.jpg)
ទិដ្ឋភាពនៃការលើកកុងតឺន័រដាក់លើរថយន្តនៅក្នុងកំពង់ផែស្វយ័តក្រុងព្រះសីហនុ។ ហេង ជីវ័ន
ភ្នំពេញៈ កំពង់ផែស្វយ័តក្រុងព្រះសីហនុដែលជាក្រុមហ៊ុនចុះបញ្ជីនៅផ្សារមូលបត្រកម្ពុជា និងជាកំពង់ផែសមុទ្រទឹកជ្រៅរបស់កម្ពុជាបាននាំចូលរថយន្តលើកកុងតឺន័រចំនួន ៤ គ្រឿង មកពីក្រុមហ៊ុន Shanghai Zhenhua Heavy Industries Co., Ltd. (ZPMC) ដែលមានមូលដ្ឋាននៅក្រុងសៀងហៃដើម្បីបម្រើប្រតិបត្តិការអាជីវកម្មរបស់ខ្លួន។
យោងតាមសេចក្ដីប្រកាសព័ត៌មានរបស់ក្រុមហ៊ុន ZPMC ដែលចេញផ្សាយកាលពីថ្ងៃចន្ទ រថយន្តលើកកុងតឺន័រទាំង ៤ គ្រឿងនេះ ត្រូវបានដឹកមកដល់កំពង់ផែនេះតាំងពីថ្ងៃទី ២១ ខែកក្កដា។
សេចក្ដីប្រកាសព័ត៌មានបានបន្តថា៖ «រថយន្តលើកកុងតឺន័រចំនួន ៤ គ្រឿងនេះ ត្រូវបានដឹកមកដល់កំពង់ផែក្រុងព្រះសីហនុរបស់ប្រទេសកម្ពុជា ដោយភាពជោគជ័យកាលពីថ្ងៃទី ២១ ខែកក្កដា ដោយក្រុមហ៊ុន ZPMC ក្នុងការឈានចូលទីផ្សារកម្ពុជាជាលើកដំបូង។ កំពង់ផែនេះគឺជាកំពង់ផែមានប្រវែងវែងជាងគេតាមបណ្ដោយឆ្នេរភាគនិរតី និងជាកំពង់ផែពាណិជ្ជកម្មតែ ១ គត់ ជាមួយនឹងការនាំចូលនាំចេញដោយរួចពន្ធរបស់ប្រទេសនេះ»។
លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូនបានឲ្យដឹងកាលពីខែកុម្ភៈថា រដ្ឋាភិបាលកំពុងរៀបចំផែនការសាងសង់ចំណតកុងតឺន័រថ្មីមួយរបស់កំពង់ផែនេះ ដើម្បីឲ្យមានជម្រៅជ្រៅជាង ១៤,៥ ម៉ែត្រ ដែលអាចបម្រើសេវាកម្មប្រហែល ៩៣ ភាគរយនៃនាវាធំៗទាំងអស់ធ្វើដំណើរនៅក្នុងតំបន់អាស៊ីប៉ាស៊ីហ្វិក អាចចូលចតដោយផ្ទាល់ ដោយមិនចាំបាច់ឈប់នៅប្រទេសសិង្ហបុរី ឬទីក្រុងហុងកុងឡើយ។
លោក លូ គីមឈន់ អគ្គនាយក PAS មិនអាចទាក់ទងសុំការអត្ថាធិប្បាយបានទេជុំវិញការនាំចូលរថយន្តលើកកុងតឺន័រទាំងនេះ។ ទាក់ទងនឹងកំពង់ផែថ្មីនេះកាលពីមុនលោកបានឲ្យដឹងថា កំពង់ផែថ្មីនេះនឹងត្រូវចំណាយប្រហែល ២០៣ លានដុល្លារជាមួយនឹងជំនួយហិរញ្ញវត្ថុពីទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន។
បើយោងតាមរបាយការណ៍ប្រចាំឆ្នាំបានពីក្រសួងសាធារណការ និងដឹកជញ្ជូនចំនួនកុងតឺន័រផ្ទុកនៅកំពង់ផែនេះបានកើនឡើង ១៧ ភាគរយ ដោយកើនដល់ចំនួនសរុប ៦៣៣ ០៩៩ កុងតឺន័រត្រឹមចុងឆ្នាំមុន។ ចំនួនគិតជាតោនសរុបបានកើនឡើង ២២,៦ ភាគរយដែលកើនឡើងដល់ជាង ៦,៥ លានតោន ខណៈដែលចំនួនសរុបនាវាដែលឆ្លងកាត់បានកើនឡើង ១៥,៥ ភាគរយដល់ ១ ៦៦១ គ្រឿង។
PAS បានរាយការណ៍ប្រាក់ចំណូលចំនួន ៨៣,៤៨ លានដុល្លារកាលពីឆ្នាំមុន កើនឡើង ២១,១៧ ភាគរយធៀបទៅនឹងរយៈពេលដូចគ្នាកាលពីឆ្នាំមុន និងប្រាក់ចំណេញប្រតិបត្តិការចំនួន ២០,៣៤ លានដុល្លារ កើនឡើង ២៧ ភាគរយ។ នេះបើយោងតាមឯកសាររបស់ខ្លួនផ្ញើទៅផ្សារហ៊ុន៕ LA
