ភ្នំពេញៈ រដ្ឋាភិបាល និងវិស័យឯកជនកំពុងសិក្សារួមគ្នាពីលទ្ធភាពបញ្ចុះថ្លៃដើមផលិតកម្មស្រូវ និងការនាំចេញអង្ករកម្ពុជាក្នុងគោលបំណងដើម្បីបង្កើនភាពប្រកួតប្រជែងក្នុងទីផ្សារនាំចេញអង្កររបស់ខ្លួនទៅកាន់ទីផ្សារពិភពលោក។
លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មបានថ្លែងក្នុងកិច្ចប្រជុំស្តីពីរបាយការណ៍សិក្សាថ្លៃដើមផលិតកម្ម និងនាំចេញអង្ករកម្ពុជា (Rice Export Cost Study) ជាមួយនឹងតំណាងសហព័ន្ធស្រូវអង្ករកម្ពុជា និងអង្គការកម្មវិធីខ្សែច្រវាក់តម្លៃកសិកម្មកម្ពុជា (CAVAC) កាលពីថ្ងៃចន្ទថា កិច្ចប្រជុំនេះធ្វើឡើងនៅក្នុងគោលបំណងដើម្បីស្វែងរកបញ្ហាប្រឈមនានា ឧត្តមភាព និងលទ្ធភាពពង្រឹងភាពប្រកួតប្រជែងក្នុងវិស័យស្រូវអង្ករកម្ពុជា។
លោកបានថ្លែងថា៖ «[ការពិភាក្សានេះ] ដោយវិភាគលើខ្សែច្រវាក់តម្លៃរបស់វិស័យស្រូវអង្ករចាប់តាំងពីការបង្កបង្កើនផល ការសម្ងួត និងកិនកែច្នៃ រហូតដល់ការនាំចេញ ព្រមទាំងការដឹកជញ្ជូន និងការរត់ការឯកសារសម្រាប់នាំចេញទៅកាន់ប្រទេសគោលដៅសហភាពអឺរ៉ុប និងបណ្តាប្រទេសផ្សេងៗទៀត»។
លោកថា ក្នុងកិច្ចប្រជុំនេះភាគីពាក់ព័ន្ធក៏បានលើកឡើងពីផលប៉ះពាល់ដល់តម្លៃនាំចេញអង្ករកម្ពុជារួមមានបញ្ហាអគ្គិសនី ការដឹកជញ្ជូនពីឃ្លាំងទៅកំពង់ផែ ថ្លៃចំណាយនៅកំពង់ផែ និងការចំណាយលើការដឹកជញ្ជូនពីកំពង់ផែ ទៅប្រទេសគោលដៅនាំចូលជាដើម។ ជាមួយគ្នានេះលោកក៏បានស្នើឲ្យវិស័យឯកជនបន្តសហការជាមួយក្រសួងដើម្បីដោះស្រាយបញ្ហាប្រឈម នានាក្នុងវិស័យស្រូវអង្ករកម្ពុជា។ លោកបញ្ជាក់ថា៖ «ខ្ញុំនឹងរាយការណ៍ពីបញ្ហាប្រឈមជូនថ្នាក់ដឹកនាំ និងស្នើសុំសេចក្តីសម្រេចពីថ្នាក់ដឹកនាំដើម្បីដោះស្រាយបញ្ហាប្រឈមទាំងនេះ»។
លោក ចាន់ សុខឃាំង អនុប្រធានសហព័ន្ធស្រូវអង្ករប្រាប់ភ្នំពេញប៉ុស្តិ៍កាលពីថ្ងៃអង្គារថា ការសិក្សានេះក្នុងគោលបំណងជំរុញភាពប្រកួតប្រជែងជាមួយនឹងប្រទេសផលិតអង្ករធំៗក្នុងតំបន់អាស៊ាន និងដើម្បីជំរុញគោលដៅជាលើកទី ២ ក្នុងការនាំចេញអង្ករឲ្យបាន ១ លានតោននៅឆ្នាំ ២០២២។
លោកថ្លែងថា៖ «យើងបានធ្វើបទបង្ហាញពីរូបភាពទូទៅនៃថ្លៃដើមផលិតនៅតាមមូលដ្ឋានដោយផ្តោតលើស្រូវផ្ការំដួល ស្រូវសែនក្រអូប និងអង្ករស ជូនដល់មន្ត្រី និងអ្នកពាក់ព័ន្ធ។ យើងពិភាក្សាដើម្បីជំរុញតម្លៃចង្វាក់ផលិតកម្មរវាងកម្ពុជាជាមួយប្រទេសជិតខាងឲ្យបានប្រហាក់ប្រហែលគ្នា ពិសេសយើងចង់បង្កើនការប្រកួតប្រជែងការនាំចេញអង្ករសថែមទៀត»។
ទន្ទឹមនឹងនេះលោកក៏បានស្នើសុំឲ្យរដ្ឋាភិបាលបង្កើនកញ្ចប់ថវិកាបន្ថែមទៀត ដើម្បីផ្តល់លទ្ធភាពឲ្យម្ចាស់រោងម៉ាស៊ីនកិនស្រូវមានលទ្ធភាពទិញស្រូវស្តុកទុកសម្រាប់កែច្នៃនាំចេញ។
លោកបាននិយាយថា៖ «យើងស្នើសុំឲ្យរដ្ឋាភិបាល និងធនាគារជាតិនៃកម្ពុជា ព្រមទាំងធនាគារពាណិជ្ជនានាផ្តល់កម្ចីដល់វិស័យកសិកម្ម ព្រោះវិស័យនេះជួយបង្កើនផលសេដ្ឋកិច្ចជិតដល់ ១០ ពាន់លានដុល្លារក្នុង ១ ឆ្នាំបើធៀបនឹងវិស័យកាត់ដេរប្រហាក់ប្រហែលគ្នា ក៏ប៉ុន្តែបើយើងក្រឡេកមើលលើកម្ចីដែលខាងធនាគារផ្តល់ជូនវិស័យកសិកម្ម ហើយគាត់ផ្តល់ជូនខាងផ្នែកកាត់ដេរ និងសំណង់ ការផ្តល់កម្ចីលើវិស័យកសិកម្មនៅទាបជាងគេ»។
យោងតាមសហព័ន្ធស្រូវអង្ករ ការនាំចេញអង្ករកម្ពុជាទៅកាន់ទីផ្សារអន្តរជាតិក្នុងរយៈពេល ៤ ខែដំបូង ឆ្នាំ ២០២០ សម្រេចបានជាង ៣០ ម៉ឺនតោនកើន ៤០,៤៦ ភាគរយបើធៀបនឹងរយៈពេលដូចគ្នាកាលពីឆ្នាំមុន។
យោងតាមរបាយការណ៍បង្ហាញទៀតថាការនាំចេញទៅកាន់ប្រទេសចិនមាន ៤១ ភាគរយទៅសហភាពអឺរ៉ុប និងអង់គ្លេស ៣២ ភាគរយទៅបណ្តាប្រទេសក្នុងតំបន់អាស៊ាន ១៣ ភាគរយ និងប្រទេសផ្សេងៗទៀត ១៤ ភាគរយ។
កាលពីឆ្នាំ ២០១៩ កម្ពុជាបាននាំចេញអង្ករចំនួន ៦២០ ១០៦ តោនធ្លាក់ចុះ ០,៩៧ ភាគរយបើធៀបទៅនឹងឆ្នាំ ២០១៨៕ LA