ភ្នំពេញៈ ក្រសួងពាណិជ្ជកម្ម (MoC) កាលពីថ្ងៃចន្ទបានអំពាវនាវឲ្យក្រុមហ៊ុនបញ្ជាទិញសម្លៀកបំពាក់ ស្បែកជើង និងក្រុមហ៊ុនបញ្ជាទិញទំនិញធ្វើដំណើរ ដែលមានប្រភពពីប្រទេសកម្ពុជាត្រូវរក្សាការប្ដេជ្ញាចិត្ត តាមរយៈការទទួលយករាល់ផលិតផលដែលបានផលិតរួចហើយដែលមានក្នុងកិច្ចព្រមព្រៀង។
សេចក្ដីប្រកាសរបស់ MoC ដែលចុះហត្ថលេខាដោយលោក ប៉ាន សូរស័កិ្ត រដ្ឋមន្ដ្រីក្រសួងពាណិជ្ជកម្មបានឲ្យដឹងថា កម្ពុជាគឺជាប្រទេសដំបូងគេនៅលើពិភពលោកដែលតភ្ជាប់ទំនាក់ទំនងពាណិជ្ជកម្មជាមួយស្ដង់ដាការងារ។
ចាប់តាំងពីឆ្នាំ ២០០១ ប្រទេស កម្ពុជា បានធ្វើជាដៃគូជាមួយអង្គការអន្តរជាតិខាងការងារ (ILO) លើគម្រោងរោងចក្រកាន់តែប្រសើរនៅប្រទេស កម្ពុជា ដែលតម្រូវឲ្យរោងចក្រកាត់ដេរនាំចេញទាំងអស់នៅប្រទេស កម្ពុជា ត្រូវស្ថិតក្រោមការត្រួតពិនិត្យដោយ ILO ដើម្បីធានាការគោរពតាមច្បាប់ជាតិ និងស្ដង់ដាការងារអន្តរជាតិ។ កូវីដ ១៩ បានបណ្ដាលឲ្យមានការរំខានសំខាន់ៗដល់ជីវិតរបស់យើងព្រមទាំងអាជីវកម្មរបស់អ្នក និងចង្វាក់ផ្គត់ផ្គង់ពិភពលោក។
ក្រសួងបានឲ្យដឹងថា៖ «យើងមានមោទនភាពចំពោះគំនិតផ្តួចផ្ដើមនេះ ហើយនឹងបន្តធានាថា សិទ្ធិការងារ និងសិទ្ធិសង្គមរបស់កម្មកររបស់យើងត្រូវបានគាំទ្រ ខណៈយើងបានបង្កើតចង្វាក់ផ្គត់ផ្គង់ប្រកបដោយស្ថិរភាព។ ខ្ញុំសូមអំពាវនាវដល់ដៃគូរបស់យើង ក្រុមហ៊ុនបញ្ជាទិញសម្លៀកបំពាក់ ស្បែកជើង និងទំនិញធ្វើដំណើរដែលមានប្រភពពីប្រទេសកម្ពុជាត្រូវរក្សាការប្ដេជ្ញាចិត្ត ចំពោះប្រទេស កម្ពុជា និងជាពិសេសចំពោះកម្មកររបស់យើង។ យើងចង់ឲ្យអ្នកគោរពតាមកិច្ចព្រមព្រៀងរបស់អ្នក និងមិនត្រូវលុបចោលការបញ្ជាទិញដែលត្រូវបានដាក់រួចហើយ និងទំនិញត្រូវបានផលិតរួចហើយ ឬកំពុងផលិតនៅពេលបច្ចុប្បន្ន»។
ក្រសួងបន្តថា៖ «អ្នកបានរួមចំណែកដល់ការអភិវឌ្ឍសង្គមរបស់ប្រជាជនកម្ពុជារាប់លាននាក់ ដែលកំពុងពឹងផ្អែកលើវិស័យទាំងនេះក្នុងជីវភាពរស់នៅរបស់ពួកគេ»។
សមាគមរោងចក្រកាត់ដេរកម្ពុជា (GMAC) កាលពីថ្ងៃទី ១០ ខែមេសា រួមជាមួយសមាគមវាយនភណ្ឌ និងអាជីវកម្មកាត់ដេរទាំង ៩ នៃបណ្ដាញប្រកបដោយចីរភាពនៃតំបន់អាស៊ី (STAR) ពីបណ្ដាប្រទេសផលិត និងនាំចេញទាំង ៦ ក៏បានធ្វើការអំពាវនាវឲ្យក្រុមហ៊ុនយីហោពិភពលោក ក្រុមហ៊ុនលក់រាយ និងពាណិជ្ជករត្រូវទទួលខុសត្រូវលើការអនុវត្តការទិញ និងការបញ្ជាទិញដែលបានដាក់រួចហើយ ព្រមទាំងត្រូវទទួលយកទំនិញដែលបានផ្ដល់ជូនរួចហើយ ហើយពួកគេមិនគួរចរចាជាថ្មីលើតម្លៃ ឬលក្ខខណ្ឌការទូទាត់នោះទេ។
លោក ខេន លូ អគ្គលេខាធិការ GMAC បានឲ្យដឹងថានៅក្នុងអំឡុងពេលវេលាដ៏ពិបាកនេះគឺទាមទារដល់ភាគីពាក់ព័ន្ធទាំងអស់នៅក្នុងចង្វាក់ផ្គត់ផ្គង់សម្លៀកបំពាក់ និងវាយនភណ្ឌពិភពលោកត្រូវរួមគ្នា និងជួយគ្នាទៅវិញទៅមក ជាពិសេសដើម្បីធានាថា កម្មករ ក្រុមហ៊ុន និងឧស្សាហកម្មបន្តរស់បាន។ លោកបន្តថា ក្រុមហ៊ុនបញ្ជាទិញមួយចំនួនបានយល់ព្រមក្នុងការផ្ដល់ជូននោះ ប៉ុន្តែស្នើសុំពន្យារពេលលក្ខខណ្ឌទូទាត់ដូចជារយៈពេល ៩០ ឬ ១២០ ថ្ងៃបន្ទាប់ពីការផ្ដល់ជូន។
លោកថ្លែងថា៖ «យើងសុំការសហការរបស់អ្នក ដើម្បីយើងអាចលើកតម្កើងកិត្តិយស ការប្ដេជ្ញាចិត្តរបស់យើង ដើម្បីសិទ្ធិការងារការទទួលខុសត្រូវសង្គម និងដើម្បីបង្កើតចង្វាក់ផ្គត់ផ្គង់ប្រកបដោយស្ថិរភាព។ សូមគោរពតាមលក្ខខណ្ឌលើកិច្ចព្រមព្រៀងការទិញត្រូវបានដាក់រួចហើយ»។
លោកបានថ្លែងថា៖ «ខ្ញុំជឿថា បើយើងសហការគ្នា និងធ្វើការងាររួមគ្នា យើងនឹងបន្តរស់ និងកាន់តែរឹងមាំ។ សំខាន់ជាងនេះទៅទៀតកម្មកររបស់យើងក៏នឹងអាចបន្តរស់នៅ និងរួមគ្នា យើងអាចបន្តដំណើរជីវិតរបស់យើង ក្រុមហ៊ុនយើង និងឧស្សាហកម្មនេះ»៕ LA