ភ្នំពេញៈ ចាប់តាំងពីការបង្ក្រាបលើរថយន្តដឹកទំនិញលើសទម្ងន់ និងខុសបច្ចេកទេសដែលបានចាប់ផ្ដើមកាលពីថ្ងៃទី ១០ ខែកុម្ភៈមានរថយន្តដឹកទំនិញជិត ១០ ម៉ឺនគ្រឿងត្រូវបានត្រួតពិនិត្យដោយកាត់ទ្រុងជាង ១ ០០០ គ្រឿង និងរកឃើញរថយន្ត ៣ ០០០ គ្រឿងរំលោភបទប្បញ្ញតិ្តនានា។ នេះបើតាមមន្ត្រីក្រសួងសាធារណការ និងដឹកជញ្ជូន។
ការបង្ក្រាបដែលជាគោលនយោបាយថ្មីរបស់រដ្ឋាភិបាលបានចាប់ផ្ដើមបន្ទាប់ពីការព្រមានរបស់លោកនាយករដ្ឋមន្ត្រី ហ៊ុន សែន ថានឹងដកតំណែងអភិបាលខេត្តណាដែលអនុញ្ញាតឲ្យរថយន្តលើសចំណុះ ឬរថយន្តផ្ទុកអីវ៉ាន់លើសទម្ងន់រត់លើផ្លូវក្នុងខេត្តរបស់ពួកគេ។
វិធានការនេះបានធ្វើឲ្យប៉ះពាល់ដល់វិស័យកាត់ដេរផងដែរដោយសមាគមរោងចក្រកាត់ដេរកម្ពុជា (GMAC) បានផ្ញើលិខិតមួយទៅលោកនាយករដ្ឋមន្ត្រី ហ៊ុន សែន ឲ្យជួយដោះស្រាយដោយសារវិធានការនេះបានប៉ះពាល់ដល់រថយន្តដឹកទំនិញសម្រាប់ផ្គត់ផ្គង់វត្ថុធាតុដើមបម្រើឲ្យវិស័យកាត់ដេរ។
មិនមានពេលវេលាអនុគ្រោះបែបនោះត្រូវបានផ្ដល់ទេ ប៉ុន្តែស្ថានការណ៍បានកែលម្អសម្រាប់ក្រុមហ៊ុនដឹកជញ្ជូន។ នេះបើតាមលោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជា។
លោក ស៊ិន ចន្ធី បានឲ្យដឹងថា៖ «ក្នុងអំឡុងពេលមួយខែដំបូងនៃការអនុវត្ត យើងមានការបារម្ភថា វានឹងប៉ះពាល់ដល់ក្របខ័ណ្ឌពេលវេលាចែកចាយទំនិញរបស់យើង»។ លោកបន្តថា៖ «ប៉ុន្តែពេលនេះស្ថានការណ៍មិនអាក្រក់ ឬមានភាពតានតឹងទេ ហើយមិនប៉ះពាល់ខ្លាំងដល់រថយន្តកុងតឺន័រទេ»។
នៅក្នុងលិខិតដើមរបស់ខ្លួន GMAC បានឲ្យដឹងថាការបង្ក្រាប «បានបណ្ដាលឲ្យមានការគំរាមកំហែងដល់វិស័យកាត់ដេរ ស្បែកជើង និងទំនិញធ្វើដំណើរ ដែលកំពុងប្រឈមនឹងការប្រកួតប្រជែងខ្លាំងលើទីផ្សារពិភពលោក និងការបញ្ជាទិញរយៈពេលខ្លីពីអ្នកទិញ» និងថ្លែងថាគោលនយោបាយនេះនឹងប៉ះពាល់ដល់ក្រុមហ៊ុនប្រសិនបើវាមិនត្រូវបានពន្យារពេលទេនោះ។
តំណាងមកពី GMAC មិនអាចទាក់ទងសុំការអត្ថាធិប្បាយបានទេកាលពីម្សិលមិញ ប៉ុន្តែតាមលោក ស៊ិន ចន្ធី បារម្ភថាការបង្ក្រាបនេះនឹងគ្របដណ្តប់លើរថយន្តកុងតឺន័រដែលប្រើប្រាស់យ៉ាងទូលំទូលាយក្នុងឧស្សាហកម្មកាត់ដេរ៕LA