ភ្នំពេញៈ រដ្ឋាភិបាលកម្ពុជាបានប្រកាសផ្អាកការនាំចេញផលនេសាទ (ត្រី) ទៅក្រៅប្រទេសមួយរយៈ ដើម្បីរក្សាស្ថិរភាពសម្រាប់ការផ្គត់ផ្គង់នៅក្នុងស្រុក ខណៈដែលជំងឺកូវីដ ១៩ កំពុងបន្តការរីករាលដាលនៅកម្ពុជា។
ក្នុងសារសំឡេងតាមប្រព័ន្ធតេឡេក្រាមផ្ញើទៅកាន់ថ្នាក់ដឹកនាំក្នុងក្រុមការងារប្រយុទ្ធប្រឆាំងនឹងជំងឺកូវីដ១៩ ព្រមទាំងថ្នាក់ដឹកនាំរដ្ឋាភិបាល និងអ្នកពាក់ព័ន្ធកាលពីថ្ងៃសៅរ៍ លោកនាយករដ្ឋមន្ត្រី ហ៊ុន សែន បានសម្រេចដាក់ចេញនូវវិធានការហាមឃាត់ការនាំចេញផលនេសាទទៅក្រៅប្រទេស ដើម្បីត្រៀមបម្រុងទុកកុំឲ្យមានការខ្វះខាតស្បៀងអាហារសម្រាប់ប្រជាពលរដ្ឋក្នុងស្រុកនាអំឡុងពេលដែលជំងឺកូវីដ១៩ កំពុងរីករាលដាលកាន់តែខ្លាំង។
លោកបន្តថា វិធានការការបិទការនាំចេញនេះគឺមិនត្រឹមតែអាចជួយពង្រីកបរិមាណនៃការផ្គត់ផ្គង់ត្រីក្នុងស្រុកប៉ុណ្ណោះទេ តែវាថែមទាំងធ្វើឲ្យតម្លៃត្រីមានស្ថិរភាពល្អផងដែរ។ លោកថ្លែងថា៖ «ដើម្បីចៀសវាងការឡើងថ្លៃត្រី ត្រីក៏គួរតែត្រូវបានរក្សាទុកគឺក្នុងរយៈពេលនេះគួរតែហាមឃាត់ការនាំចេញត្រីទៅក្រៅប្រទេសផងដែរកន្លងទៅយើងមិនបានហាមឃាត់ទេ គឺយើងហាមតែស្រូវ និងអង្ករស ក៏ប៉ុន្តែអាចនឹងមានការនាំចេញត្រី អ៊ីចឹងសុំឲ្យត្រីបង្វិលមកលក់នៅក្នុងទីផ្សាររបស់កម្ពុជាយើងវិញ»។
ការបិទការនាំចេញផលនេសាទនេះគឺជាវិធានការថ្មីបន្ថែមទៀតរបស់រដ្ឋាភិបាលកម្ពុជាក្នុងការរក្សាទុកស្តុកស្បៀងពីលើវិធានការហាមឃាត់ការនាំចេញស្រូវ និងអង្ករស ដែលបានចូលជាធរមានកាលពីថ្ងៃអាទិត្យម្សិលមិញ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍កាលពីថ្ងៃអាទិត្យ ថាវិធានការរបស់រដ្ឋាភិបាលក្នុងការបង្កើនស្តុកផលិតផលក្នុងស្រុកគឺពិតជាមានសារៈសំខាន់ណាស់ក្នុងការធ្វើឲ្យកម្ពុជាមានភាពរឹងមាំផ្នែកសន្តិសុខស្បៀងបន្ថែមទៀត ដើម្បីបង្កការខ្វះខាត និងការឡើងថ្លៃជាយថាហេតុក្នុងអំឡុងពេលដែលប្រទេសនានាលើពិភពលោក រួមទាំងកម្ពុជាផងកំពុងប្រយុទ្ធប្រឆាំងនឹងជំងឺកូវីដ ១៩។ លោកថ្លែងថា៖ «នេះជាវិធានការដ៏ល្អ ព្រោះបើជំងឺកូវីដ១៩ មានការរីករាលដាល យើងអាចនឹងជួបបញ្ហាកង្វះម្ហូបអាហារ»។
ទោះយ៉ាងណាលោកប្រាប់ថា មិនទាន់មានកាលបរិច្ឆេទច្បាស់លាស់ពីពេលចាប់ផ្តើមអនុវត្តវិធានការនេះទេ ដោយក្រសួងកសិកម្មនឹងត្រូវជួបប្រជុំជាមួយក្រសួងសេដ្ឋកិច្ច និងហិរញ្ញវត្ថុនៅថ្ងៃចន្ទនេះសិន។ លោកនិយាយថា៖ «រហូតមកដល់ពេលនេះយើងមិនទាន់បានកំណត់បែបណាទេ ដោយយើងរង់ចាំលទ្ធផលនៃកិច្ចប្រជុំជាមួយក្រសួងសេដ្ឋកិច្ចនៅថ្ងៃស្អែក (ចន្ទ) សិន»។
ទន្ទឹមនឹងវិធានការបិទការនាំចេញនេះលោកបានប្រាប់ថា បច្ចុប្បន្នក្រសួងកសិកម្មក៏បាននិងកំពុងពង្រឹង និងពង្រីកការចិញ្ចឹមត្រីសម្រាប់បំពេញតម្រូវការក្នុងស្រុកផងដែរ។
រៀងរាល់ឆ្នាំកម្ពុជាតែងនាំចេញផលនេសាទទឹកសាបតិចតួចទៅប្រទេសជិតខាង ខណៈការនាំចូលផលនេសាទសមុទ្រ (ត្រី) ពីបរទេសមកបំពេញតម្រូវការតាមភោជនីយដ្ឋានគឺមានច្រើន។ តាមទិន្នន័យឆ្នាំ ២០១៩ ការនាំចូលផលនេសាទសមុទ្រមកកម្ពុជាមានប្រមាណ ១៣ ម៉ឺនតោន។ នេះបើតាម លោក វេង សាខុន។
ក្រសួងសេដ្ឋកិច្ច និងហិរញ្ញវត្ថុកាលពីថ្ងៃសុក្រ ទី ៣ ខែមេសាបានចេញសេចក្តីសម្រេចមួយស្តីពី «ការបង្កើតក្រុមការងារចំពោះកិច្ចគ្រប់គ្រងការផ្គត់ផ្គង់ និងថ្លៃទំនិញយុទ្ធសាស្ត្រក្នុងអំឡុងពេលប្រយុទ្ធនឹងជំងឺកូវីដ១៩» ដែលមានសមាសភាពចូលរួមពីក្រសួងសេដ្ឋកិច្ច ក្រសួងកសិកម្ម រុក្ខាប្រមាញ់ និងនេសាទ ក្រសួងសុខាភិបាល ក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រុមប្រឹក្សាអភិវឌ្ឍន៍កម្ពុជា ក្រុមហ៊ុនហ្គ្រីនត្រេដ (Green Trade) និងធនាគារអភិវឌ្ឍន៍ជនបទ និងកសិកម្ម។
យោងតាមប្រកាសខាងលើក្រុមការងារនេះនឹងទទួលភារកិច្ចសំខាន់ៗមួយចំនួនដូចជា ការកំណត់ប្រភេទទំនិញយុទ្ធសាស្ត្រមួយចំនួនដែលបម្រើដល់ការរស់នៅប្រចាំថ្ងៃក្នុងអំឡុងពេលប្រយុទ្ធប្រឆាំងនឹងជំងឺកូវីដ១៩, ការតាមដានស្ថានភាពនៃតម្រូវការ ការផ្គត់ផ្គង់ និងតម្លៃទំនិញយុទ្ធសាស្ត្រ, តាមដាន និងធានាថា ការផ្គត់ផ្គង់ទំនិញយុទ្ធសាស្ត្រមានដំណើរការប្រកបដោយនិរន្តរភាព និងមិនមានការបង្អាក់ ឬការរំខាន ព្រមទាំងចាត់វិធានការដោះស្រាយក្នុងករណីមានការបង្អាក់ជាយថាហេតុណាមួយ។
ជាមួយគ្នានេះក្រុមការងារក៏បានភារកិច្ច តាមដាន និងត្រួតពិនិត្យលើទំនិញយុទ្ធសាស្ត្រដែលកំពុងចែកចាយលើទីផ្សារនៅក្នុងស្រុក ជាពិសេសត្រួតពិនិត្យលើគុណភាពអាកុល និងម៉ាស់ជាដើម ព្រមទាំងសហការជាមួយអាជ្ញាធរដែនដី និងក្រសួងស្ថាប័នពាក់ព័ន្ធក្នុងការចាត់វិធានការរដ្ឋបាល ឬវិធានការចាំបាច់នៅពេលមានការបង្អាក់ ឬការរំខានដល់ការផ្គត់ផ្គង់ទំនិញ ឬការឡើងថ្លៃទំនិញយ៉ាងគំហុក។
របាយការណ៍ក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា កាលពីឆ្នាំ ២០១៩ កម្ពុជាបាននាំចេញផលនេសាទស្រស់សរុប ៩ ១៩០ តោន ស្មើនឹង ៦១,២៧ ភាគរយ នៃផែនការ ១៥ ០០០ តោន ប្រៀបធៀបនឹងឆ្នាំ ២០១៨ បានថយចុះចំនួន ៣១០ តោន។ ចំណែកឯផលនេសាទកែច្នៃអនុវត្តបានចំនួន ៤ ៩១០ តោន ស្មើនឹង ៩៨,២០ ភាគរយ នៃផែនការ ៥ ០០០ តោន ហើយបើធៀបនឹងឆ្នាំ ២០១៨ មានការថយចុះចំនួន ៩០ តោន។
របាយការណ៍ក៏បានឲ្យដឹងទៀតថា ការប្រមូលផលនេសាទទឹកសាប (តាមរយៈដាយត្រី ដែននេសាទ និងលក្ខណៈគ្រួសារតាមវាលស្រែ) កាលពីឆ្នាំ ២០១៩ សម្រេចបានបរិមាណ ៤៧៨ ៨៥០ តោន និងនេសាទសមុទ្រ សម្រេចបាន ១២២ ២៥០ តោន។ ចំណែកផ្នែកវារីវប្បកម្ម ការចិញ្ចឹមត្រី និងបង្គា អនុវត្តបានប្រមាណ ៣០៧ ៤០៨ តោន៕ LA
វីដេអូ៖