ភ្នំពេញៈ កម្ចីចំនួន ៣០ លានអឺរ៉ូ (ប្រហែល ៣៤ លានដុល្លារ) ត្រូវបានប្រកាសកាលពីម្សិលមិញដោយសា្ថនទូតអាល្លឺម៉ង់ ដែលនឹងក្លាយជាកម្ចីលើកដំបូងដែលរដ្ឋាភិបាលអាល្លឺម៉ង់ផ្តល់ឲ្យប្រទេស កម្ពុជា ដើម្បីអភិវឌ្ឍហេដ្ឋារចនាសម្ព័ន្ធថាមពលនៅទីជនបទ។
យោងតាមសេចក្ដីប្រកាសព័ត៌មានដែលចេញផ្សាយកាលពីម្សិលមិញដោយស្ថានទូតអាល្លឺម៉ង់បន្ទាប់ពីកិច្ចប្រជុំជាមួយអគ្គិសនីកម្ពុជា (EDC) តាមរយៈការវិនិយោគលើប្រសិទ្ធភាពថាមពលអគ្គិសនីនៅតាមជនបទដោយប្រើប្រាស់កម្ចីនេះ EDC អាចកាត់បន្ថយការខាតបង់អគ្គិសនីយ៉ាងច្រើន លើកកម្ពស់លទ្ធភាពទទួលបានអគ្គិសនីនៅតំបន់ដាច់ស្រយាល និងបង្កើនភាពជឿទុកចិត្តខាងការផ្គត់ផ្គង់ថាមពលអគ្គិសនី។
សេចក្ដីប្រកាសព័ត៌មាននេះបានឲ្យដឹងថា លទ្ធភាពទទួលបានថាមពលអគ្គិសនីដែលត្រូវបានកែលម្អនៅតាមទីជនបទក្នុងប្រទេស កម្ពុជា ក៏ចូលរួមចំណែកដល់ទិសដៅប្រកបដោយមហិច្ឆតារបស់ប្រទេស កម្ពុជា ក្នុងការកាត់បន្ថយការបំភាយឧស្ម័នផ្ទះកញ្ចក់ផងដែរ។
លោក Ingo Karsten ឯកអគ្គរាជទូតអាល្លឺម៉ង់ប្រចាំនៅកម្ពុជាបានថ្លែងថា៖ «លទ្ធភាពទទួលបានអគ្គិសនីប្រកបដោយការជឿទុកចិត្ត និងមិនប៉ះពាល់បរិយាកាស គឺជាក្បាលម៉ាស៊ីនសម្រាប់ការអភិវឌ្ឍនៅពេលអនាគតរបស់កម្ពុជា ហើយនឹងជំរុញការវិនិយោគក្នុងប្រទេសនេះ»។
លោកបន្តថា៖ «វាបង្កើនប្រសិទ្ធភាពថាមពលនៅតាមតំបន់ដាច់ស្រយាល ហើយអាចធ្វើឲ្យតម្លៃកាន់តែទាប។ បណ្តាញអគ្គិសនីកាន់តែរឹងមាំ គឺជាមូលដ្ឋានសម្រាប់ការវិនិយោគនៅពេលអនាគតលើថាមពលសូឡា ដែលមានសក្ដានុពលច្រើននៅកម្ពុជា»។
យោងសេចក្តីប្រកាសនេះគម្រោងថ្មីនេះបង្ហាញជំហានផ្លាស់ប្តូរក្នុងកិច្ចសហប្រតិបត្តិការអភិវឌ្ឍន៍រវាងកម្ពុជា និងអាល្លឺម៉ង់។ វាជាកម្ចីដំបូង ដែលផ្ដល់ដោយរដ្ឋាភិបាលអាល្លឺម៉ង់ដល់កម្ពុជា ដែលឆ្លុះបញ្ចាំងពីការរីកចម្រើនរបស់កម្ពុជាឆ្ពោះទៅរកការក្លាយជាប្រទេសមានប្រាក់ចំណូលមធ្យមកម្រិតទាប។
កម្ចីនេះត្រូវបានផ្ដល់មូលនិធិដោយគំនិតបច្ចេកវិទ្យាបរិយាកាសរបស់ក្រសួងអភិវឌ្ឍន៍អន្តរជាតិអាល្លឺម៉ង់ ហើយនឹងត្រូវបានអនុវត្តដោយ KfW ដែលជាធនាគារអភិវឌ្ឍន៍របស់ប្រទេសអាល្លឺម៉ង់។
លោក កែវ រតនៈ នាយកគ្រប់គ្រង EDC បានឲ្យដឹងបន្ទាប់ពីជំនួបនេះថា កម្ចីសម្រាប់វិស័យថាមពលនេះ នឹងជាអត្ថប្រយោជន៍ដ៏ល្អមួយសម្រាប់ប្រជាជនទាំងអស់នៅតាមតំបន់ជនបទក្នុងប្រទេស កម្ពុជា។
លោកថ្លែងថា៖ «កម្ចីនេះនឹងគ្របដណ្ដប់លើប្រជាជនជាច្រើន ជាពិសេសប្រជាជនក្រីក្រ ដែលត្រូវការសេវាអគ្គិសនីតម្លៃទាប»។ លោកបន្ថែមថា វានឹងជួយបង្កើនថាមពលស្អាត ហើយវាល្អសម្រាប់ការប្រែប្រួលអាកាសធាតុ និងសេដ្ឋកិច្ចគ្រួសារនៅថ្នាក់មូលដ្ឋាន។
លោកថ្លែងថា៖ «យើងរំពឹងថា គម្រោងនេះនឹងជួយកាត់បន្ថយការប្រើប្រាស់ម៉ាស៊ីនភ្លើងម៉ាស៊ូតដែលបំពុលបរិយាកាសខ្លាំង»។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយបានស្វាគមន៍ចំពោះកម្ចីថ្មី និងលើកដំបូងពីប្រទេស អាល្លឺម៉ង់ នេះ ដោយកត់សម្គាល់ថា ការអភិវឌ្ឍអគ្គិសនីនៅតាមជនបទគឺជាកត្តាដ៏សំខាន់មួយ ដើម្បីអភិវឌ្ឍសេដ្ឋកិច្ចរបស់គ្រួសារនៅជនបទ សហគ្រាស ព្រមទាំងលើកកម្ពស់កំណើនសេដ្ឋកិច្ចរបស់ប្រទេសផងដែរ។
លោកថ្លែងថា៖ «នេះគឺជាព័ត៌មានដ៏អស្ចារ្យពិតប្រាកដ អគ្គិសនីមានភាពខ្វះខាត មិនទៀងទាត់ និងមានតម្លៃខ្ពស់។ វាគឺជាភាពចាំបាច់មួយក្នុងចំណោមភាពចាំបាច់ជាច្រើនសម្រាប់ភាពរីកចម្រើនរបស់គ្រួសារ និងការធ្វើទំនើបកម្មសហគ្រាសតាមជនបទ»។
លោកបន្តថា៖ «វានឹងបង្កើនសមត្ថភាពប្រកួតប្រជែងការផលិត និងការកែច្នៃនៅជនបទ ក្នុងចំណោមការងារជាច្រើនផ្សេងទៀត»។
ទោះយ៉ាងណា កាលបរិច្ឆេទនៃការចុះហត្ថលេខាកម្ចីនេះ មិនទាន់ត្រូវបានកំណត់ពេលវេលានៅឡើយទេ ហើយរយៈពេលកម្ចីនេះ និងអត្រាការប្រាក់ នឹងត្រូវចរចារវាងធនាគារ KfW និងក្រសួងសេដ្ឋកិច្ច។ នេះបើយោងតាមអ្នកនាំពាក្យនៅស្ថានទូតអាល្លឺម៉ង់៕ LA