ភ្នំពេញ: រដ្ឋាភិបាលបានប្រកាសដកហូតសិទ្ធិធ្វើអាជីវកម្មរបស់ក្រុមហ៊ុនប្រមូលសំរាមស៊ីនទ្រី (CINTRI) មកឲ្យសាលារាជធានីភ្នំពេញធ្វើការគ្រប់គ្រងជាបណ្តោះអាសន្នសិន ដើម្បីដោះស្រាយបញ្ហាសំរាមនៅទីក្រុងភ្នំពេញ មុននឹងដាក់ឲ្យមានការដេញថ្លៃឡើងវិញ។
ការសម្រេចនេះត្រូវបានធ្វើឡើងដោយលោកនាយករដ្ឋមន្ត្រី ហ៊ុន សែន ដែលថ្លែងក្នុងពិធីប្រគល់សញ្ញាបត្រដល់និស្សិតចំនួន ៤ ០៣៨ នាក់ នៅទីក្រុងភ្នំពេញកាលពីថ្ងៃទី ២២ ខែ តុលា ឆ្នាំ ២០១៩។
លោកនាយករដ្ឋមន្ត្រី ហ៊ុន សែន បានប្រកាសដកហូតសិទ្ធិអាជីវកម្មរបស់ក្រុមហ៊ុនស៊ីនទ្រី (CINTRI) ដោយប្រគល់ឲ្យសាលារាជធានីភ្នំពេញធ្វើការគ្រប់គ្រងជាបណ្តោះអាសន្នរហូតមានការដេញថ្លៃជាផ្លូវការ។ លោកថ្លែងថា៖ «ទុកក្រុមហ៊ុនស៊ីនទ្រីបន្តទៀតគឺអត់បាន ដូច្នេះដើម្បីកុំឲ្យក្រុមហ៊ុនស៊ីនទ្រីខាតបង់ រដ្ឋត្រូវចេញថ្លៃខាតបង់ រដ្ឋត្រូវយកក្រុមហ៊ុនមកវិញសិន ទាំងបុគ្គលិក ទាំងសម្ភារ ហើយរដ្ឋជាអ្នកកាន់កាប់ក្រុមហ៊ុននោះសិន»។
តាមលោកនាយករដ្ឋមន្ត្រី ហ៊ុន សែន រដ្ឋាភិបាលនឹងរៀបចំឲ្យមានការដេញថ្លៃជាសាធារណៈដោយលោកអះអាងថានៅក្នុងពេលនេះនឹងមិនឲ្យមានក្រុមហ៊ុនមួយផ្តាច់មុខនោះទេ។
លោកបានថ្លែងថា៖ «អ៊ីចឹងជម្រើសត្រូវបែងចែកតាមក្រុមហ៊ុនយ៉ាងតិច ៣ ទៅ ៤ ក្រុមហ៊ុន យើងនឹងរៀបចំតំបន់ដាក់ឲ្យដេញថ្លៃរាប់ទាំងក្រុមហ៊ុនស៊ីនទ្រី ក្រុមហ៊ុនមួយអនុញ្ញាតឲ្យគ្រប់គ្រងតែមួយកន្លែងប៉ុណ្ណោះ»។
បច្ចុប្បន្នទីក្រុងភ្នំពេញកំពុងជួបវិបត្តិសំរាមដែលក្រុមហ៊ុន ស៊ីនទ្រី តែមួយមិនអាចគ្រប់គ្រងបានរហូតដល់សំរាមត្រូវបានទុកចោលជាច្រើនថ្ងៃដោយមិនប្រមូលបង្កឲ្យប៉ះពាល់បរិស្ថានទីក្រុង។
លោក នួន សំណាវុធ នាយកទីចាត់ការគ្រប់គ្រងសំណល់ និងបរិស្ថាននៃសាលារាជធានីភ្នំពេញបានប្រាប់ភ្នំពេញប៉ុស្តិ៍កាលពីខែកញ្ញាថា ប្រទេសកម្ពុជាទាំងមូលមានកាកសំណល់ជាង ១ ម៉ឺនតោនជារៀងរាល់ថ្ងៃ ឬច្រើនជាង ៣,៦ លានតោននៅក្នុង ១ ឆ្នាំក្នុងនោះនៅទីក្រុងភ្នំពេញមានកាកសំណល់សំរាមចន្លោះពី ២ ទៅ ៣ ពាន់តោនក្នុង ១ ថ្ងៃ។
លោក ទួន ស៊ីផេង ប្រធានក្រុមហ៊ុនស៊ីនទ្រី និងលោកស្រី សេង សូរីដា អនុប្រធានក្រុមហ៊ុនស៊ីនទ្រីបានបដិសេធធ្វើអត្ថាធិប្បាយចំពោះការសម្រេចរបស់រដ្ឋាភិបាលក្នុងការដកហូតក្រុមហ៊ុនស៊ីនទ្រីមកធ្វើការគ្រប់គ្រងវិញនេះ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានប្រាប់ភ្នំពេញប៉ុស្តិ៍កាលពីថ្ងៃអង្គារថា បន្ទាប់ពីការប្រកាសរបស់នាយករដ្ឋមន្ត្រី សាលារាជធានីភ្នំពេញនឹងបើកកិច្ចប្រជុំពិភាក្សាបញ្ហានេះ។ លោកបានថ្លែងថា៖ «យើងនឹងគិតគូរពីនីតិវិធី និងធ្វើការស្វះស្វែងរកដៃគូសម្រាប់វិនិយោគលើការគ្រប់គ្រង ការប្រមូលសំរាមជំនួសក្រុមហ៊ុនស៊ីនទ្រីដូចដែលសម្តេចណែនាំ»។
លោក ប៉ិច ពិសី នាយកកម្មវិធីជាន់ខ្ពស់នៃអង្គការតម្លាភាពកម្ពុជា (IT) បានសាទរចំពោះយន្តការរបស់រដ្ឋាភិបាលសម្រេចដកសិទ្ធិរបស់ក្រុមហ៊ុនស៊ីនទ្រី និងប្រកាសឲ្យមានការដេញថ្លៃលើការប្រមូលសំរាមនេះ។
លោកបន្តថា ទោះបីយ៉ាងណាការដេញថ្លៃនេះត្រូវធ្វើឡើងដោយបើកចំហ និងតម្លាភាព ដើម្បីផ្តល់ឲ្យក្រុមហ៊ុនដែលមានសមត្ថភាពពិតប្រាកដទទួលបានសិទ្ធិគ្រប់គ្រង និងប្រមូលសំរាម។ លោកបានថ្លែងថា៖ «យើងត្រូវធ្វើឡើងដោយបើកចំហ ការដេញថ្លៃបែបនេះគេមានយន្តការច្បាស់លាស់។ យើងត្រូវការផ្សព្វផ្សាយជាសាធារណៈ»។
លោកបានបន្តថា៖ «យើងត្រូវផ្តល់សិទ្ធិឲ្យក្រុមហ៊ុនមានសមត្ថភាពដែលដាក់មកបិទក្នុងស្រោមសំបុត្រត្រូវមានគណៈកម្មការត្រួតពិនិត្យវាយតម្លៃទៅលើក្រុមហ៊ុនដាក់ពាក្យមកជាដើម។ ដើម្បីធានាថាក្រុមហ៊ុនដាក់មកដោយសមត្ថភាពមិនមានសែស្រឡាយ មិនមានបក្សពួកទេ»។
ក្រុមហ៊ុន ស៊ីនទ្រី ដែលមានបុគ្គលិកប្រមាណ ១ ៥០០ នាក់ កាលពីឆ្នាំ ២០១៧ ជាក្រុមហ៊ុនឯកជនតែមួយគត់ដែលទទួលបានសិទិ្ធផ្តាច់មុខលើអាជីវកម្មប្រមូលសំរាមរយៈពេល ៤៧ ឆ្នាំ នៅទីក្រុងភ្នំពេញចាប់តាំងពីខែកញ្ញា ឆ្នាំ ២០០២។ នេះបើយោងតាមសេចក្តីរាយការណ៍របស់ភ្នំពេញប៉ុស្តិ៍កាលពីមុន៕LA