណ៍ ឬប្រភេទមធ្យោបាយដឹកជញ្ជូន ហើយបន្តសហការយ៉ាងជិតស្និទ្ធជាមួយអាជ្ញាធរ [ប្រទេសជិតខាង]»។
គណៈកម្មាធិការនេះក៏គូសបញ្ជាក់ពីការសាងសង់ផ្លូវល្បឿនលឿនពីភ្នំពេញទៅបាវិត និងការសាងសង់តំបន់ត្រួតពិនិត្យរួមនៅព្រំដែនរវាងកម្ពុជា និងវៀតណាមផងដែរ ដើម្បីសម្រួលដល់នីតិវិធីបញ្ចេញទំនិញឆ្លងព្រំដែន បង្កើនប្រសិទ្ធភាពការងារ ជាពិសេសជំរុញការអនុវត្តការត្រួតពិនិត្យច្រកចេញចូលតែមួយ។
លោក Vu Quang Minh ឯកអគ្គរដ្ឋទូតវៀតណាមប្រចាំនៅកម្ពុជាបានឲ្យដឹងកាលពីខែធ្នូឆ្នាំមុនថា កំណើនពាណិជ្ជកម្ម និងវិនិយោគព្រមទាំងកំណើនភ្ញៀវទេសចរខ្ពស់រវាងប្រទេសទាំង ២ បានទាក់ទាញក្រុមហ៊ុនវៀតណាមមួយចំនួនមកកម្ពុជា។
ទន្ទឹមនឹងនេះខណៈច្រកព្រំដែនអន្តរជាតិប៉ោយប៉ែតមិនអាចបំពេញកំណើនតម្រូវការចរាចរណ៍ទំនិញ រដ្ឋាភិបាលកម្ពុជាបានស្វែងរកការឯកភាពជាមួយរដ្ឋាភិបាលថៃក្នុងការដាក់ឲ្យដំណើរការជាបណ្តោះអាសន្ននូវច្រកព្រំដែនអន្តរជាតិស្ទឹងបត់បាន-ណងអៀន នៅខេត្តបន្ទាយមានជ័យ។
លោក ស៊ិន ចន្ទី ប្រធានសមាគមភ្នាក់ងារបញ្ជូនទំនិញកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ហេដ្ឋារចនាស្ព័ន្ធបានដើរតួនាទីយ៉ាងសំខាន់ ដើម្បីគាំទ្រដល់ពាណិជ្ជកម្មទ្វេភាគី។ លោកបន្តថា ការដឹកជញ្ជូនទំនិញលឿនជាងមុនគឺវាបានជួយកាត់បន្ថយការកកស្ទះចរាចរណ៍នៅតាមព្រំដែន ខណៈព្រំដែនអន្តរជាតិប៉ោយប៉ែតមានការចង្អៀតខ្លាំង។ លោកថ្លែងថា៖ «វាជាការវិវត្តល្អដែលរដ្ឋាភិបាលមានផែនការធ្វើការកែលម្អហេដ្ឋារចនាសម្ព័ន្ធនៅតាមព្រំដែនរវាងកម្ពុជាជាមួយវៀតណាម និងថៃ»។
ទំហំពាណិជ្ជកម្មទ្វេភាគីរវាងកម្ពុជា និងវៀតណាមមានតម្លៃជាង ៥ ពាន់លានដុល្លារ កាលពីឆ្នាំមុន បើធៀបនឹង ៤,៧ ពាន់លាន កាលពីឆ្នាំ ២០១៨។ ចំណែកទំហំពាណិជ្ជកម្មកម្ពុជាជាមួយថៃសម្រេចបានជាង ៩ ពាន់លានដុល្លារ។ កម្ពុជានាំចេញទំនិញទៅថៃ និងវៀតណាមភាគច្រើនផលិតផលកសិកម្ម៕LA
