The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋ​មន្ត្រី​ទេសចរណ៍​ថា​កម្ពុជា​ជោគ​ជ័យ​ធំ​បន្ទាប់​ពី​ពិព័រណ៍​អន្តរជាតិ

រដ្ឋ​មន្ត្រី​ទេសចរណ៍​ថា​កម្ពុជា​ជោគ​ជ័យ​ធំ​បន្ទាប់​ពី​ពិព័រណ៍​អន្តរជាតិ

រដ្ឋ​មន្ត្រី​ទេសចរណ៍​ថា​កម្ពុជា​ជោគ​ជ័យ​ធំ​បន្ទាប់​ពី​ពិព័រណ៍​អន្តរជាតិ

ភ្នំពេញៈ កម្ពុជា​កំពុង​ក្លាយ​ជា​ទិស​ដៅ​ទេសចរណ៍​ទាក់​ទាញ​មួយ​ក្នុង​តំបន់​អាស៊ី បន្ទាប់​ពីធ្វើ​ជា​ម្ចាស់​ផ្ទះ​នៃ​ព្រឹត្តិការណ៍​ពិព័រណ៍​ទេសចរណ៍​អន្តរជាតិ PATA Travel Mart ២០១៤ កាល​ពី​សប្តាហ៍​មុន។

លោក ថោង ខុន រដ្ឋ​មន្ត្រី​ក្រសួង​ទេសចរណ៍​បាន​ប្រាប់ ភ្នំពេញ ប៉ុស្តិ៍ កាល​ពី​ម្សិល​មិញ​ថា ព្រឹត្តិ​ការណ៍​ដែល​រដ្ឋាភិបាល​បាន​ចំណាយ​ថវិកា​ចំនួន​កន្លះ​លាន​ដុល្លារ​ក្នុង​ការ​រៀបចំ​នេះ​បាន​ជួយ​ឲ្យ​កម្ពុជា​ពង្រីក​ខ្លួន​ទៅ​កាន់​ទីផ្សារ​ទេសចរណ៍​អន្តរជាតិ​កាន់​តែ​ប្រសើរ​ឡើង។

លោក​ថ្លែង​ថា៖ «ជោគជ័យ​នោះ​គឺ​យើង​ជា​គោល​ដៅ​ទាក់ទាញ​បំផុត​ដែល​គេ​ភ្ជាប់​យើង​ទៅ​ជាមួយ​គោល​ដៅ​អាស៊ី។ អ្នក​លក់ [សេវា​កញ្ចប់​ទេសចរណ៍] នៅ​អាស៊ី​នោះ បាន​លក់​កញ្ចប់​ទេសចរណ៍​ឲ្យ​អ្នក​ទិញ​ដែល​មាន​មក​ពី​អឺរ៉ុប អាមេរិក ឲ្យ​នាំ​ភ្ញៀវ​គេ​មក​ទស្សនា​នៅ​អាស៊ី​ប៉ាស៊ីហ្វិក ហើយ​នៅ​គ្រប់​កញ្ចប់​ទាំង​អស់​គឺ​មាន​កម្ពុជា​យើង។ យើង​មិន​ទទួល​បាន​ប្រាក់​ចំណេញ​ពី​ការ​រៀបចំ​ពិព័រណ៍​នេះ​ទេ តែ​យើង​ចំណេញ​ត្រង់​ថា យើង​បាន​ផ្សព្វ​ផ្សាយ​ទេសចរណ៍​ទៅ​គេ ហើយ​យើង​ក្លាយ​ជា​គោល​ដៅ​ទាក់​ទាញ​មួយ»។

ក្នុង​ពិព័រណ៍ ៣ ថ្ងៃ​ដែល​ប្រារព្ធ​ឡើង​ក្នុង​រាជធានី​ភ្នំពេញ​ពី​សប្តាហ៍​មុន​កម្ពុជា បាន​ស្វាគមន៍​ប្រតិភូ​ប្រមាណ ១០០០ នាក់​មក​ពី​ប្រទេស​ប្រមាណ ៦០។ ក្នុង​នោះ​មាន​ប្រតិភូ​ជា​ក្រុមហ៊ុន​លក់​កញ្ចប់​ទេសចរណ៍​ជាង ៤៥០ នាក់​មក​ពី​បណ្តា​ប្រទេស​ក្នុង​ទ្វីប​អាស៊ី និង​ជាង ៣០០ នាក់​មក​ពី​ប្រទេស​ក្នុង​ទ្វីប​អឺរ៉ុប និង​សហរដ្ឋ​អាមេរិក។

លោក ឱម ផារិន នាយក​គ្រប់​គ្រង​ក្រុម​ហ៊ុន Charming Cambodia Tour ដែល​បាន​ចូល​រួម​ជា​អ្នក​លក់​កញ្ចប់​ទេសចរណ៍​ក្នុង​ពិព័រណ៍​ទេសចរណ៍​អន្តរជាតិ​មួយ​នេះ​ឲ្យ​ដឹង​ថា ក្រុម​ហ៊ុន​លោក​បាន​ជួប​ពិភាក្សា​និង​ចុះ​កិច្ច​សន្យា​ពាណិជ្ជកម្ម​ជាមួយ​ក្រុម​ហ៊ុន​ទេសចរណ៍​សំខាន់ៗ​មក​ពី​ប្រទេស​នៅ​អឺរ៉ុប និង​សហរដ្ឋ​អាមេរិក។

លោក​ថ្លែង​ថា៖ «អាមេរិក និង​អឺរ៉ុប​ជា​ទីផ្សារ​ចាស់​របស់​កម្ពុជា តែ​មាន​ក្រុម​ហ៊ុន​ជាច្រើន​ដែល​គាត់​មិន​ធ្លាប់​លក់​សេវាកម្ម​ទេសចរណ៍​កម្ពុជា ហើយ​គាត់​ចាប់​អារម្មណ៍​ចង់​លក់។ គាត់​នៅ​ត្រូវ​ការ​ពេល​ដើម្បី​សិក្សា​បន្ថែម​ទៀត​មុន​នឹង​អាច​ទាក់​ទាញ​ភ្ញៀវ​របស់​គាត់​មក​ទស្សនា​កម្ពុជា»។

លោក ហូ វណ្ឌី សហ​ប្រធាន​ក្រុម​ការងារ​ខាង​វិស័យ​ទេសចរណ៍​ឲ្យ​ដឹង​ថា ព្រឹត្តិការណ៍​លើក​នេះ​ជា​ការ​ចូល​រួម​ចំណែក​មួយ​ក្នុង​ការ​ជំរុញ​វិស័យ​ទេសចរណ៍​កម្ពុជា​តាម​រយៈ​ការ​ផ្សព្វ​ផ្សាយ​អំពី​សក្តានុពល​គោល​ដៅ​ទេសចរណ៍​សំខាន់ៗ​ក្នុង​តំបន់ តែ​ថា​ប្រទេស​ជិត​ខាង​នៅ​តែ​ដើរ​តួនាទី​សំខាន់​ក្នុង​វិស័យ​ទេសចរណ៍​កម្ពុជា។

លោក​ថ្លែង​ថា៖ «យើង​ត្រូវ​បាន​បញ្ចូល​ក្នុង​កញ្ចប់​ទេសចរណ៍​មែន តែ​យើង​នៅ​តែ​ត្រូវ​សហការ​ជាមួយ​ប្រទេស​ជិត​ខាង​ដើម្បី​ទទួល​បាន​ភ្ញៀវ​ព្រោះ​ភ្ញៀវ​តែង​ចង់​ទៅ​ទស្សនា​ឲ្យ​បាន​ច្រើន​ប្រទេស៕

អត្ថបទគួរចាប់អារម្មណ៍