ភ្នំពេញៈ រដ្ឋាភិបាលកម្ពុជាបានផ្តោតលើយុទ្ធសាស្ត្រ ពង្រឹងភាពប្រកួតប្រជែង និងការចាប់យកប្រភពកំណើនថ្មីនៃឧស្សាហកម្មទី ៤ ដើម្បីទប់ទល់នឹងនូវចលនាការពារនិយម និងការបែងចែកប៉ូលភូមិសាស្ត្រនយោបាយក្នុងយុទ្ធសាស្ត្រសមាហរណកម្មពាណិជ្ជកម្មកម្ពុជា ២០១៩-២០២៣ របស់ខ្លួន។ នេះបើយោងតាមរដ្ឋមន្ត្រីក្រសួងពាណិជ្ជកម្ម។
ថ្លែងក្នុងសិក្ខាសាលាផ្សព្វផ្សាយថ្នាក់ជាតិស្ដីពី «យុទ្ធសាស្ត្រសមាហរណកម្មពាណិជ្ជកម្មកម្ពុជាឆ្នាំ ២០១៩-២០២៣» កាលពីម្សិលមិញលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានឲ្យដឹងថា ការលេចឡើងនូវចលនាការពារនិយម និងការចែកប៉ូលភូមិសាស្ត្រនយោបាយបច្ចុប្បន្នបានបង្កើតទាំងគំរាមកំហែង និងឱកាសថ្មីៗជាច្រើនសម្រាប់ប្រទេសមានសេដ្ឋកិច្ចតូចៗដូចជាកម្ពុជា។
លោកថ្លែងថា៖ «គោលនយោបាយពាណិជ្ជកម្មរបស់កម្ពុជាត្រូវតែមានភាពបត់បែនទៅតាមពេលវេលា និងបរិបទ ដើម្បីធ្វើយ៉ាងណាឲ្យកម្ពុជាចេញផុតក៏ដូចជាអភិវឌ្ឍដោយច្បាមយកនូវកាលានុវត្តភាពល្អៗចេញពីបរិបទនាពេលសព្វថ្ងៃ ព្រមជាមួយនឹងការខិតខំបើកទីផ្សារថ្មីៗ»។
តាមលោក ប៉ាន សូរស័ក្តិ បច្ចុប្បន្នក្រសួងពាណិជ្ជកម្មកំពុងខិតខំបង្កើនកិច្ចសហប្រតិបត្តិការជាមួយគ្រប់ប្រទេសលើពិភពលោកតាមរយៈការចុះកិច្ចព្រមព្រៀង ឬសន្ធិសញ្ញាផ្សេងជាមួយបណ្តាសមាគម និងសហគមន៍ ដើម្បីធ្វើឲ្យកម្ពុជាទទួលបានទីផ្សារកាន់តែច្រើន និងមានសមត្ថភាពប្រកួតប្រជែងកាន់តែខ្លាំង។
លោកបន្តថាការពង្រឹងវិស័យអប់រំ ជំនាញវិជ្ជាជីវៈ ការសម្រួលពាណិជ្ជកម្ម ភ័ស្ដុភារពាណិជ្ជកម្ម បរិយាកាសធុរកិច្ច ហិរញ្ញវត្ថុពាណិជ្ជកម្ម និងហេដ្ឋារចនាសម្ព័ន្ធ គឺជាគន្លឹះសម្រាប់ភាពប្រកួតប្រជែង។ លោកថ្លែងថា៖ «ដើម្បីអាចសម្រេចយុទ្ធសាស្ត្រសមាហរណកម្មពាណិជ្ជកម្មកម្ពុជា ២០១៩-២០២៣ បានកម្ពុជាត្រូវតែត្រៀមខ្លួនឲ្យបានល្អ មានឯករាជភាពម្ចាស់ការការបង្កើតហេដ្ឋារចនាសម្ព័ន្ធរូបវន្តតាមរយៈការបង្រៀនប្រជាជន ពិសេសក្មេងៗឲ្យមានចំណេះដឹងច្បាស់លាស់ដែលអាចចូលប្រឡូកបានក្នុងវិស័យឧស្សាហកម្ម និងសេដ្ឋកិច្ចឌីជីថល និងមានវិជ្ជាជីវៈ»។
យុទ្ធសាស្ត្រសមាហរណកម្មពាណិជ្ជកម្មកម្ពុជា (CTIS) គឺជាឯកសារចម្បងក្នុងការចង្អុលបង្ហាញ និងកំណត់នូវអនុសាសន៍ជាគោលនយោបាយសម្រាប់ការអភិវឌ្ឍវិស័យពាណិជ្ជកម្មនៅកម្ពុជា។ យុទ្ធសាស្ត្រនេះត្រូវបានដាក់ចេញដំបូងក្នុងឆ្នាំ ២០០១ និងបានធ្វើបច្ចុប្បន្នភាពបីលើកហើយ។
អ្នកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្មបានឲ្យដឹងថា យុទ្ធសាស្ត្រសមាហរណកម្មពាណិជ្ជកម្មកម្ពុជាមានសារៈសំខាន់ជាអន្តរវិស័យ ព្រោះវាត្រូវបានរៀបចំឡើងដោយផ្អែកលើកត្តាសំខាន់ៗមួយចំនួនដូចជា ការប្រែប្រួលនៃបរិបទសេដ្ឋកិច្ចពិភពលោក។
របាយការណ៍ប្រចាំឆមាសទី ១ របស់ធនាគារជាតិនៃកម្ពុជាបានឲ្យដឹងថា ការធ្វើពាណិជ្ជកម្មរបស់កម្ពុជាជាមួយបរទេសបានដំណើរការទៅមុខល្អប្រសើរដោយការនាំចេញមានតម្លៃសរុប ៦,៨ ពាន់លានដុល្លារក្នុងនោះចំណែកទីផ្សារអាមេរិកមានចំនួន ២៨ ភាគរយតំបន់អឺរ៉ុប ២៦,៦ ភាគរយ ចក្រភពអង់គ្លេស ៦,៦ ភាគរយ និងជប៉ុន ៧,៧ ភាគរយ។
ចំណែកការនាំចូលមានតម្លៃសរុបរហូត ១០,៥ ពាន់លានដុល្លារនាំមុខដោយប្រទេសចិនដែលមាន ៤៦ ភាគរយ ថៃ ១៥,៦ ភាគរយ វៀតណាម ១៣,២ ភាគរយ និងជប៉ុន ៤,៥ ភាគរយ។
លោក លឹមហេង អនុប្រធានសភាពាណិជ្ជកម្មកម្ពុជាបាននិយាយថា ការធ្វើកំណែទម្រង់សេដ្ឋកិច្ចផ្ទៃក្នុងពិតជាមានភាពចាំបាច់ណាស់សម្រាប់កម្ពុជា ដើម្បីក្លាយជាប្រទេសរីកចម្រើន និងមានចំណែកទីផ្សារអន្តរជាតិកាន់តែច្រើន។
លោកថ្លែងថា៖ «ការដាក់ចេញនូវយុទ្ធសាស្ត្រដើម្បីការប្រកួតប្រជែងផ្នែកពាណិជ្ជកម្មគឺជារឿងដែលត្រូវធ្វើ ព្រោះបច្ចុប្បន្នទីផ្សាររបស់យើង មិនមែនត្រឹមតែក្នុងតំបន់អាស៊ាន ឬអាស៊ីដូចមុនទៀតទេ»។
លោកបន្តថាក្នុងដំណាក់កាលដែលសេដ្ឋកិច្ចពាណិជ្ជកម្មពិភពលោកកំពុងមានការប្រកួតប្រជែង និងប្រែប្រួលខ្លាំងនេះកម្ពុជាត្រូវតែបង្កើនការពង្រឹងសមត្ថភាពកម្លាំងជំនាញរបស់ខ្លួនឲ្យកាន់តែប្រសើរបន្ថែមទៀត។ លោកបន្តថា៖ «ដើម្បីធ្វើឲ្យសមត្ថភាពប្រកួតប្រជែងមានភាពរឹងមាំ កត្តាមួយចំនួនដែលត្រូវតែធ្វើកំណែទម្រង់មានដូចជា ធនធានមនុស្ស ថ្លៃដើមផលិតខ្ពស់ អគ្គិសនី និងថ្លៃដឹកជញ្ជូនខ្ពស់ជាដើម»៕LA