ភ្នំពេញៈ ក្រសួងពាណិជ្ជកម្មកម្ពុជានឹងបាត់បង់ចំណូលប្រមាណ ៦០ លានដុល្លារក្នុងមួយឆ្នាំ ពីការសម្រេចរបស់រដ្ឋាភិបាលទាក់ទងនឹងការលុបចោលបែបបទនាំចេញមួយចំនួនដែលក្រសួងធ្លាប់បំពេញកន្លងមកដើម្បីសម្រួលដល់ការធ្វើពាណិជ្ជកម្ម។ នេះបើតាមមន្រ្តីជាន់ខ្ពស់ក្រសួងពាណិជ្ជកម្មកម្ពុជា (MoC)។
ថ្លែងក្នុងសន្និសីទសារព័ត៌មានកាលពីថ្ងៃសុក្រទាក់ទងនឹងការឆ្លើយតបនឹងករណីសហភាពអឺរ៉ុបដាក់ពន្ធលើការនាំចូលអង្ករពីកម្ពុជា លោក សុខ សុភ័ក្រ្ត រដ្ឋលេខាធិការក្រសួងពាណិជ្ជកម្មបានលើកឡើងថា រដ្ឋាភិបាលបានត្រៀមខ្លួនខ្លះៗមុនរួចទៅហើយទាក់ទងនឹងដំណោះស្រាយទល់នឹងការបាត់បង់ប្រព័ន្ធអនុគ្រោះពន្ធ។
លោកបន្តថា ការសម្រេចកន្លងមកគឺបានរួមចំណែកកាត់បន្ថយថ្លៃដើមក្នុងការនាំចេញទំនិញ ស្របពេលដែលក្រសួងពាណិជ្ជកម្មអាចនឹងបាត់បង់ចំណូលប្រមាណ ៦០ លានដុល្លារក្នុង ១ ឆ្នាំ។ យោងតាមលោក សុភ័ក្រ្ត ការសម្រេចលុបចោលកម្រៃគ្រប់គ្រងការនាំចេញដែលចាប់ផ្តើមអនុវត្តនៅឆ្នាំ ២០១៨ ធ្វើឲ្យបាត់បង់ចំណូលរបស់ក្រសួង ២០ លានដុល្លារក្នុង ១ ឆ្នាំរួចទៅហើយ។
លោកបន្តថា ការសម្រេចនៅខែនេះ ដោយអនុញ្ញាតឲ្យក្រុមហ៊ុននាំចេញទំនិញទៅកាន់សហភាពអឺរ៉ុបលែងតម្រូវឲ្យមានវិញ្ញាបនបត្របញ្ជាក់ប្រភពដើមទំនិញ (CO) នឹងធ្វើឲ្យក្រសួងបាត់បង់ចំណូល ១០ លានដុល្លារក្នុង ១ ឆ្នាំបន្ថែមទៀត ខណៈការសម្រេចថ្មីៗនេះរបស់រដ្ឋាភិបាលដោយលែងឲ្យកាំកុងត្រូលជាអ្នកត្រួតពិនិត្យទំនិញនាំចេញនាំចូលទៀតនឹងធ្វើឲ្យក្រសួងបាត់បង់ចំណូលប្រមាណ ៣០ លានដុល្លារក្នុងមួយឆ្នាំ។ លោកបានថ្លែងបន្ថែមថា៖ «[ចំណូលបាត់បង់] ពី ការធ្វើកំណែទម្រង់នេះនឹង ជួយទៅលើការធ្វើពាណិជ្ជកម្មជារួម និងជួយដល់វិស័យស្រូវអង្ករ»។
លោកថ្លែងថា វិធានការក្នុងការឆ្លើយតបនឹងបន្ទុកពន្ធក្នុងវិស័យស្រូវអង្ករដែល EU ទើបសម្រេចថ្មីៗនេះ គឺការព្យាយាមបញ្ចុះថ្លៃដើមលើកត្តាសំខាន់ៗមួយចំនួនដែលរួមមានដូចជាការដឹកជញ្ជូន និងតម្លៃលើឡសម្ងួតជាដើម។
លោកបញ្ជាក់ថា៖ «[ឆាប់ៗនេះ] ប្រហែលជារាជរដ្ឋាភិបាលនៃប្រទេស កម្ពុជា នឹងចេញអនុក្រឹត្យមួយថែមទៀត ហើយក្រសួងស្ថាប័នមួយចំនួននឹងចេញប្រកាសនេះ ប្រកាសនោះ ដែលគាត់បានរៀបចំពីមុនមកហើយ [ដើម្បីបន្ថយថ្លៃដើមក្នុងការធ្វើពាណិជ្ជកម្ម]»។
ការបាត់បង់ចំណូលដែលប៉ាន់ប្រមាណថានឹងមានរហូតដល់ ៦០ លានដុល្លារក្នុងមួយឆ្នាំនេះ គឺស្មើប្រមាណ ៧៣ ភាគរយនៃចំណូលសរុបរបស់ MoC កាលពីឆ្នាំមុន ដែលមានចំនួន ៨២ លានដុល្លារ។ យោងតាមរបាយការណ៍ប្រចាំឆ្នាំ ២០១៨ របស់ MoC ចំណូលពីកាំកុងត្រូលមានប្រមាណ ២៩ លានដុល្លារ និងចំណូលពីកម្រៃសេវាសាធារណៈមាន ៥៣ លានដុល្លារ។
វិស័យអង្កររបស់កម្ពុជាបានបាត់បង់សិទិ្ធទទួលការលើកលែងពន្ធពីទីផ្សារអឺរ៉ុបជាផ្លូវការចាប់តាំងពីថ្ងៃសុក្រសប្តាហ៍មុនមក បន្ទាប់ពីសហភាពអឺរ៉ុបបានសម្រេចយកពន្ធលើអង្ករនាំចូលពីប្រទេស កម្ពុជា និងមីយ៉ាន់ម៉ា ក្រោមហេតុផលដើម្បីការពារផលប្រយោជន៍កសិករផលិតអង្ករនៅអឺរ៉ុប។
ដោយផ្អែកលើបរិមាណនៃការនាំចេញអង្ករទៅអឺរ៉ុបកាលពីឆ្នាំ ២០១៨ ដែលមានចំនួនជិត ១៧ ម៉ឺនតោន និងអត្រាពន្ធដែលមានចំនួនជិត ២០០ ដុល្លារក្នុង ១ តោននៅឆ្នាំដំបូង ការសម្រេចថ្មីនេះនឹងធ្វើឲ្យវិស័យអង្ករកម្ពុជាត្រូវចំណាយលើការបង់ពន្ធប្រមាណ ៥០ លានដុល្លារក្នុង ១ ឆ្នាំ៕