.jpg)
លោក អូន ព័ន្ធមុនីរ័ត្ន ដឹកនាំកិច្ចប្រជុំដើម្បីប្រមូលធាតុចូល។ រូបថត MoEF
ភ្នំពេញៈ រដ្ឋាភិបាលនឹងបង្កើតសាជីវកម្មធានាឥណទាននៅកម្ពុជា (CGC) ក្នុងពេលឆាប់ៗខាងមុខនេះដើម្បីបម្រើជាឧបករណ៍ចែករំលែកហានិភ័យ សម្រាប់គ្រឹះស្ថានហិរញ្ញវត្ថុក្នុងការបញ្ចេញកម្ចីបន្ថែមដល់ក្រុមហ៊ុន និងឧស្សាហកម្មដែលរងផលប៉ះពាល់ដោយសារតែជំងឺកូវីដ១៩។
យោងតាមលទ្ធផលប្រជុំស្ដីពីការចែករំលែកធាតុចូលដែលបានធ្វើឡើងដោយក្រសួងសេដ្ឋកិច្ច និងហិរញ្ញវត្ថុ (MoEF) ដែលបានដឹកនាំដោយលោក អូន ព័ន្ធមុនីរ័ត្ន ជារដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ គំនិតផ្តួចផ្ដើមក្នុងការបង្កើតសាជីវកម្មធានាឥណទាននេះ គឺជាយន្តការឆ្លើយតបបន្ទាន់របស់រដ្ឋាភិបាលស្របតាមវិធានការជុំទី ៤ ដែលបានដាក់ឲ្យដំណើរការកាលពីដើមខែនេះ ដើម្បីគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ច ក្នុងដំណាក់កាលនៃវិបត្តិជំងឺកូវីដ ១៩ ត្រូវស្ដារ និងជំរុញកំណើនសេដ្ឋកិច្ចកម្ពុជាក្រោយវិបត្តិ។
សេចក្ដីប្រកាសនោះឲ្យដឹងថា៖ «សាជីវកម្មធានាឥណទានកម្ពុជាមានតួនាទីផ្ដល់សេវាធានាឥណទានដល់ក្រុមហ៊ុនអាជីវកម្មធុរកិច្ចនៅក្នុងវិស័យអាទិភាព ដែលទទួលរងផលប៉ះពាល់ធ្ងន់ធ្ងរពីវិបត្តិកូវីដ ១៩ ដើម្បីបង្កើតលទ្ធភាពទទួលបានហិរញ្ញប្បទាន សម្រាប់ជាទុនបង្វិលរបស់ក្រុមហ៊ុនទាំងនោះសំដៅធានាបាននិរន្តរភាពអាជីវកម្ម និងសម្របទៅតាមបរិបទថ្មីនៃធុរកិច្ចបន្ទាប់ពីវិបត្តិកូវីដ ១៩»។
កាលបរិច្ឆេទសម្រាប់ដាក់ដំណើរការនៅមិនទាន់កំណត់ជាក់លាក់នៅឡើយ។
លោក មាស សុខសេនសាន្ត អ្នកនាំពាក្យ MoEF បានប្រាប់ភ្នំពេញប៉ុស្ដិ៍ថា CGC នឹងដើរតួនាទីសំខាន់ជួយសម្រួលអាជីវកម្មដែលចង់ស្វែងរកមូលនិធិបន្ថែមពីប្រភពទុនគ្រឹះស្ថានហិរញ្ញវត្ថុនានាដោយទទួលបានការធានាពីរដ្ឋាភិបាល។
លោកថ្លែងថា៖ «គំនិតផ្តួចផ្ដើមនេះនឹងជួយដល់អាជីវកម្មដែលមានផលពិបាកក្នុងការស្វែងរកប្រភពមូលនិធិសម្រាប់អាជីវកម្មរបស់ពួកគេ ពីប្រភពទុននានា និងវិស័យហិរញ្ញវត្ថុដោយរដ្ឋាភិបាលនឹងជួយចែករំលែកហានិភ័យជាមួយពួកគេសម្រាប់វិស័យហិរញ្ញវត្ថុក្នុងការបញ្ចេញកម្ចីកាន់តែច្រើនថែមទៀត»។
លោក Shin Chang Moo ប្រធានធនាគារ PPCBank បានប្រាប់ភ្នំពេញប៉ុស្ដិ៍ថា MoEF កំពុងចែករំលែកគំនិត និងស្វែងរកធាតុចូលពីគ្រឹះស្ថានធនាគារស្ដីពីគំនិតផ្តួចផ្ដើម «សាជីវកម្មធានាឥណទាន» ដែលធ្លាប់បានប្រជុំប៉ុន្មានដងរួចហើយ។
លោកបានពន្យល់ថា ផែនការសាជីវកម្មធានាឥណទាន (Credit Guarantee Schemes CGS) ត្រូវបានប្រើប្រាស់ជាមធ្យោបាយដ៏ពេញនិយម ដើម្បីបន្ធូរបន្ថយឧបសគ្គហិរញ្ញប្បទានសម្រាប់ SMEs នៅក្នុងបណ្ដាប្រទេសជាច្រើនផ្សេងទៀត។ នៅក្នុងប្រទេសកូរ៉េ រដ្ឋាភិបាលកំពុងដំណើរការផែនការធានាឥណទានរហូតដល់ ៩០ ភាគរយ សម្រាប់ SMEs រងផលប៉ះពាល់ដោយសារតែជំងឺកូវីដ១៩។
លោកលើកឡើងថា៖ «ធនាគារ PPCBank ក៏បានដាក់ចេញនូវផែនការធានានេះដែលហៅថា «ការជួយសម្រួលការចែករំលែកហានិភ័យ» ចាប់តាំងពីឆ្នាំ ២០១៩ ស្ថិតក្រោមការឧបត្ថម្ភពីសាជីវកម្មហិរញ្ញវត្ថុអន្តរជាតិ»។
លោកបញ្ជាក់ថា៖ «CGS ដែលនឹងដាក់ចេញដោយ MoEF ច្បាស់ណាស់នឹងជួយ SMEs មានលទ្ធភាពទទួលបានឥណទានបន្ថែមទៀត ដោយសារតែពួកគេនៅមានកង្វះទ្រព្យបញ្ចាំ និងក៏កាត់បន្ថយហានិភ័យដល់ធនាគារផងដែរ។ ប៉ុន្តែសម្រាប់រយៈពេលកាន់តែវែង ធនាគារគួរតែអភិវឌ្ឍជំនាញវាយតម្លៃឥណទាន ដោយពឹងផ្អែកលើលទ្ធភាពអាជីវកម្ម និងហិរញ្ញវត្ថុជាជាងតម្លៃទ្រព្យបញ្ចាំ ដើម្បីកាត់បន្ថយការខាតបង់ដែលអាចចៀសវាងបានដោយសារតែកម្ចី។ បើមិនដូច្នេះទេ CGS នឹងមិនមែនជាដំណោះស្រាយប្រកបដោយចីរភាពនោះទេ សម្រាប់លើកកម្ពស់ហិរញ្ញប្បទានរបស់ SME»។
លោក សាយ សូនី នាយកប្រតិបត្តិរបស់គ្រឹះស្ថានមីក្រូហិរញ្ញវត្ថុប្រាសាក់បានសម្តែងការសាទរចំពោះគំនិតផ្តួចផ្ដើមនេះ ព្រោះវានឹងបម្រើជាឧបករណ៍ដ៏សំខាន់ក្នុងការលើកកម្ពស់សេដ្ឋកិច្ច។
លោកថ្លែងថា៖ «ជាយន្តការដ៏ល្អចំពោះការធានានេះ ប៉ុន្តែគ្រឹះស្ថានហិរញ្ញវត្ថុនឹងត្រូវការសមត្ថភាពសងប្រាក់របស់អតិថិជនជាអាទិភាពផងដែរ»។
លោកបន្ថែមថាគម្រោងនេះកាន់តែល្អ ប្រសិនបើគេសំដៅដល់សហគ្រាសធុនតូចបំផុត ធុនតូច និងមធ្យម (MSME)។
កម្ចីដុលរបស់ប្រាសាក់កើនឡើង ៦,៦ ភាគរយដល់ ២ ៦៦៥ លានដុល្លារពី ២ ៥០១ លានដុល្លារ និងប្រាក់បញ្ញើកើនប្រហែល ៨ ភាគរយពី ១ ៧៨៨ លានដុល្លារ ដល់ ១ ៩៣១ លានដុល្លារត្រឹមដំណាច់ខែមិថុនាឆ្នាំនេះ ខណៈទ្រព្យសកម្មសរុបបានកើនឡើងដល់ ៣ ៣៨៣ លានដុល្លារ។
របាយការណ៍ពាក់កណ្ដាលឆមាសទី ១ របស់ធនាគារជាតិនៃកម្ពុជាដែលចេញផ្សាយនៅពេលថ្មីៗនេះបានឲ្យដឹងថា វិស័យទេសចរណ៍គឺជាវិស័យរងផលប៉ះពាល់ខ្លាំងបំផុតដោយសារតែវីរុសកូរ៉ូណា ដោយសារភ្ញៀវទេសចរបរទេសធ្លាក់ចុះខ្លាំង ៥៥ ភាគរយ ខណៈវិស័យផលិតកម្មក៏បានធ្លាក់ចុះ ១១ ភាគរយ៕LA
