.jpg)
ស្ត្រីកម្មករកំពុងបញ្ជាម៉ាស៊ីនដើម្បីដេរភ្ជាប់មាត់ការុងអង្ករ មុនពេលបញ្ជូនចូលឃ្លាំងស្តុក។ ហេង ជីវ័ន
ភ្នំពេញៈ រដ្ឋាភិបាលកម្ពុជាបានសម្រេចអនុញ្ញាតឲ្យវិស័យឯកជនធ្វើការនាំចេញអង្ករសឡើងវិញ ក្រោយពីបានចេញបម្រាមនេះកាលពីខែមីនា។ ការដកបម្រាមនេះបានធ្វើឡើងចំពេលប្រទេសហ្វីលីពីនកំពុងស្វែងរកការនាំចូលអង្ករ ៣០០ ០០០ តោន ពីប្រទេសផលិតធំៗនៅតំបន់អាស៊ីអាគ្នេយ៍។
លិខិតផ្ញើជូនសហព័ន្ធស្រូវអង្ករកម្ពុជា (CRF) ដែលចុះហត្ថលេខាដោយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីថ្ងៃពុធបានឲ្យដឹងថា តបតាមសំណើរបស់ CRF រដ្ឋាភិបាលសម្រេចផ្តល់ការអនុញ្ញាតឲ្យធ្វើការនាំចេញអង្ករសជាបណ្តើរៗឡើងវិញ តាមកិច្ចសន្យាបញ្ជាទិញពីក្រៅប្រទេសដោយគិតចាប់ពីថ្ងៃទី ២០ ខែឧសភាតទៅ។
ការដកបម្រាមនេះធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានចេញបញ្ជាឲ្យផ្អាកនាំចេញអង្ករស និងស្រូវជាបណ្តោះអាសន្នកាលពីខែមីនា ក្នុងន័យដើម្បីធានាស្តុកក្នុងស្រុកនាអំឡុងពេលមានការរីករាលដាលកូវីដ១៩។
លោក សុង សារ៉ន ប្រធានសហព័ន្ធស្រូវអង្ករកម្ពុជាបានប្រាប់ភ្នំពេញប៉ុស្តិ៍ កាលពីថ្ងៃពុធថា ការដកបម្រាមនេះនឹងជួយជំរុញការនាំចេញអង្ករសរបស់កម្ពុជាទៅកាន់បណ្តាប្រទេសកំពុងប្រឈមនឹងបញ្ហាកង្វះស្បៀងនាអំឡុងពេលការរីករាលដាលជំងឺកូវីដ ១៩។
លោកថ្លែងថា៖ «ខ្ញុំយល់ថា នេះជាការសម្រេចដ៏ឆ្លាតវ័យ យើងត្រូវអបអរសាទរ យើងដឹងហើយជំងឺកូវីដ ១៩ បានធ្វើឲ្យប៉ះពាល់ដល់កង្វះស្បៀងអាហារ ហើយវិធានការនេះនឹងរួមចំណែកជួយដល់ប្រទេសដែលត្រូវការស្បៀងអាហារក្នុងអំឡុងពេលនេះ។ ជាមួយគ្នានេះយើងក៏ចង់បង្កើតការងារដល់ម្ចាស់រោងម៉ាស៊ីនកិនស្រូវ និងកសិករខ្មែរផងដែរ»។
ទន្ទឹមនឹងនេះហ្វីលីពីនដែលជាប្រទេសនាំចូលទំនិញធំមួយនៅលើពិភពលោកកំពុងស្វែងរកការបញ្ជាទិញអង្ករប្រមាណ ៣០០ ០០០ តោន ដើម្បីបង្កើនស្តុកអង្កររបស់ខ្លួនក្នុងអំឡុងពេលប្រយុទ្ធប្រឆាំងនឹងការរាតត្បាតវីរុសកូរ៉ូណា។
លោក William Dar រដ្ឋមន្ត្រីក្រសួងកសិកម្មហ្វីលីពីនបានថ្លែងកាលពីថ្ងៃចន្ទថា រដ្ឋាភិបាលបានធ្វើការសាកសួររួចហើយមកអ្នកផលិតអង្ករធំៗនៅប្រទេសកម្ពុជា វៀតណាម ថៃ មីយ៉ាន់ម៉ា និងឥណ្ឌា ដើម្បីស្វែងរកការដឹកជញ្ជូនអង្ករនៅមុនត្រីមាសទី ៣ ខណៈការប្រមូលផលក្នុងស្រុកនឹងទទួលបានក្នុងកម្រិតទាប។ នេះបើតាមទីភ្នាក់ងារសារព័ត៌មាន Reuters។
លោកបន្តថា កិច្ចព្រមព្រៀងរវាងរដ្ឋាភិបាល និងរដ្ឋាភិបាលនៃបរិមាណនេះនឹងធ្វើឲ្យការនាំចូលអង្កររបស់ហ្វីលីពីនកើនដល់ ៣ លានតោននៅឆ្នាំនេះ។
ស្របពេលហ្វីលីពីនកំពុងស្វែងរកការនាំចូលអង្ករបន្ថែមនេះ សហព័ន្ធស្រូវអង្ករកម្ពុជាក៏កំពុងសិក្សាពីលទ្ធភាពនាំចេញអង្ករកម្ពុជាចូលទៅកាន់ទីផ្សារហ្វីលីពីនផងដែរ។ នេះបើតាមលោក សុង សារ៉ន។
លោកថ្លែងថា៖ «យើងសង្ឃឹមថា យើងនឹងរកដៃគូពាណិជ្ជកម្មជាមួយហ្វីលីពីនបាន។ យើងសូមអំពាវនាវឲ្យក្រុមហ៊ុនហ្វីលីពីនធ្វើការបញ្ជាទិញអង្ករពីកម្ពុជា ហើយយើងស្វាគមន៍រាល់វិនិយោគហ្វីលីពីន»។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍ថា មកដល់ពេលនេះក្រសួងមិនទាន់ទទួលបានលិខិតផ្លូវការពីរដ្ឋាភិបាលហ្វីលីពីនទេ។ ទោះបីជាយ៉ាងណា កម្ពុជានឹងអាចទទួលបានឱកាសនាំចេញអង្ករទៅកាន់ទីផ្សារហ្វីលីពីនក្នុងអំឡុងពេលប្រទេសហ្វីលីពីនស្វែងរកការនាំចូលអង្ករបន្ថែមទៀតនេះ។
លោកថ្លែងថា៖ «ឱកាសនេះកម្ពុជាអាចនឹងទទួលបានព្រោះកម្ពុជា និងហ្វីលីពីនធ្លាប់បានចុះ MoU ស្តីពីពាណិជ្ជកម្មអង្ករជាមួយគ្នា។ កម្ពុជា និងហ្វីលីពីនក៏បានចុះហត្ថលេខាលើអនុស្សរណៈយោគយល់គ្នាលើវិស័យផ្សេងៗជាច្រើន»។
កម្ពុជាបាននាំចេញអង្ករក្នុងបរិមាណប្រមាណ ២០០ តោន ទៅកាន់ទីផ្សារប្រទេស ហ្វីលីពីន ក្នុងរយៈពេល ៤ ខែដំបូងឆ្នាំ ២០២០។ នេះបើយោងតាមទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទ៕ LA
